پاڪستان ۽ ترڪي وچ ۾ دهشتگردي جي خاتمي سميت فوجي، واپاري ۽ ٻين شعبن ۾ سهڪار وڌائڻ تي اتفاق

0Shares

انقره(م ڊ) پاڪستان ۽ ترڪي وچ ۾ دهشتگردي جي خاتمي سميت فوجي، واپاري ۽ ٻين شعبن ۾ سهڪار وڌائڻ تي اتفاق. تفصيل موجب وزير اعظم عمران خان ترڪ صدر رجب طيب اردوان سان ملاقات ڪئي جنهن ۾ ٻطرفن لاڳاپن تي ڳالهيون ڪيون ويون. پاڪستان ۽ ترڪي جي سربراهن حڪومت جي وچ ۾ انقره ۾ ٿيل ملاقات ۾ علائقائي ۽ عالمي معاملن تي به تفصيلي ڳالهيون ڪيون. وزير اعظم عمران خان ۽ ترڪ صدر رجب طيب اردوان سان گڏ جمعي جي نماز ادا ڪئي. ٻئي پاسي پاسي انقره ۾ ترڪ صدر وزير اعظم عمران خان سان گڏ گڏيل پريس ڪانفرنس ڪندي چيو ته وزير اعظم عمران خان ۽ سندس وفد جو انقره ۾ ڀليڪار ڪيون ٿا. پاڪستان ۽ ترڪي جي وچ ۾ ٻطرفا لاڳاپا آهن جيڪي مضبوط ٿي رهيا آهن. هن چيو ته ترڪ فائونڊيشن بابت سپريم ڪورٽ جي فيصلي جي به آجيان ڪيون ٿا. ترڪ صدر جو چوڻ هو ته عمران خان پاڪستان ۾ تبديلي جي لاءِ گهڻي جدوجهد ڪئي. هن چيو ته عمران خان پاڪستان ۾ تبديلي لاءِ وڏي جدوجهد ڪئي، هو ڪرڪيٽر هو ته مان فٽبالر هئس، ٻنهي ملڪن جا لاڳاپا مستحڪم ٿي رهيا آهن. ان موقعي تي وزير اعظم عمران خان چيو ته پاڪستان ۾ ايندڙ 5 سالن ۾ 50 لک گهر تعمير ڪرڻ جو منصوبو آهي، ان ڪري هائوسنگ شعبي ۾ ترڪ ڪمپنين جي تجربن مان فائدو کڻڻ چاهيون ٿا. هن وڌيڪ چيو ته پاڪستان ۾ مديني جهڙو نظام آڻڻ چاهيون ٿا. عمران خان چيو ته افغانستان، پاڪستان ۽ ترڪي جي سربراهن جو اجلاس استنبول ۾ ٿيندو، اسان افغانستان ۾ امن جا خواهشمند آهيون، خطي ۾ امن جي لاءِ افغانستان ۾ امن ضروري آهي. وزير اعظم هڪ ڀيرو ٻيهر ڳالهين جي خواهش جو اظهار ڪندي چيو ته خطي ۾ امن جي لاءِ ڀارت سان به ڳالهين جا خواهشمند آهيون، ڪشمير مسئلو پاڪ-ڀارت وچ ۾ بنيادي تڪرار آهي، خطي ۾ امن جا خواهشمند آهيون. ان کان سواءِ پاڪستان ۽ ترڪي جي وچ ۾ انقره ۾ وفد جي سطح تي به ڳالهيون ٿيون. پاڪستاني وفد جي قيادت پرڏيهي وزير شاهه محمود قريشي ڪئي جڏهن ته ترڪ وفد جي قيادت پرڏيهي وزير ميولوت چاوش اولو ڪئي. ڳالهين ۾ پاڪستان ۽ ترڪي جي وچ ۾ ٻطرفن لاڳاپن ۽ واپار تي ڳالهيون ڪيون ويون. ان کان سواءِ ملڪن جي وفدن جي وچ ۾ سيڙپڪاري کي هٿي سميت ٻين اهم علائقائي ۽ عالمي معاملن تي ڳالهيون ڪيون ويون. پاڪستان ۽ ترڪي افغان مسئلي جي جلد پراُمن حل جي لاءِ گڏيل ڪاوشون جاري رکڻ جي عزم جو اظهار ڪيو. ترڪ پرڏيهي وزير جو چوڻ هو ته افغانستان ۾ قيام امن جي لاءِ پاڪستان جو ڪردار مرڪزي اهميت تي ٻڌل آهي. جاري ڪيل گڏيل پڌرنامي ۾ چيو ويو ته پاڪستان ۽ ترڪي وچ ۾ وفدن جي سطح تي ڳالهيون پڻ ٿيون، دهشتگردي جي خاتمي، افغانستان ۾ امن جي قيام، واپار، دفاع ۽ ٻين شعبن ۾ گڏيل سهڪار تي اتفاق ٿيو.

0Shares

اپنا تبصرہ بھیجیں