پيراگون اسڪينڊل ۾ حفاظتي ضمانت رد، خواجه سعد ۽ سلمان رفيق نيب هٿان گرفتار

لاهور(بيورو) پيراگون هائوسنگ اسڪينڊل ضمانت واري درخواست رد، خواجه سعد رفيق ۽ خواجه سلمان رفيق نيب هٿان گرفتار. تفصيل موجب اڳوڻو وفاقي وزير خواجه سعد رفيق ۽ سندس ڀاءُ خواجه سلمان رفيق گرفتاري کان اڳ ضمانت لاءِ لاهور هاءِ ڪورٽ ۾ پيش ٿيا، جتي جسٽس طارق عباسي جي سربراهي ۾ 2 رڪني بينچ ٻڌڻي ڪئي. خواجه ڀائرن جي وڪيل اعظم نذير تارڙ ۽ خواجه امجد پرويز دليل ڏيندي چيو ته نيب پاران ڪي به ثبوت پيش ناهن ڪيا ويا، جنهن تي عدالت ٻنهي ڀائرن جي ضمانت واري درخواست ۾ 13 ڊسمبر تائين واڌ ڪري ڇڏي. ان موقعي تي خواجه ڀائرن جي وڪيل پاران استدعا ڪئي وئي ته ڪيس جي ٻڌڻي هڪ هفتي تائين ملتوي ڪئي وڃي، عدالت واڌ جي درخواست رد ڪري بحث اڄ ئي مڪمل ڪرڻ جو حڪم ڏنو، جنهن تي ٻڌڻي ٻيهر شروع ٿي ۽ خواجه ڀائرن جي وڪيلن موقف اختيار ڪيو ته پيراگون هائوسنگ ڪيس جي هڪ جوابدار قيصر امين بٽ کي گرفتار ڪرڻ کانپوءِ کيس سلطاني شاهد بڻائي 164 جو بيان رڪارڊ ڪرايو آهي، جڏهن ته بيان جي ڪاپي به نه پئي ڏني وڃي. عدالت ريمارڪس ڏنا ته توهان کي ثبوتن جي ڪاپي ته فراهم نٿي ڪري سگهجي. عدالت خواجه ڀائرن جي ضمانت واري درخواست رد ڪري ڇڏي، جنهن کانپوءِ نيب جي ٽيم کين گرفتار ڪري ورتو. نيب جي ترجمان جاري ڪيل بيان ۾ چيو آهي ته خواجه ڀائرن کي پيراگون سٽي ڪرپشن ڪيس ۾ ضمانت واري درخواست رد ٿيڻ کانپوءِ گرفتار ڪيو ويو. هن چيو ته عدالتي فيصلي سان نيب پاران جوابدارن خلاف پيش ڪيل ثبوتن جي تصديق ٿي. لاهور هاءِ ڪورٽ ۾ ٻڌڻي دوران ڊي جي نيب لاهور کي تبديل ڪرائڻ وارو معاملو به غور هيٺ آيو، نيب جي وڪيل عدالت کي ٻڌايو ته نيب چيئرمين خواجه ڀائرن جي درخواست تي فيصلو ڪندي رد ڪري ڇڏي آهي. نيب لاهور پاران جاري ڪيل پڌرنامي موجب خواجه سعد رفيق پنهنجي گهرواري، ڀاءُ سلمان رفيق، نديم ضياءُ ۽ قيصر امين بٽ سان گڏجي ايئر ايونيو سوسائٽي ٺاهي، جنهن جو نالو بعد ۾ تبديل ڪري پيراگون رکيو ويو، پڌرنامي ۾ چيو ويو ته خواجه سعد رفيق پنهنجي اختيارن جو ناجائز استعمال ڪندي غير قانوني هائوسنگ سوسائٽي جي تشهير ڪئي ۽ ساٿين سان گڏجي عوام کي دوکو ڏنو ۽ اربين رپيا ڪمايا. نيب جي پڌرنامي موجب خواجه ڀائرن تي پيراگون سٽي ڪرپشن ۾ مبينا طور تي مالي فائدا حاصل ڪرڻ جو الزام آهي، جن 4 ارب رپين جي زمين وڪرو ڪئي، جڏهن ته خواجه ڀائرن ۽ نديم ضياءُ اربين رپين جا بي نامي اڪائونٽس پڻ ٺاهيا هئا، 2013ع ۾ سمورين هائوسنگ اسڪيمن جو رڪارڊ ايل ڊي اي ۾ جمع ٿيو پر پيراگون جو رڪارڊ جمع نه ٿيو.