سنڌ اسيمبلي ۾ حڪومت رمضان گهانچي تي حملي خلاف ٺهراءُ پيش ڪرڻ نه ڏنو، اپوزيشن جو هنگامو، اُلرون، ڏند چڪ

1Shares

ڪراچي  (چيف رپورٽر) سنڌ اسيمبلي ۾ پي ٽي آءِ جي ايم پي اي رمضان گهانچي جي فائرنگ ۾ زخمي ٿيڻ واري واقعي تياپوزيشن پاران سخت احتجاج، ايوان گو زرداري گو ۽ گو نيازي گو جي نعرن سان گونجندو رهيو، مخالف ڌر ۽ حڪومتي ڌر جي ميمبرن پاران هڪ ٻئي تي الرون. تفصيل موجب ڪالهه سنڌ اسيمبلي جو اجلاس صبح ساڍي 11 وڳي اسپيڪر آغا سراج دراني جي صدارت هيٺ شروع ٿيو، تلاوت ڪلام پاڪ کان بعد پي ٽي آءِ جي ايم پي اي رمضان گهانچي جي زخمي ٿيڻ تي پوائنٽ آف آرڊر تي ڳالهائيندي مخالف ڌر جي اڳواڻ فردوس شميم چيو ته ايم پي اي کي زخمي ڪيو ويو آهي، شهر ۾ امن امان جي صورتحال خراب آهي، حڪومت کي گهرجي ته شهرين کي تحفظ فراهم ڪري، جنهن تي صوبائي وزير مڪيش ڪمار چاولا خاطري ڪرائي ته ٻه جوابدار گرفتار ٿي چڪا آهن، آءِ جي سان به ڳالهايو آهي، مڪمل انصاف ڪيو ويندو، ان دوران پي ٽي آءِ ميمبر سيٽن تي اٿي بيهي رهيا ۽ احتجاج ڪندا رهيا، پي ٽي آءِ ميمبرن  احتجاج ڪندي چيو ته سوال جواب کان پهرين ٺهراءَ پيش ڪيون ٿا، ان کي ورتو وڃي، جنهن تي سرڪاري ڌر مخالفت ڪئي ته پي ٽي آءِ ميمبرن اسپيڪر جي روسٽرم آڏو پهچي احتجاج ڪيو، جنهن سبب ايوان مڇي مارڪيٽ بڻجي ويو. پي ٽي آءِ ميمبرز طرفان اسپيڪر جي ڊائيس اڳيان گو زرداري گو جا نعرا هنيا، جنهن تي سرڪاري بئنچز تي ويٺل ميمبرز به گو نيازي گو جا نعرا هنيا. حڪومتي ۽ پي ٽي آءِ ميمبرز وچ ۾ سخت جملن جي ڌي وٺ ٿي ۽ ميمبرز هڪٻئي تي الرون به ڪيون. ان دوران پ پ جي ميمبرن ۽ پي آءِ ميمبرن وچ ۾ ڳالهيون ٿيون پر ان دوران  صوبائي وزير مڪيش ڪمار چاولا ۽ پي ٽي آءِ ميمبر سعيد آفريدي وچ ۾ سخت جملن جي ڏي وٺ ٿي، ان دوران ماحول ڇڪتاڻ وارو ٿي ويو ۽ ميمبرن هڪٻئي کي ڌڪا پڻ ڏنا، ۽ الرون ڪيون، جڏهن ته پ پ جي سعيد غني، امتياز شيخ ۽ پي ٽي آءِ جي حليم عادل شيخ ۽ ٻين اڳواڻن وچ ۾ پئي جهيڙو ٽاري ڇڏيو، اسپيڪر 10 منٽن لاءِ اجلاس ملتوي ڪري ڇڏيو، وقفي دوران پي ٽي آءِ ميمبرن جو اسپيڪر ڊائيس آڏو ڌرڻو جاري رکيو ۽ نعريبازي ڪندا رهيا. اجلاس ٻيهر شروع ٿيو ته اسپيڪر سوالن جوابن جي ايجنڊا شروع ڪئي ته جي ڊي اي ايم پي اي عارف مصطفيٰ جتوئي چيو ته مان پنهنجن سوالن تان هٿ ٿو کڻان، پر اسپيڪر چيو ته سوال ايجنڊا جو حصو آهن ۽ ايوان ۾ اچي به چڪا آهن. تنهنڪري ميمبر ضرور سپيلمينٽري سوال پڇندا. جنهن بعد صوبائي وزير ناصر شاهه کان سوال پڇڻ وقت اپوزيشن ميمبر احتجاج ڪندا رهيا، جنهن بعد اسپيڪر اجلاس جي ڪارروائي سومر جي منجهند 2 وڳي تائين ملتوي ڪري ڇڏي.

1Shares

اپنا تبصرہ بھیجیں