آمريڪا ۽ طالبان وچ ۾ امن ڳالهيون جاري رکڻ تي اتفاق، افغانستان ۾ امن جي بحالي لاءِ مدد ڪنداسين: عمران خان

0Shares

 ابوظهبي(م ڊ) پاڪستان جي سهڪار سان گڏيل عرب امارتن جي گاڌي واري هنڌ ابوظهبي ۾ افغان امن ڳالهيون ٻئي ڏينهن به جاري رهيون، جنهن ۾ طالبان سميت ڌرين ڳالهين وارو عمل جاريرکڻ تي اتفاق ڪيو. ذريعن موجب ذلمي خليل زاد ڳالهين جي اڳڀرائي تي افغان عملدارن کي آگاهه ڪري ڇڏيو. ابوظهبي ۾ جاري افغان امن ڳالهين ۾ ڌرين ڳالهين جو عمل جاري رکڻ تي اتفاق ڪيو. ذريعن موجب طالبان پنهنجي شوريٰ سان ڳالهين بعد ٻيهر زلمي خليل زاد سان ملاقات جو مشورو ڏنو آهي ڳالهين ۾ آمريڪي ۽ نيٽو فورسز جي افغانستان ۾ مرحليوار واپسي جا معاملا به غور هيٺ آيا، افغانستان ۾ حڪومتي نظام ۽ سيڪيورٽي معاملن تي به ڳالهيون ڪيون ويون افغان پرڏيهي وزارت چيو آهي ته آمريڪا ۽ طالبان وچ ۾ ڳالهيون ۽ افغانستان امن عمل ۾ پاڪستان جو عملي قدم آهي پاڪستان جو سهڪار فيصلي واري اهميت رکي ٿو. اسلام آباد (بيورو+م ڊ) وزيراعظم عمران خان جو چوڻ آهي ته پاڪستان، طالبان ۽ آمريڪا وچ ۾ ابوظهبي ۾ ڳالهين ۾ مدد ڪئي ۽ دعا آهي ته ڳالهين جي نتيجي ۾ افغانستان ۾ امن قائم ٿئي. وزيراعظم عمران خان سماجي رابطن واري ويب سائيٽ ٽوئيٽر تي جاري ڪيل بيان ۾ چيو ته پاڪستان امن عمل اڳتي وڌائڻ لاءِ هر ممڪن مدد ڪندو رهندو، دعا آهي ته ڳالهين ذريعي افغان عوام جون ٽن ڏهاڪن کان جاري مشڪلاتون ختم ٿين. ياد رهي ته  پاڪستان جي مدد سان گڏيل عرب رياستن جي گادي واري شهر ابوظهبي ڪالهه افغان امن ڳالهيون ٿيون جنهن ۾ طالبان سميت ڌرين ڳالهين جو عمل جاري رکڻ تي اتفاق ڪيو. ذريعن موجب ڳالهين ۾ شريڪ طالبان نمائندا پنهنجي شوريٰ سان ڳالهيون ڪندا ڳالهه ٻولهه کانپوءِ ٻيهر آمريڪي نمائندي زلمي خليل زاد سان ملاقات ڪندا. ڳالهين ۾ آمريڪا ۽ افغان طالبان کانسواءِ اماراتي ۽ سعودي عرب جي اعليٰ عملدارن پڻ حصو ورتو هو. ٻئي طرف پرڏيهي وزير شاهه محمود قريشي افغانستان ۾ امن ۽ استحڪام لاءِ پاڪستان جي عزم ۽ ڪوششن بابت عالمي حمايت جي آجيان ڪئي آهي ۽ ان عمل جي واکاڻ ڪندي چيو ته پاڪستان هميشه افغانستان ۾ امن قائم ڪرڻ لاءِ ڪوششون ڪيون آهن ۽ اهي ڪوششون هميشه جاري رهنديون.  پنهنجي ٽوئيٽ پيغام ۾ پرڏيهي وزير افغانستان ۾ امن ۽ استحڪام قائم ڪرڻ لاءِ پاڪستان جي ڪوششن ۽ عزم جي حوالي سان عالمي اعتراف جي آجيان ڪندي ان جي واکاڻ ڪئي آهي. هن چيو ته پاڪستان هميشه افغانستان ۾ امن قائم ڪرڻ لاءِ ڪوششون ڪيون آهن ۽ خوشحال افغانستان جي تعمير ۽ پر امن پاڙيسري لاءِ ڪوششون جاري رهنديون.

0Shares

اپنا تبصرہ بھیجیں