نئون سکر بئراج اڏڻ لاءِ اڀياس ڪرائڻ جو فيصلو، درياءَ جي ٻنهي پاسي چئنلائيزيشن لاءِ فزيبلٽي تيار ڪرڻ جي منظوري

ڪراچي  (چيف رپورٽر) سنڌ جي وڏي وزير  سيد مراد علي شاهه تاريخي فيصلو ڪندي رٿابندي ۽ ترقي واري کاتي ۽ آبپاشي کاتي کي هدايت ڪئي آهي ته اهي نئين سکر بئراج ۽ سنڌو درياهه تي گڊو ۽ سکر بئراجن وچ ۾ چينلائيزيشن جي فزيبلٽي تيار  ڪئي وڃي. هن اهو فيصلو ڇنڇر ڏينهن سنڌو درياهه تي گڊو ۽ سکر بئراجن وچ ۾ چئنلائيزيشن ۽ نئين سکر بئراج جي تعميرجي حوالي سان رٿيل هڪ خاص اجلاس جي صدارت ڪندي ڪيو. اجلاس ۾ ايم اين اي خورشيد شاهه ۽ پاڻيءَ جي ماهر ادريس راجپوت خاص طور تي شرڪت ڪئي. اجلاس جي ٻين شرڪت ڪندڙن ۾ صوبائي وزير امتياز شيخ، سيد ناصر شاهه، وڏي وزير جو آبپاشيءَ بابت خاص معاون اشفاق ميمڻ، اڳوڻو ايم پي اي نصرالله بلوچ، چيئرمين پي اينڊ ڊي محمد وسيم ۽ آبپاشي کاتي جا چيف انجنيئرز شامل هئا. وڏي وزير چيو ته سنڌوءَ تي گڊو ۽ سکر بئراجن وچ ۾ چئنلائيزيشن ڪرڻ سان پاڻيءَ جي نقصان  ۾ گهٽتائي، پاڻيءَ جي چوري تي ضابطو کاري پاڻي ۽ علائقي ۾ پوندڙ گهارن کان تحفظ فراهم ٿيندو. واضح رهي ته گڊو ۽ سکر بئراجن وچ ۾ 180 ڪلو ميٽرن جو مفاصلو آهي ۽ درياهه جي ويڪر 12 کان 20 ڪلوميٽرن تي ٻڌل آهي. نون بندن (ڪنارن) سان نه رڳو درياهه جي ويڪر گهٽ ٿيندي پر 5 لک ايڪڙن کان وڌيڪ زمين پوکيءَ لاءِ دستياب ٿيندي. ڪنڪريٽ چينل جي بدولت پاڻيءَ جي نقصانن ۾ گهٽتائي ٿيندي ۽ ان جو ڪاٿو 5 کان 8 سيڪڙو آهي. اجلاس جي شرڪت ڪندڙن چيو ته درياهه جي پوري بيلٽ جي چئنلائيزيشن ڪرڻ جي بدران درياهه جي ڪجهه حصن کي چينلائيز ڪري سگهجي ٿو. هن  چيو ته رٿا تي ايندڙ ڳري لاڳت ۽ پاڻي جي وهڪري ڪري سنڌوءَ درياهه جي پوري بيلٽ جي ساڄي ۽ کاٻي ڪنارن تي نوان رستا قائم ڪرڻ تمام اهم آهن. درياهه جي چينلائيزيشن انهن علائقن ۾ ڪئي ويندي جتي اڪثر ڪري گهارا پوندا آهن. اجلاس ۾ اها ڳالهه به سامهون آئي ته چائنيز کي درياهن ۽ واهن جي چينلائيزيشن تي خاص مهارت حاصل آهي انڪري رٿا جي فزيبلٽيءَ لاءِ انهن سان به رابطو ڪري سگهجي ٿو. اجلاس ۾ فيصلو ڪيو ويو ته جوائنٽ ڪوآرڊينيشن ڪميٽيءَ واري اجلاس جيڪو 20 ڊسمبر تي ٿيندو ان ۾ سنڌو درياهه تي گڊو ۽ سکر بئراجن لاءِ ڪاغڊي ڪارروائي ڪئي وڃي. نئون سکر بئراج اجلاس ۾ ٻڌايو ويو  ته سکر بئراج پنهنجي لاجيڪل مدو پورو ڪري ڇڏيو آهي ۽ هاڻ ان جي لائيف ۾ وڌيڪ 30 سال واڌ لاءِ وڏي پئماني تي مرمت ۽ اوو هالنگ ڪئي وئي آهي جتيوڻيڪ هڪ نئون بئراج سکر ۾ تعمير ڪرڻ تمام ضروري آهي. وڏي وزير چيو ته نئين سکر بئراج جي تعمير لاءِ اسٽڊي اڳئي ڪئي وئي آهي، هاڻ بئراج جي اصل الائيٽمينٽ لاءِ فزيبلٽي رپورٽ گهرجي پئي ۽ ڪم جي تڪميل لاءِ ٽائيم فريم رپورٽ فريم گهرجي، ٻئي صورت ۾ ان جي خرچ ۾ واڌ ٿيندي. وڏي وزير چيو ته موجوده سکر بئراج جي انهيءَ ڪيچمينٽ علائقن کي برقرار رکڻ لاءِ اسٽڊي پڻ ڪئي ويندي ته جيئن فزيبلٽي رپورٽ ۾ ان رخ جو به احاطو ڪيو وڃي. هن چيو ته غور ويچار ۽ اسٽڊي ڪئي ويندي ۽ ان بعد فيصلو ڪيو ويندو ته ڪهڙي ريت بئراج تعمير ڪيو وڃي. وڏي وزير چيئرمين پي اينڊ ڊي محمد وسيم کي هدايت ڪئي ته هُو فزيبلٽي رپورٽ جي تياريءَ لاءِ ضروري منظوري وٺي.