پاڪستان جي شاندار بيٽنگ کانپوءِ برسات ڏکڻ آفريڪا لاءِ رحمت بڻجي وئي

سينچورين(اسپورٽس نيوز) سينچورين ۾ کيڏي ويندڙ ٽئين ون ڊي ميچ ۾ پاڪستان ڏکڻ آفريڪا کي ڪاميابي لاءِ 318 رنسن جو هدف ڏئي ڇڏيو آهي. سينچورين ۾ قومي ٽيم جي ڪپتان سرفراز احمد ٽاس کٽي پهريان پاڻ بيٽنگ جو فيصلو ڪيو، فخرالزمان ۽ امام الحق اننگز جيشروعات ڪئي پر فخر جي خراب ڪارڪردگي جو سلسلو جاري رهيو ۽ هو صرف 2 رنسون ٺاهڻ کانپوءِ پويلين واپس هليو ويو جنهن کانپوءِ بابر اعظم امام سان گڏجي ذميواراڻي بيٽنگ ڪندي 132 جي حصيداري قائم ڪئي، ان دوران ٻنهي بيٽسمين پنهنجون ففٽيون پوريون ڪيون جڏهن ته بابر اعظم 68 رنسن جي اننگز کيڏي ڊيل اسٽين جو شڪار بڻجي ويو. ان کانپوءِ محمد حفيظ ۽ امام الحق وچ ۾ به 84 رنسن جي حصيداري قائم ٿي، هاشم آملا 10 رنسن تي ڪيچ ڇڏي حفيظ کي موقعو ڏنو جنهن جو ڀرپور فائدو کڻندي تجربيڪار بيٽسمين ففٽي اسڪور ڪئي ۽ 52 رنسن تي ربادا جي هٿان پويلين واپس موٽي ويو، ان دوران امام الحق سستي سان پنهنجي اننگز جاري  رکي ۽ ڪيريئر جي پنجين سينچري اسڪور ڪندي 116 بالن تي 101 رنسن جي اننگز کيڏي آئوٽ ٿيو. امام الحق ون ڊي ڪرڪيٽ ۾ تيز ترين هڪ هزار رنسون ٺاهيندڙ ٻئين ڪرڪيٽر جو اعزاز به پنهنجي نالي ڪيو، اهو اعزاز هن 19 ميچن ۾ حاصل ڪيو جڏهن ته تيز ترين هڪ هزار رنيون ٺاهيندڙ پهريون ڪرڪيٽر به پاڪستاني آهي، قومي ٽيم جي اوپننگ بيٽسمين اهو ڪارنامو 18 ميچن ۾  انجام ڏنو، بابر اعظم 21 ميچن ۾ تيز ترين هڪ هزار رنسون ٺاهي ٽئين نمبر تي موجود آهي. شعيب ملڪ ۽ عماد وسيم آخري اوورن ۾ جارحاڻي راند پيش ڪندي 52 رنسن جي حصيداري قائم ڪئي، شعيب ملڪ 31 رنسون ٺاهي ربادا جو شڪار بڻيو جڏهن ته عماد وسيم 23 بالن تي 43 رنسن جي ناقابل شڪست اننگز کيڏي. ڏکڻ آفريڪا مان ڊيل اسٽين ۽ ڪاگيسو ربادا 2،2 ۽ ڊيبيو ڪندڙ هينڊرڪس هڪ وڪيٽ حاصل ڪئي. هدف جي جواب ۾ ڏکڻ آفريڪا پاران اننگز جي شروعات ڪوئنٽن ڊي ڪوڪ ۽ هاشم آملا ڪئي، پر 25 جي انفرادي اسڪور تي هاشم آملا حسن علي جي بال تي بابر اعظم هٿان ڪيچ آئوٽ ٿي ويو. ڊي ڪوڪ کي 33 جي انفرادي اسڪور تي شاداب خان شاندار ٿرو ڪري رن آئوٽ ڪيو. ڏکڻ آفريڪا 17هين اوور ۾ 2 وڪيٽن جي نقصان تي 88 رنز ٺاهيون هيون ته برسات شروع ٿي وئي، جنهن ڪجهه دير لاءِ ميچ روڪي وئي. جڏهن ته 187 جي انفرادي اسڪور تي ٻيهر برسات شروع ٿي وئي، جنهن سبب ڊڪ وٿ لوئس تحت ڏکڻ آفريڪا جي ميچ کٽڻ جا امڪان وڌي ويا.