سنڌ اسيمبلي ۾ حڪومت رمشا جي قتل بابت بحث ٿيڻ نه ڏنو، اپوزيشن جو سخت احتجاج، هنگامو

2Shares

ڪراچي (چيف رپورٽر) سنڌ اسيمبلي ۾ هل هنگامو، شور شرابو، معمول بڻجي ويو، سومر ڏينهن ايوان جي ڪارروائي چئن ڏينهن جي وقفي بعد جڏهن ٻيهر شروع ٿي ته ايوان ۾ هڪ دفعو ٻيهر احتجاج، هل هنگامو ۽ نعريبازي جو سلسلو شروع ٿي ويو، هنگامه آرائي جي شروعات ان وقت ٿي جڏهن پي ٽي آءِ جي عورت ميمبر طاهره بتول کي رمشا وساڻ قتل ڪيس بابت قرارداد پ پ جي هڪ ميمبر کان پهريان پيش ڪرڻ جي اجازت نه ڏني وئي، ڊپٽي اسپيڪر ريحانه لغاري پ پ جي ذوالفقار شاهه کي التوا واري تحريڪ پيش ڪرڻ جي رولنگ ڏئي چڪي هئي جنهن تي اپوزيشن جي نشستن تي ويٺل ميمبرن هنگامه آرائي ۽ نعريبازي شروع ڪري ڇڏي. ڊپٽي اسپيڪر چيو ته اپوزيشن وارا خبر ناهي ڇو هل هنگامو ۽ رولز جي عمل ناهن ڪندا. جي ڊي اي جي پارلياماني اڳواڻ حسنين مرزا ڊپٽي اسپيڪر سان مخاطب ٿيندي چيو ته ميڊم توهان جا به ٻچا آهن ۽ اسان جا به، توهان ماءُ جي حيثيت ۾ ان اشو کي ٽيڪ اپ ڪريو جنهن تي ريحانه لغاري چيو ته مون توهان کي منع ناهي ڪيو، بزنس کي مڪمل ڪرڻ ڏنو وڃي ان بعد قرارداد پيش ڪئي وڃي.  حسنين مرزا چيو ته اهم موضوع تي اسيمبلي بزنس معطل ڪري سگهجي ٿو، ان دوران اپوزيشن ۽ حڪومتي ميمبرن وچ ۾ ڊيسڪون وڄائڻ ۽ بزنس هلائڻ، نه هلائڻ تي مقابلو شروع ٿي ويو جنهن سبب ايوان ۾ شور شروع ٿي ويو ۽ ميمبر هڪٻئي جو آواز به ڪونه پئي ٻڌي سگهيا. ايوان مڇي مارڪيٽ وارو منظر پيش ڪرڻ لڳو. پ پ جي منور وساڻ اپوزيشن جي رويي تي سخت تنقيد ڪندي چيو ته هي هڪ سازش تحت ماحول خراب ڪري رهيا آهن جنهن تي اپوزيشن جي ميمبرن (هم نهين مانتي ظلم کي ضابطي) جا نعرا هڻڻ شروع ڪري ڇڏيا. احتجاج دوران اپوزيشن ميمبر پنهنجي نشستن تي اٿي بيهي رهيا پر پوءِ به ڊپٽي اسپيڪر چيو ته آئون بزنس ڪال ڪري چڪي آهيان، ذوالفقار شاهه پنهنجي مهملي واري رٿ پيش ڪندو، ان موقعي تي ميرپور خاص ۾ حيسڪو پاران اوور بلنگ تي پ پ جي ذوالفقار شاهه پنهنجي التوا واري تحريڪ پيش ڪئي پر ان دوران به ايوان ۾ هل هنگامو جاري رهيو، هنگامي دوران اسپيڪر آغا سراج دراني پنهنجي سيٽ تي واپس اچي ويو ۽ هن اپوزيشن ميمبرن کي خاموش ٿيڻ ۽ پنهنجي نشستن تي ويهڻ جي هدايت ڪئي پر ان جي اهڙي هدايت جو ڪو اثر نه پيو. ان موقعي تي اپوزيشن ميمبرن پاران رمشا وساڻ جي قتل ڪا جواب دو جا نعرا به لڳندا رهيا. اپوزيشن اڳواڻ فردوس شميم نقوي جو چوڻ هو ته جڏهن ڪنهن انسان جو قتل ٿئي ته اهو اهميت رکي ٿو. هن چيو ته ماڊل ٽائون سانحو هجي يا ساهيوال واقعو يا وري خيرپور ۾ نينگري جو قتل، هي وڏي اهميت جوڳا واقعا آهن. اسيمبلي ۾ انسانيت تي پهريان ڳالهه ٿيڻ گهرجي. هنگامي دوران جي ڊي اي جي نصرت سحر عباسي به مائيڪ بند هجڻ سبب رڙيون ڪندي ڳالهائڻ شروع ڪيو جنهن تي آغا سراج دراني چيو ته مون تي نه چيڪ تون جڏهن به هائوس ۾ هوندي آهين ته هائوس کي ڊسٽرب ڪندي آهين، تون ويهي رهه، مون تي آڱريون نه کڻن، اسپيڪر آغا سراج دراني نصرت سحر عباسي کي سخت دڙڪو ڏيندي چيو ته تون مون کي ڊيڄاري نٿي سگهين، اسيمبلي ۾ سخت شور شرابي دوران اسپيڪر اجلاس ايندڙ خميس 7 فيبروري تائين ملتوي ڪري ڇڏيو.

2Shares

اپنا تبصرہ بھیجیں