وزيراعظم جي ڀيڻ عليمه خان 4.29 ملين رپيا جمع نه ڪرايا آهن: ايف بي آر

اسلام آباد(بيورو) سپريم ڪورٽ پاڪستانين جي پرڏيهه ۾ ملڪيت ۽ اڪائونٽس ڪيس ۾ فيڊرل بورڊ آف روينيو (ايف بي آر ۽ فيڊرل انويسٽيگيشن ايجنسي (ايف آءِ اي) کان 14 جنوري تائين رپورٽ طلب ڪري ورتي آهي. رپورٽن مطابق سپريم ڪورٽ جي  چيف جسٽس ميان ثاقب نثار جي سربراهي ۾ سپريم ڪورٽ جي بئنچ پاڪستانين جي پرڏيهه ۾ اڪائونٽن ۽ ملڪيتن واري معاملي جي ٻڌڻي ڪئي. ٻڌڻي جي شروعات تي ايف بي آر جي اختيارين طرفان سپريم ڪورٽ کي آگاهه ڪيو ويو ته وزيراعظم جي ڀيڻ عليما خان 4 ڏهائي 29 ملين رپيا جمع نه ڪرايا. چيف جسٽس پڇاڻو ڪيو ته اسان عليما خان کي ڪيترو وقت ڏنو هو؟ ان تي ايف بي آر جي ٽيڪس ميمبر ٻڌايو ته عليما خان 13 جنوري تائين پئسا جمع ڪرائي سگهي ٿي. ٻڌڻي دوران جسٽس اعجاز الاحسن چيو ته ايف آءِ اي کي هر مهيني رپورٽ فائل ڪرڻي هئي، 21 ماڊل ڪيسن تي ڪهڙي اڳڀرائي ٿي آهي؟ ايف بي آر جي اختيارين ٻڌايو ته سمورن ڪيسن تي ڪارروائي ڪري رهيا آهيون، 13 ڊسمبر کانپوءِ 167 ملين ادا ڪيا ويا، جڏهن ته 140 ملين مختلف ماڻهن کي ادا ڪرڻا آهن. چيف جسٽس تاثر ڏنو ته دبئي جي ملڪيتن تي 3 هزار ارب رپيا ملي سگهن ٿا. ايف بي آر چيئرمين ٻڌايو ته دبئي ملڪيتن تي سڄي ملڪ ۾ آفيسون قائم ڪيون ويون آهن ۽ 775 ماڻهن دبئي جي ملڪيتن بابت بيان حلفي ڏئي ڇڏيا آهن. ايف بي آر چيئرمين ٻڌايو ته 60 ڪيس اهڙا آهن جن ۾ ملڪيتون وڌيڪ آهن، اهڙن ڪيسن ۾ وڌيڪ روينيو ملڻ جو امڪان آهي ۽ کين اوليتي بنيادن تي ڏسنداسين. هن چيو ته 13 جنوري تي عدالت کي تفصيلي رپورٽ جمع ڪرائي ويندي. ان تي چيف جسٽس چيو ته هي ڪم جيترو جلدي ٿيندو ملڪ مضبوط ٿيندو. جسٽس ثاقب نثار پڇاڻو ڪيو ته ڇا ايف بي آر جنهن اسپيڊ سان ڪم ڪري رهي آهي، هي ڪم ڪيستائين مڪمل ٿيندو؟  ايف بي آر چيئرمين ٻڌايو ته انشاءَ الله متحرڪ انداز سان ڪيسن کي هلايو ويندو.  چيف جسٽس ثاقب نثار رمارڪس ڏيندي چيو ته اسان ايف بي آر تي ذميواري وجهي رهيا آهيون، خدا جو واسطو آهي ته ملڪ جو پئسو ناڻي ۾ آڻڻ لاءِ مدد ڪئي وڃي.