سنڌ سرڪار آءِ جي کي بي اختيار ڪرڻ واري منصوبي تي عمل شروع ڪري ڇڏيو،، پوليس ايڪٽ ۾ ترميمن لاءِ ڪميٽي قائم

9Shares

ڪراچي (چيف رپورٽر) سنڌ سرڪار آءِ جي سنڌ کي پوليس آفيسرن جي بدلين مقررين وارا حاصل اختيار واپس وٺڻ سميت پوليس ايڪٽ ۾ ترميمن لاءِصوبائي وزير امتياز شيخ جي اڳواڻي ۾ ڪميٽي قائم ڪري ڇڏي آهي جڏهن ته  وڏي وزير جي سڌسماءَ بابت صلاحڪار مرتضيٰ وهاب آءِ جي سنڌ پوليس جي اختيارن ۾ گهٽتائي جي ترديد ڪندي چيو آهي ته پوليس قانون ۾ اڄ جي زميني حقيقتن موجب اصلاح جي ضرورت آهي، 1861ع جو پوليس ايڪٽ 2019ع جي حالتن ۾ قابل عمل ناهي، پوليس قانون کي موجوده حالتن موجب احتسابي شفافيت واري عمل مان گذاري اڄوڪي زميني حقيقتن موجب بڻائڻ جي شديد ضرورت آهي. هن اهڙو اظهار ڪالهه پنهنجي دفتر ۾ پوليس اصلاحات بابت ٿيل اعليٰ سطحي اجلاس جي صدارت ڪرڻ بعد سنڌ اسيمبلي ٻاهران ميڊيا کي آگاهه ڪندي ڪيو. ان کان پهريان صوبائي وزير صلاحڪار جي صدارت هيٺ اجلاس ٿيو جنهن ۾ توانائي واري وزير امتياز احمد شيخ، معدنيات واري وزير شبير احمد بجاراڻي، آءِ جي سنڌ پوليس ڪليم امام ۽ ٻين اعليٰ عملدارن شرڪت ڪئي. اجلاس ۾ پوليس قانوني ۽ عوامي معاملن تي تفصيلي گفتگو ٿي. ان موقعي تي صوبائي وزير امتياز احمد شيخ جي سربراهي ۾ هڪ ڪميٽي جوڙي وئي جيڪا هڪ هفتي اندر پنهنجي رپورٽ پيش ڪندي تنهن بعد حتمي رپورٽ جي ڊرافٽ کي قانوني مسودي جي شڪل ۾ سنڌ اسيمبلي ڏانهن منظوري لاءِ پيش ڪيو ويندو. اجلاس بعد ميڊيا سان ڳالهائيندي بئريسٽر مرتضيٰ وهاب جو چوڻ هو ته اسان اهڙي قانونسازي ڪرڻ چاهيون ٿا جنهن ۾ پوليس قانون کي نئين سري سان ترتيب ڏنو وڃي جنهن سان پوليس به مضبوط ٿيندي ۽ پوليس جا مسئلا به جلد حل ٿيڻ جوڳا هوندا. هن چيو ته عوامي مسئلن کي حل ڪرڻ لاءِ ايف آءِ آر جي داخلا ۾ پيش ايندڙ مشڪلاتن کي حل ڪرڻ لاءِ به قانون کي آسان بڻايو پيو وڃي ۽ عوام کي سهولتون ميسر ٿينديون ان کان علاوه پوليس اهلڪار ۽ آفيسرن کي به احتسابي عمل کي منهن ڏيڻو پوندو جنهن سان شفافيت به سامهون ايندي. هن چيو ته اهڙي سٺي قدم کڻڻ تي ساراهڻ ۽ اسان جو ساٿ ڏيڻ جي به ضرورت آهي جنهن ۾ پوليس قانون ۾ اصلاحات لاءِ نئين قانونسازي ڪئي پئي وڃي جنهن ۾ پوليس ۽ عوام جي مفادن جي تحفظ کي برابري جي بنيادن تي ڪيو پيو وڃي. هن چيو ته مخالفن جو ڪم مخالفت ڪرڻ هوندو آهي پر اسان عوام جي خدمت واري فلسفي تي يقين رکون ٿا ۽ پاڪستان پيپلز پارٽي جي جمهوري حڪومت سنڌ سميت سڄي ملڪ ۾ آئين ۽ جمهوريت جي سربلندي لاءِ عوام جي خدمت ڪندي رهندي. هن هڪ سوال جي جواب ۾ چيو ته پوليس قانون ۾ ترميمن لاءِ ڪابينه هڪ ڪميٽي قائم ڪئي هئي، آءِ جي پوليس به پنهنجون پوليس ايڪٽ بابت تجويزون ڏنيون آهن، اسان جي ترجيح صوبي جي عوام کي پوليسنگ جي سلسلي ۾ بهتر قانون ڏيڻ آهي هاڻي جيڪڏهن پوليس ڪم ڪري يا نه ڪري ته شڪايتن جو ازالو ٿيندو. مرتضيٰ وهاب جو وڌيڪ چوڻ هو ته پوليس ايڪٽ ڊرافٽ لاءِ صوبائي وزير امتياز شيخ جي سربراهي ۾ سب ڪميٽي جوڙي وئي آهي، پوليس جو نئون قانون اڻٽر آهي. هن هڪ سوال جي جواب ۾ وڌيڪ چيو ته سنڌ جي بهتر مفاد ۾ هر شيءِ تي مخالفت نه ڪئي وڃي. مرتضيٰ وهاب چيو ته آءِ جي سنڌ پوليس جي اختيارن ۾ گهٽتائي جي مڪمل ترديد ڪريان ٿو، بهتر قانونسازي اسيمبلي مان منظور ڪرائي ويندي، هن مخالف ڌر کي صلاح ڏيندي چيو ته هو ذميداري جو مظاهرو ڪري پي ٽي آءِ جي وفاقي حڪومت مالي سال ۾ 90 ارب رپين کان سنڌ کي محروم رکيو صوبي کي پنهنجو مالياتي حق ڏنو وڃي پر افسوس جو سنڌ جي فنڊز تي ڪٽوتي واري عمل تي وفاقي حڪومت ڪو به ڪردار ادا نه ڪيو آهي، سنڌ جي عوام جو استحصال نه ڪيو وڃي. هن چيو ته شهزاد اڪبر ذميداري عهدي تي فائز آهي هو پنهنجي عهدي جو خيال رکي، غير قانوني ڳالهه ڪرڻ کيس نٿي جُڳائي، الزام لڳائڻ بجاءِ شاهديون سامهون آنديون وڃن. وفاقي حڪومت کي گهرجي ته سنڌ ۾ پاڻي ۽ گئس جي کوٽ واري عمل تي پنهنجو ڪردار ادا ڪري. ذريعن موجب اجلاس دوران سنڌ حڪومت جي وزيرن جو ان ڳالهه تي غور رهيو ته ٻين کاتن مان پوليس ۾ به سينئر آفيسرن جي بدلين ۽ مقررين جا اختيار بيورڪريسي کي ڏنا وڃن جنهن تحت ڊي آءِ جي جي بدلين مقررين جو اختيار چيف سيڪريٽري سنڌ جي ايس پيز جي بدلين مقررين جو اختيار صوبائي گهرو سيڪريٽري کي هئڻ گهرجي.

9Shares

اپنا تبصرہ بھیجیں