آبادگارن پاران ڪمند جو امدادي اگهه نه ملڻ خلاف ڪراچي ۾ احتجاج، پوليس سنڌ اسيمبلي وڃڻ نه ڏنو، حڪومت سان ڳالهيون ڪامياب

ڪراچي (چيف رپورٽر) سنڌ ايگريڪلچر ريسرچ ڪائونسل پاران صوبائي حڪومت پاران ڪمند جو مقرر ڪيل سرڪاري اگهه 182 رپيا نه ملڻ ۽ سنڌ ۾ شگر ملز نه هلڻ خلاف ڪراچي ۾ احتجاجي ريلي، پوليس سنڌ اسيمبلي وڃڻ کان روڪي ورتو، صوبائي وزير اسماعيل راهو ۽ سيد ناصر شاهه پاران ڳالهيون، خاطري کانپوءِ احتجاج ختم، صوبائي وزيرن جو چوڻ آهي ته پارٽي چيئرمين بلاول ڀٽو زرداري آبادگارن جا مسئلا ترجيحي بنياد تي حل ڪرڻ جي هدايت ڪئي، آبادگارن اڳواڻن چيو ته حڪومت هفتي ۾ مسئلا حل ڪرڻ جو چيو آهي. تفصيل موجب ڪالهه سنڌ ۾ ڪمند جي سرڪاري اگهه 182 رپيا تي عمل نه ٿيڻ خلاف سنڌ ايگريڪلچر ريسرچ ڪائونسل پاران حيدرآباد مان نڪتل قافلو علي پلھه، جمال محمد کهڙو ۽ هارون ميمڻ جي اڳواڻي ۾ موٽر وي تي پوليس جي ڪجهه دير روڪڻ کانپوءِ پرامن احتجاج جي خاطري کانپوءِ گورنر هائوس ويجهو ڦوهارا چوڪ وٽ پهتو ته پوليس ان کي اتي ئي روڪي ورتو ۽ سنڌ اسيمبلي وڃڻ نه ڏنو، پوليس پاران ڪنهن به صورتحال کي منهن ڏيڻ لاءِ واٽر ڪين گهرايا ويا جڏهن ته رستا بند هئڻ سبب آبادگار واپس ڪراچي پريس ڪلب پهتا. آبادگار اڳواڻن چيو ته شگر ملز 15 آڪٽوبر کان هلائڻ گهرجن پر هتي دير سان شگر ملون هلائي آبادگارن کي نقصان پهچايو وڃي ٿو، علي پلهه چيو ته پاسما وارا ڪمند جو اگهه 182 روپيا في مڻ ڏيڻ لاءِ تيار ناهن، جيستائين ڪمند جو اگهه 182 ڏئي شگرملون نه هلايون وينديون، تيستائين سندن احتجاج جو سلسلو جاري رهندو. بعد ۾ زراعت کاتي جي صوبائي وزير محمد اسماعيل راهو معاملي جو نوٽيس وٺندي آبادگارن کي ڳاليهن لاءِ پنهنجي آفيس سڏائي ورتو، ڳالهين ۾ صوبائي وزير سيد ناصر شاهه به شريڪ ٿيو، آبادگارن طرفان ايڊوڪيٽ علي پلھ، ذوالفقار شاھ ۽ ٻيا شريڪ ٿيا، هنن صوبائي وزيرن سان ڳالهين ۾ پنهنجا مسئلا پيش ڪيا، جنهن تي آبادگارن جا سمورا مسئلا حل ڪرائڻ جي خاطري ڪرائڻ تي آبادگارن احتجاج ختم ڪرڻ جو اعلان ڪيو ۽ صوبائي وزيرن سان گڏيل پريس ڪانفرنس ڪئي، ان دوران زراعت واري وزير اسماعيل راهو چيو ته آبادگارن کي ڪمند جي اگھ تي عمل ڪرائڻ ۽ شگر ملز ۾ ڪريشنگ شروع ڪرڻ جي خاطري ڪرائي آهي. هن چيو ته 24 شگرملز ڪريشنگ شروع ڪئي آھي. 8 شگرملن چمنيون ٻاريون آھن، چار خراب پيون آھن. اسان شگر ملز کي پابند ڪنداسين ته اهي حڪومت جي اعلانيل اگهه تي عمل ڪن. صوبائي وزيرن چيو ته اسان پاسما ۽ آبادگارن کي ويهاري اگهه مقرر ڪيو هو. پر پاسما ڪورٽ هلي وئي آھي، ان تي اڄ عدالت ۾ ٻڌڻي آھي، زراعت کاتو آبادگارن سان گڏ آھي اسان آبادگارن لاءِ ئي ويٺا آھيون، هر ممڪن ڪوشش ڪري فيصلن تي عمل ڪرايو ويندو. صوبائي وزير ناصر شاھ چيو ته پنجاب ۾ به شگرملون آھن اتي نه پيون هلن اتي به اومني گروپ آھي، اومني گروپ جا اڪائونٽ بند پيا آھن، مسئلا ضرور آھن پر ڪمند جو مقرر ڪيل اگهه ئي ڏنو ويندو، انور مجيد جي خلاف اجائي واويلا پئي ڪئي وڃي. ان جي طبيعت خراب آھي. ڊاڪٽرن لکي ڏنو آھي پو۽ به واويلا ڪئي پئي وڃي. هن چيو ته آبادگارن جو به مطالبو آھي ته اومني گروپ جا اڪائونٽ کوليا وڃن ڇو ته ان جو نقصان آبادگارن کي ئي ٿي رهيو آھي. اسان کي آبادگارن جو قدر آھي، اسان آبادگارن سان گڏ آھيون، هنن جو هر مسئلو حل ڪيو ويندو.  اومني گروپ جي اڪائونٽ کي مني لانڊرنگ ۽ ٻئي اڪائونٽ کي ٽرينڊ اڪائونٽ چيو وڃي ٿو اهو سڀ سياسي ٽرائيل ڪيو پيو وڃي، انهن ڳالهين ۾ ڪا صداقت ناهي. ان موقعي تي آبادگار اڳواڻ علي پلهھ احتجاج ختم ڪرڻ جو اعلان ڪندي چيو ته حڪومت طرفان خاطري ڪرائي وئي آهي ته سڀ مسئلا حل ڪيا ويندا، آبادگارن خلاف دهشتگردي جا ڪيس داخل نه ڪيا وڃن، اسان کي هڪ هفتي اندر مسئلا حل ڪرڻ جو يقين ڏياريو ويو آهي.