اسٽيبلشمينٽ ملڪ لاءِ ڪم ڪندڙن سان سٺو سلوڪ ناهي ڪيو، ڪنهن کان نه ڊڄنداسين: آصف زرداري

0Shares

ڪشمور (ن هه) اڳوڻي صدر آصف علي زرداري چيو آهي ته اسان جي تاريخ ۾ جڏهن به ڪنهن ملڪ ۽ ملڪي ترقي لاءِ ڪجهه ڪيو آهي ته اسٽيبلشمينٽ ان سان سٺو سلوڪ ناهي ڪيو. ڪشمور ۾ پيپلز پارٽي جي ڪارڪنن کي خطاب ڪندي آصف زرداري چيو ته ٻولي منهنجي مٺي آهي پر اسلام آباد ۾ ويٺل گونگن ۽ ٻوڙن سان مخاطب ٿيڻ لاءِ اردو ۾ ڳالهائيندو آهيان. اڳوڻي صدر چيو ته اسان جي تاريخ ۾ ڪنهن به ملڪ ۽ ملڪي ترقي لاءِ ڪم ڪيو آهي ته اسٽيبلشمينٽ ان سان سٺو سلوڪ ناهي ڪيو پر اسان کي ان سان فرق نٿو پوي، اسان ان کان نٿا ڊڄون. آصف زرداري چيو ته گونگا ۽ ٻوڙا نٿا سمجهن، اهي اسان کي جيترو به ڪپيندا ۽ ماريندا پر اسان اڳيان وڌنداسين، هنن ڀٽو کي شهيد ڪيو، ان باوجود بيبي کي روڪي نه سگهيا، ٻه ڀيرا بيبي جي حڪومت ڪيرائي وئي، منهنجي حڪومت ڪيرائي نه سگهيا، مون 5 سال پورا ڪري ڏيکاريا، پاڪستان لاءِ ڪم ڪيو، اسان گڏيل طور تي بجيٽ صوبن ۾ ورهائي، جنهن سان سمورن صوبن کي فائدو ٿيو، پنهنجي دور ۾ 5 پل ٺاهيا ۽ هاڻي ڇهين ٺاهينداسين، پر اتي جيڪي ويٺل آهن انهن کي اها ڳالهه سمجهه ۾ نٿي اچي. هن چيو ته گئس فيلڊون منهنجون ناهن، هڪ ڏينهن ايندو جڏهن پنهنجي ڪمپني ٺاهيندي ۽ پنهنجي گئس ڪڍندي، جهڙي ريت اسان ڪوئلو ڪڍيو ۽ ان ۾ عوام کي پارٽنر شپ ڏني، ان ۾ منهنجو ڪو حصو ناهي، اهو ڪاروبار اوهان جو آهي، اسان جو نه، توهان هر شيءَ ۾ ٽنگ اڙايو ٿا، اسان رازدار آهيون ۽ پنهنجي حال تي خوش رهون ٿا. هن چيو ته هي اسان کي پڪڙي ويٺا آهن ته اسان ٻاهر نه ٿا وڃي سگهون، مون ته ضمانت وقت پنهنجو پاسپورٽ جمع ڪرائي ڇڏيو هو، منهنجو نالو اي سي ايل ۾ وجهڻ جي ضرورت نه هئي. آصف زرداري چيو ته توکي بينڊ وڄائڻو آهي ۽ گيت ڳائڻو آهي ته ڪريو، ڏسون ٿا، هي راڳ تڏهن شروع ڪيو ويو جڏهن چونڊ ٿي رهي هئي پر ان سان منهنجي ووٽرن جا حوصلا گهٽ نه ٿيا، انهن کي منهنجي نيت جي خبر آهي، مون کي ڳڙهي خدا بخش ڀٽو ۾ دفن ٿيڻو آهي، ڀٽو ۽ بيبي کي حساب ڏيڻو آهي، اسان پنهنجي ڌرتي ۽ عوام خاطر وڙهي رهيا آهيون. هن چيو ته توهان سياسي ادارن کي ختم ڪرڻ ۾ لڳا پيا آهيو ته ڇا سمجهون، جيڪڏهن توهان وٽ عقل ناهي ته ڇا ڪريان، منهنجي ٻڌڻ ۽ سمجهڻ لاءِ به تيار ناهيو، اسان ته اڳيان به ڏسون ٿا ته پوئتي به، اسان هر قوم جو مزاج ڄاڻون ٿا ته ڪنهن سان ڪهڙي ريت هلڻ گهرجي، اسان ڌرتي جا پٽ آهيون، توهان ڪڏهن ڪراچي جون ڇوليون ناهن ڏٺيون. جلسي کي خطاب ڪندي سنڌ جي وڏي وزير مراد علي شاهه چيو ته مخالف ڪابه ساز ش ڪن پر عوام ناڪام بڻائيندو، سنڌ جي ماڻهن جي اڳ کان وڌيڪ خدمت ڪنداسين.

0Shares

اپنا تبصرہ بھیجیں