18هين ترميم تي رضا رباني جي فل ڪورٽ جوڙڻ واري درخواست رد، ڇا وفاقي سرڪار رڳو گرانٽ ڏئي، باقي ڪردار صوبن جو هجي: سپريم ڪورٽ

0Shares

اسلام آباد(بيورو) سپريم ڪورٽ 18هين ترميم ۾ صوبائي اختيارن بابت ڪيس جي ٻڌڻي دوران سينيٽر رضا رباني جي ان معاملي تي فل ڪورٽ جوڙڻ واري اپيل رد ڪري ڇڏي. ٻڌڻي جي شروعات تي جسٽس اعجاز الاحسن چيو ته عدالت ارڙهين ترميم جو جائزو نه وٺي رهي آهي پر عدالت سامهون معاملو ارڙهين ترميم تحت ڪجهه اسپتالون ختم ڪرڻ جو آهي. سينيٽر رضا رباني  عدالت ۾ پيش ٿيو ۽ دليل ڏيندي چيو ته عدالت گذريل ڏينهن مختلف سوال اٿاريا، مناسب هوندو ته معاملي تي فل ڪورٽ جوڙي وڃي. عدالت سينيٽر رضا رباني جي معاملي تي فل ڪورٽ جوڙڻ جي درخواست رد ڪري ڇڏي، جنهن کانپوءِ رضا رباني چيو ته عدالت جي آبزرويشن جو احترام ڪريان ٿو، ڪيس ۾ پنهنجا دليل جاري رکندس، ارڙهين ترميم کانپوءِ ڪليئرٽي لاءِ 19 هين ترميم آندي وئي آهي. چيف جسٽس چيو ته جيڪڏهن صوبا صحت جي شعبي جي بهتري لاءِ ڪوشش نه ڪن ته ڇا وفاقي سرڪار مدد لاءِ نه اچي، ڇا صوبي کي صحت جي شعبي جو مڪمل اختيار ڏنو وڃي ۽ ڇا وفاقي حڪومت ماڻهن کي سهولتون ڏيڻ ۾ ڪو ڪردار ادا نه ٿي ڪري سگهي؟ سينيٽر رضا رباني چيو ته ٿي سگهي ٿو ته منهنجي تشريح غلط هجي، آئين جي منشا آهي ته صحت جو شعبو صوبا ڏسندا، جيڪڏهن اسپتال صوبن کي نه ملندي ته آئين جو آرٽيڪل اهميت وڃائي ويهندو. چيف جسٽس چيو ته 18 هين ترميم کي عدالت آئيني ۽ درست قرار ڏنو آهي، هي ڪو ليگل سياسي اشو ناهي، اسان وٽ ننڍي وڏي صوبي جو سوال ئي ناهي، ننڍن وڏن صوبن جو فرق پيدا نه ڪرڻ گهرجي، عدالت سامهون سوال قانوني آهي. چيف جسٽس رمارڪس ڏيندي چيو ته عدالت کي رڳو قانوني نقطي جي تشريح ڪرڻي آهي، رضا رباني صاحب توهان جي ڊگهي سياسي جدوجهد آهي، سياسي جدوجهد ڪندڙ شخصيتن کي ننڍي وڏي صوبي جو فرق نه ڪرڻ گهرجي. چيف جسٽس رضا رباني سان مخاطب ٿيندي چيو ته توهان چاهيو ٿا ته غريبن کي صوبائي حڪومت جي رحم ۽ ڪرم تي ڇڏيو وڃي، توهان موجب وفاقي حڪومت اسپتال ٺاهي صوبي حوالي ڪري ڇڏي ۽ توهان چاهيو ٿا ته وفاق رڳو گرانٽ ڏي باقي ڪردار صوبن جو هجي. ان تي سينيٽر رضا رباني چيو ته 1935ع جي آئين ۾ به صحت وارو شعبو صوبن وٽ هو، چيف جسٽس چيو ته هي قانون متحده هند ۾ انگريزن ٺاهيو، پاڪستان جدوجهد کانپوءِ حاصل ٿيو، اسان کي پنهنجي تاريخ پنهنجي آئين کان شروع ڪرڻ گهرجي. سينيٽر رضا رباني دليل ڏيندي چيو ته وفاقي حڪومت جي صحت واري شعبي ۾ ڪم ڪرڻ سان صوبن ۽ وفاق ۾ تڪرار پيدا ٿيندو، ان تي جسٽس اعجاز الاحسن چيو ته وفاقي حڪومت صوبائي ريگوليشن کي فالو ڪندي ته صوبائي تڪرار پيدا نه ٿيندو. سينيٽر رضا رباني چيو ته رياست ۾ وفاقي، صوبائي ۽ لوڪل گورنمينٽ حڪومتون شامل آهن، وفاقي حڪومت صوبي ۾ اسپتال ٺاهي سگهي ٿي پر هلائي نه ٿي سگهي، جيڪڏهن وفاقي حڪومت صوبي ۾ اسپتال ٺاهي هلائيندي ته آرٽيڪل 137 پنهنجي اهميت وڃائي ويهندو. چيف جسٽس چيو ته آرٽيڪل 137 پنهنجي اهميت ڪيئن وڃائي ويهندو، رضا رباني صاحب ايڏو وڏو بيان نه ڏيو.

0Shares

اپنا تبصرہ بھیجیں