وقت کان اڳ چونڊون ڪرائي حڪمرانن مان عوام جي جان ڇڏائي ويندي، گرفتاري کان ڊڄڻ وارا ناهيون: آصف زرداري

0Shares

ٽنڊو الهيار (رپورٽ: اشرف جروار) اڳوڻي صدر ۽ پ پ جي ڪو چيئرمين آصف زرداري چيو آهي ته وقت کان اڳ چونڊون ڪرائي پ پ جي حڪومت ٺاهينداسين ۽ اها ئي حڪومت عوام جا ڪم ڪندي ۽ حق ڏياريندي، هي انڌن جي حڪومت آهي جن کي سوچ ويچار نه آهي، صوبا مضبوط ٿيندا ته پاڪستان مضبوط ٿيندو، اسلام آباد مضبوط ٿيڻ سان ملڪ مضبوط نه ٿيندو، کين تڪليف 18 هين ترميم مان آهي ۽ دٻاءُ مون مٿان وجهي رهيا آهن، هو اڪيلي سر مڃي ويا ته انهن جي پارٽي ۽ ٻيا صوبا نه مڃيندا، ڏسون ٿا ته ميچ جو ڇا ٿو ٿئي، ڪير ڪاڏي ٿو وڃي، حڪومت پڪڙ ڌڪڙ ڇڏي ته ڪو ڪم ٿئي، کيس غلطي فهمي آهي ته اسان کي خوف آهي، جيل اسان جو ٻيو گهر آهي، گرفتاري سان ڇا ٿيندو، پ پ جي خلاف ڪارروائي ٿي آهي ته اها اڃا وڌيڪ مضبوط ٿيندي آهي، سياست، سوچي سمجهي ڪئي ويندي آهي، مان کين انڊر 16 چوان ٿو، کين کيڏڻ اچي ئي نٿو، حڪومت جو ڪم اي پي ايس جي جوابدارن کي ڳولي سزا ڏيڻ آهي، اهڙن خيالن جو اظهار هن آچر تي ٽنڊو الهيار ۽ حيدرآباد ۾ جلسي کي خطاب ۽ ميديا سان ڳالهائيندي ڪيو، هن چيو ته حڪومت مان جلد جان ڇڏائي ۽ کيس گهر موڪلي ملڪ کي ٺاهينداسين ۽ وقت کان اڳ چونڊون ڪرائينداسين ۽ پ پ حڪومت ٺاهيندي، پي ٽي آءِ حڪومت کي نه گهرڻ اچي ٿو نه ڏيکارڻ اچي ٿو، هي رڳو وٺڻ وارا آهن جنهن کي اوچتو طاقت ملي ويندي آهي ان جو دماغ خراب ٿي ويندو آهي، ماڻهن کان شڪايت آهي ته ڇو ڪٽ پتلي حڪومت آڻيو ٿا، توهان ايم ڪيو ايم جي باني کي بڻايو، اڄ هو ڪنهن ٻئي جو بڻجي چڪو، هن چيو ته حڪومت ماڻهن کان روزگار کسي رهي آهي، ڪراچي جي ايمپريس مارڪيٽ کي ٽوڙيو ويو، اها مارڪيٽ 50 سال پراڻي آهي، روزگار ڏيڻ بدران روزگار کسيو پيو وڃي، حد دخليون هٽائڻ کان اڳ نوٽيس ڏيڻ گهرجي ها، ملڪ جي موجوده حالتن تي ڳڻتي آهي، ڪراچي ملڪي معيشت جو 63 سيڪڙو ڏئي ٿو، واپس ڇا ٿو ملي، اسان رڳو پنهنجو حصو گهري رهيا آهيون، ڏنڊي جي زور تي ٽيڪس نٿي وٺي سگهجي، هن چيو ته اسان نٿا چاهيون ته ادارا ڪمزور ٿين، ڇو ته ائين ٿيو ته هڪ ٻي طاقت بيٺي آهي جيڪا جارحاڻي ۽ جنوني سوچ جي مالڪ آهي، ان ڪري اسان حڪومت کي گنجائش ڏيون ٿا پر ان کي غلط فهمي آهي ته اسان ان کان ڊڄون ٿا ته يا ان کان اقتدار کسي وٺنداسين. اسان رڳو غير جانبداري چاهيون ٿا، اختيار ۽ اقتدار اسان پاڻ وٺي وٺنداسين، هن چيو ته حڪومت تڏهن مضبوط ٿيندي جڏهن صوبا گڏ هوندا، توهان چئو ٿا ته هڪ سئو ڏينهن گهٽ آهن، اسان هڪ سئو ڏينهن ۾ پرويز مشرف کي ڪڍيو هو، اسان هڪ سئو ڏينهن ۾ گهڻا ڪم ڪيا ۽ پنهنجي دور حڪومت ۾ هر مسئلي تي ڪم ڪيو، وقت کان اڳ چونڊن جو اشارو ملي رهيو آهي، هن چيو ته بلوچستان جو حصو گهٽ نٿو ٿي سگهي، اتي تمام گهڻيون ڏکيائيون آهن، پ پ هر مارشل لا سان جنگ جوٽي آهي، ڀٽو ايوب خان خلاف آواز اٿاريو ته ايوب خان پنهنجي دور ۾ بنيادي جمهوريت جو ڊرامو اٿاريو، هن چيو ته ملڪ ۾ جڏهن به عوام جو حق مجروح ڪيو ويو ته اسان آواز اٿاريو، مون مٿان 18 هين ترميم جي حوالي سان دٻاءُ وڌو پيو وڃي، جيڪڏهن مان راضي به ٿيان ته پارٽي، سنڌ، ڪي پي ڪي ۽ پنجاب نه مڃيندا، آصف زرداري چيو ته 18 هين ترميم ۾ صوبن کي ڪجهه وڌيڪ حصو مليو آهي پر هاڻ به سنڌ ۽ بلوچستان پورو نه ڏنو ويو آهي، 3 وڏا وزير حڪومت جا پنهنجا ويهاريل آهن، اهي ڳالهائين نٿا، تڪليف سڀني کي آهي، هن چيو ته جڏهن به ڪو سياسي ٻوٽو پوکي ٿو ته ان کي ڪٽي هٿرادو ٻوٽو لڳايو وڃي ٿو، هن چيو ته چونڊون شفاف ٿين ها ته عمران خان ڪڏهن به وزيراعظم نه ٿئي ها، کيس ووٽ نه مليو آهي تنهنڪري کيس عوام جي پرواهه نه آهي، هي چوي ٿو ته ڊالر جي خبر نه آهي، ڊالر جڏهن مٿي وڃي ٿو ته قرض وڌي وڃي ٿو، هن چيو ته پ پ نٿي چاهي ته ادارا ڪمزور ٿين، آصف زرداري چيو ته کيس وقت کان اڳ چونڊن جو اشارو مليو آهي تنهن تي اڳوڻي صدر کان سوال ڪيو ويو ته ايندڙ اليڪشن ڪڏهن ٿيندي، آصف زرداري جواب ڏنو ته انشاالله جلد ٿيندي، آصف زرداري آرمي پبلڪ اسڪول پشاور جي شهيدن کي ڀيٽا پيش ڪندي چيو ته نيشنل ايڪشن جي ناڪامي شهيدن جي قربانين کان انحراف آهي.

0Shares

اپنا تبصرہ بھیجیں