لاهور هاءِ ڪورٽ ساهيوال سانحي تي جوڊيشل ڪميشن جوڙڻ بابت وزيراعظم کان جواب طلب ڪري ورتو

لاهور(بيورو) لاهور هاءِ ڪورٽ جي چيف جسٽس ساهيوال سانحي جي جاچ لاءِ جوڊيشل ڪميشن جوڙڻ بابت وزيراعظم عمران خان کان خميس تائين جواب طلب ڪيو آهي. لاهور هاءِ ڪورٽ جي چيف جسٽس جسٽس سردار شميم احمد خان جي سربراهيءَ ۾ 2 رڪني بئنچ ساهيوال واقعي جي جي آءِ ٽي جوڙڻ خلاف ۽ جوڊيشل ڪميشن بڻائڻ بابت متفرق درخواستن جي ٻڌڻي ڪئي. ٻڌڻي دوران جي آءِ ٽي سربراهه ڊي آءِ جي اعجاز شاهه پيش ٿيو. جوڊيشل ڪميشن جي جوڙجڪ جي دليلن تي چيف جسٽس لاهور هاءِ ڪورٽ وڪيل کي باور ڪرايو ته جوڊيشل ڪميشن جوڙڻ حڪومت جو ڪم آهي، ساڳيو ئي مجاز فورم آهي، عدالت اها ڪميشن جوڙي نه ٿي سگهي. وڪيل بئريسٽر احتشام نشاندهي ڪئي ته ماڊل ٽائون سانحي جي معاملي تي جوڊيشل ڪميشن ڪميشن جوڙي وئي هئي جنهن تي چيف جسٽس لاهور هاءِ ڪورٽ وڪيل کي باور ڪرايو ته هاڻي قانون تبديل ٿي چڪو آهي، هاڻي قانون مختلف آهي. عدالت جي آءِ ٽي جي سربراهه کان پڇاڻو ڪيو ته توهان فائل کڻي آيا آهيو جنهن تي جي آءِ ٽي سربراهه چيو ته فائل جاچ آفيسر وٽ آهي. لاهور هاءِ ڪورٽ جي چيف جسٽس وفاقي سرڪار جي وڪيل کي جوڊيشل ڪميشن جي جوڙجڪ جي معاملي تي  وزيراعظم کان هدايتون وٺي پيش ٿيڻ جو حڪم ڏنو. لاهور هاءِ ڪورٽ جي چيف جسٽس عدالتي حڪمن تي ساهيوال واقعي جي رپورٽ پيش نه ڪرڻ تي شديد ناراضگي جو اظهار ڪيو ۽ قرار ڏنو ته عدالتي حڪمن تي عمل نه ڪرڻ عجيب ڳالهه آهي. عدالت جوڊيشل ڪميشن بڻائڻ بابت وفاقي سرڪار کان جواب طلب ڪندي خميس تائين جوڊيشل ڪميشن جوڙڻ بابت رپورٽ طلب ڪئي.