بحريا ٽائون پاران 350 ارب رپيا ڏيڻ جي آڇ، هتي ٽماٽا نٿا وڪرو ٿين: سپريم ڪورٽ

اسلام آباد (بيورو) بحريا ٽائون پنهنجي ڪراچي جي هائوسنگ منصوبي کي قانوني دائري ۾ آڻڻ لاءِ 16 هزار ايڪڙ زمين عيوض 358 ارب رپيا ڏيڻ جي آڇ ڪئي آهي پر عدالت آڇ کي غير مناسب قرار ڏيندي بحريا ٽائون کي آڇ تي ٻيهر غور ڪرڻ جو حڪم ڏئي ڇڏيو. سپريم ڪورٽ ۾ جسٽس عظمت سعيد شيخ جي سربراهي ۾ 3 رڪني بئنچ بحريا ٽائون عملدرآمد ڪيس جي ٻڌڻي ڪئي، ان دوران نيب، ڊائريڪٽر سروي جنرل، بحريا ٽائون جو وڪيل علي ظفر ۽ ٻيون اختياريون پيش ٿيون. جسٽس عظمت سعيد بحريا ٽائون جي وڪيل کان پڇاڻو ڪيو ته توهان کي چيو هو ڏنڊ جي آڇ ڪيو، توهان نه ڪئي ته ڪيس ٻڌي ٿا وٺون، جنهن تي علي ظفر چيو ته اسان آڇ ٺاهي ڇڏي آهي، بحريا ٽائون ٽنهي منصوبن جي حوالي سان آڇ ٺاهي آهي. جسٽس عظمت سعيد چيو ته ڪراچي واري بحريا ٽائون کان شروع ڪيو، جنهن تي علي ظفر چيو ته بحريا ٽائون ڪراچي وٽ 16 هزار 8 سئو ايڪڙ زمين آهي، جنهن تي جسٽس عظمت سعيد چيو ته ڇا بحريا ٽائون ڪراچي جي حدبندي ٿي وئي؟ ان تي ڊپٽي سروي جنرل ٻڌايو ته 16 هزار 896 ايڪڙ زمين بحريا ٽائون وٽ آهي، اسان حدبندي جا نشان لڳائي ڇڏيون ٿا، 7 هزار 40 ايڪڙ نشان ده علائقي کان وڌيڪ آهي، جنهن تي جسٽس عظمت سعيد چيو ته ان ڪيس ۾ جيڪڏهن ادارن جي عدم سهڪار جي دانهن ملي ته سٺو نه ٿيندو. ٻڌڻي دوران جسٽس عظمت سعيد روينيو اختيارين کي چيو ته زمين توهان جي هئي، توهان خيال ڪرڻو هو،  روينيو ڊپارٽمينٽ ئي ته ڦرلٽ ڪرائي آهي، توهان ذميوار آهيو، بحريا ٽائون کان سرڪاري زمين واپس ورتي وڃي. هن ايڊيشنل اٽارني جنرل کي چيو ته اسان اڄوڪي فيصلي ۾ لکنداسين ته عدالت کي ڪجهه ٻڌايو ويو ۽ عدالت کانم حقيقتون لڪايون ويون. ٻڌڻي دوران عدالت نيب ۽ سروي جنرل جي نقشن ۾ فرق تي ڪاوڙ جو اظهار ڪيو. جسٽس عظمت سعيد ريمارڪس ڏنا ته انهن ماڻهن جي لانائقي جي سزا بحريا کي ملي رهي آهي، سروي جنرل خبر ناهي ڪنهن جي چوڻ تي ائين ڪيو، هاڻ بحريا ٽائون جي آڇ تي غور نٿا ڪري سگهون، بحريا ٽائون پاڻ عدالتي ڪارروائي کي خراب ڪيو. هن ريمارڪس ڏنا ته ڪمشنر کي چيو ته سرڪاري زمين جو قبضو وٺو، هي چوي ٿو اسان نٿا وٺي سگهون پڇڻو پوندو، ڪليڪٽر ۽ ڪمشنر کي ڪجهه ناهي خبر، بس گهڻو ٿي ويو، بحريا ٽائون پاڻ ان معاملي کي بند ڪري ڇڏيو آهي، نيب کي چونداسين جاچ ڪري. جسٽس عظمت سعيد ريمارڪس ڏنا ته سروي جنرل آف پاڪستان کي عدالتي توهين جا نوٽيس جاري ڪنداسين، ڊپٽي سروي جنرل کي عدالت جي توهين جو نوٽيس جاري ڪري ڇڏيون ٿا، جڏهن ته اٽارني جنرل پاڻ ان ڪيس ۾ پيش ٿيندو. ٻڌڻي دوران جسٽس فيصل عرب ملير جي ڪليڪٽر کي مخاطب ٿيندي چيو ته توهان ته چيو هو ته نقشي ۾ ظاهر زمين توهان جي قبضي هيٺ ناهي، توهان ان سرڪاري زمين کي واپس وٺو، جنهن تي ڪليڪٽر جواب ڏنو ته مان سرڪاري زمين واپس وٺي ڇڏيندس، ان تي جسٽس عظمت سعيب ريمارڪس ڏنا ته توهان ماڻهو سرڪاري زمين جي حفاظت نٿا ڪري سگهو، جيڪڏهن توهان حفاظت نه ڪندئو ته نيب کي منهن ڏيندئو. عدالت ريمارڪس ڏنا ته سرڪاري زمين جو قبضو وٺي سنڌ هاءِ ڪورٽ حوالي ڪيو، ڪليڪٽر، ڊپٽي ڪمشنر زمين جي حفاظت جا ذميوار هوندا، ان سلسلي ۾ عمل درآمد رپورٽ عدالت ۾ جمع ڪرائي وڃي. ٻڌڻي دوران ڊائريڪٽر سروي جنرل ٻڌايو ته اسان سرڪاري زمين قبضي ۾ وٺڻ جي حڪمت عملي ٺاهي هئي، جنهن تي جسٽس عظمت سعيد پڇاڻو ڪيو ته موقعي تي ڪير ويو هو، اسان کي حڪمت عملي نه ٻڌائي وڃي، حڪمت عملي ٺاهڻي آهي ته ڊفينس اسڪول آف اسٽريٽجڪ اسٽڊي وڃو. ان تي ڊائريڪٽر سروي جنرل ٻڌايو ته بحريا ٽائون جي سرڪاري زمين تي قبضو نه ڪرڻ جي دعويٰ غلط آهي، بحريا ٽائون وارا سرڪاري زمين کپائي رهيا آهن، گڏوگڏ هن سرڪاري زمين جي وڪري جي حوالي سان مارڪيٽنگ ڪمپني پرزم جو اشتهاري ڪتابچو عدالت ۾ پيش ڪيو، جنهن تي عدالت پرزم جي مالڪ کي ايندڙ ٻڌڻي تي طلب ڪيو. ٻڌڻي دوران بحريا ٽائون جي وڪيل چيو ته 16 هزار ايڪڙ زمين لاءِ 315 ارب رپيا ڏيڻ لاءِ تيار آهيون، جنهن تي جسٽس عظمت سعيد چيو توهان بنا شرمندگي زمين تي قبضو ڪيو آهي، جنهن تي وڪيل چيو ته منهنجو موڪل ته گلوٽين ۾ ڦاٿل آهي، ان مان نڪرڻ جي ڪوشش ڪري رهيو آهي، بحريا ٽائون وڌ کان وڌ 350 ارب رپيا ڏئي سگهي ٿو، ان تي جسٽس عظمت سعيد ڪاوڙ جو اظهار ڪندي چيو ته هتي ٽماٽا نٿا کپائجن، جنهن تي علي ظفر چيو ته 7 هزار 68 ايڪڙ زمين لاءِ 150 ارب رپيا ڏيڻ لاءِ تيار آهيون، جڏهن ته 9 هزار ايڪڙ لاءِ 208 ارب رپيا ڏئي سگهون ٿا. وڪيل جي جواب تي جسٽس عظمت سعيد چيو ته ٽرانسفر آف پراپرٽي ايڪٽ تحت غير قانوني زمين نٿي کپائي سگهجي، ان تي وڪيل علي ظفر چيو ته بحريا ٽائون 600 ارب رپين جو واعدو نٿو ڪري سگهي، اهو واعدو ڪنداسين جنهن تي عمل ڪري سگهون، 16 هزار ايڪڙ لاءِ 358 ارب رپيا ڏئي سگهون ٿا ۽ 8 سالن ۾ ادائيگي ڪنداسين. جسٽس عظمت سعيد چيو ته اها آڇ مناسب ناهي، بحريا ٽائون کي ٻيهر غور ڪرڻ جو موقعو ڏئي رهيا آهيون، ايندڙ ٻڌڻي تي سڀني ڌرين کي ٻڌي فيصلو ڪنداسين، جنهن کانپوءِ عدالت ڪيس جي ٻڌڻي 29 جنوري تائين ملتوي ڪري ڇڏي.