سڀ چور اپوزيشن ۾ گڏ ٿي ويا آهن، لاڙڪاڻي پئڪيج جا 90 ارب رپيا دبئي ۾ نڪتا، وزيراعظم ڊيل نه ڪندو: فواد چوڌري

1Shares

گوجرانوالا (م ڊ) سڌ سماءَ واري وفاقي وزير فواد چوڌري چيو آهي ته ملڪ جي ناڻي کي بي دردي سان لٽيو ويو، ملڪ لٽيندڙ سڀ چور اپوزيشن ۾ گڏ ٿي ويا آهن، انهن سان جيلن ۾ اهڙو ورتاءُ ٿيڻ گهرجي جهڙو غريبن سان ٿيندو آهي. گوجرانوالا ۾ عوامي ميڙ کي خطاب ڪندي فواد چوڌري چيو ته جيڪي اڳ ئي هڪ هئا هاڻ به هڪ ئي آهن، گذريل حڪومتن کان پڇو ته قرض جي رقم ڪيڏانهن وئي؟ حساب گهرو ته چون ٿا جمهوريت خطري ۾ آهي، گذريل 10 سالن ۾ 70 سالن کان وڌيڪ قرض ورتو ويو. هن چيو ته سعد رفيق کي گرفتار ڪيو ويو ته منسٽر انڪليو ۾ رهڻ لڳو، 3 ڀيرا وزيراعظم رهندڙ کي سرڪاري اسپتالون نه ٿيون وڻن، نواز شريف کي پاڪستان جي اسپتالن ۾ علاج ڪرائڻ پسند ناهي، توهان ملڪ تي ڪيترائي سال حڪومت ڪئي پر اهڙي ڪا به اسپتال نه ٺاهي، جتي علاج ٿي سگهي. سندس چوڻ هو ته لاڙڪاڻي جو پيڪيج اربين رپين جو هو، 90 ارب رپيا دبئي ۾ نڪري پيا، جيڪي پئسو عوام تي خرچ ٿيڻو هو، اهو دبئي ۽ لنڊن مان هٿ اچي رهيو آهي، عمران خان وزيراعظم هجڻ باوجود هڪ رپيو به سرڪاري ناڻي مان ناهي وٺندو. فواد چوڌري چيو ته وزيراعظم ۽ اسان جا وزير عياشيون ناهن ڪندا، حڪومت جو مشن آهي ته امير ۽ غريب لاءِ ساڳيو قانون هجي، عمران خان جي جدوجهد 22 سالن تي ٻڌل آهي، حڪومت کي تباهه ٿيل معيشت ورثي ۾ ملي. وفاقي وزير چيو ته پاڪستان خطي ۾ اهم ڪردار ادا ڪري رهيو آهي، سڀ ملڪ پاڪستان ڏانهن واجهائي رهيا آهن، پاڪستان يمن ۽ سعودي عرب وچ ۾ ٽياڪڙ جو ڪردار ادا ڪري رهيو آهي. سندس چوڻ هو ته عمران خان ڪڏهن به ڊيل نه ڪندو، هن 6 مهينن ۾ پاڪستان کي طاقتور بڻائي ڇڏيو آهي، عمران خان وزيراعظم هائوس ۾ نه بني گالا ۾ رهندو آهي، خرچ پاڻ برداشت ڪندو آهي، ماضي ۾ جاتي امرا جي ڀت ٺاهڻ لاءِ ڪروڙين رپيا خرچ ڪيا ويا. فواد چوڌري چيو ته اپوزيشن جو شور ائين آهي، جيئن جيل اندر نماز هوندي آهي، جيل ۾ آذان ڏيندڙ، نماز پڙهندڙ ۽ امامت ڪندڙ سڀ مجرم آهن، ماضيءَ جي حڪومتن خزاني ۾ ڇڏيو ڇا آهي جو سبسڊي ڏيون، پ پ ۽ ن ليگ مذاق بڻائي رکيو آهي، شهباز شريف ۽ خواجه سعد رفيق منسٽر انڪليو ۾ مزا وٺي رهيا آهن. ٻئي طرف سڌ سماءُ واري وفاقي وزير فواد چوڌري واضح ڪيو ته وزيراعظم عمران خان جو پنجاب جي وڏي وزير عثمان بزدار تي مڪمل اعتماد آهي.خانگي ٽي وي جي پروگرام ۾ ڳالهائيندي فواد چوڌري جو چوڻ هو ته جيستائين عثمان بزدار تي عمران خان جو اعتماد آهي، اهو وڏو وزير رهندو. پروگرام دوران حج خرچن بابت ڳالهائيندي فواد چوڌري چيو ته گذريل سال مسلم ليگ ( ن ) جي حڪومت چونڊن کان اڳ عوام کي خوش ڪرڻ لاءِ حج تي سسبڊي ڏني، پر هاڻ حڪومت لاءِ ائين ممڪن ناهي.

1Shares

اپنا تبصرہ بھیجیں