صحت جي خراب صورتحال رياست جي ناڪامي آهي، علاج رڳو بااثر ئي ڪرائي سگهي ٿو: چيف جسٽس

0Shares

راولپنڊي (بيورو) چيف جسٽس ثاقب نثار چيو آهي ته پاڪستان ۾ علاج اهو ئي ڪرائي سگهي ٿو  جيڪو مالدار يا بااثر هجي جڏهن ته غريبن جو سٺوعلاج نه ٿيندو آهي. راولپنڊي ۾ هارٽ اسٽروڪ ڪانفرنس کي خطاب ڪندي چيف جسٽس ثاقب نثار چيو ته تڪليف جي ڪا زندگي نه هوندي آهي، امڙ جي بيماري منهنجي حياتي جي تڪليف واري ڳالهه هئي،  مان ڏٺو ته ملڪ ۾ علاج اهو ئي ڪرائي سگهي ٿو ته جيڪو مالدار هجي يا وري بااثر هجي، تنهن ڪري صحت جي شعبي ۾ ڪردار ادا ڪرڻ جو فيصلو ڪيو ته هر غريب جو علاج سولو ٿي سگهي، مان سپريم ڪورٽ جي ججن کان به چندو وٺي اسپتالن کي ڏنو. هن چيو ته معاشري جي بيمار ماڻهن جي علاج تي ڌيان ڏيڻ حڪومت جي ذميواري آهي پر غريبن جو سٺو علاج نه ٿيندو آهي، جيتوڻيڪ اهو سندن قانوني حق آهي. سندس چوڻ هو ته اسپتالن ۾ ڏٺو ته علاج جا بنيادي اوزار ئي نه آهن، وينٽي ليٽر خراب هئا، جيڪي درست هئا اهي رڳو سفارشين لاءِ هئا، ڪو امير هجي ته غريبن کي لڳل وينٽر ليٽر لاهي امير کي لڳايو ويندو هو، ڪي پي جي اسپتالن ۾ ويس ته ڏٺو 3، 3 مريض هڪ بستر تي هئا، اها حڪومت جي مڪمل ناڪامي آهي. چيف جسٽس چيو ته صحت جي شعبي ۾ حڪومتي فنڊ تمام گهٽ آهن اهي به درست استعمال نه ٿيندا آهن، هاڻي ميڊيڪل جي تعليم تمام گهڻي اهميت اختيار ڪري وئي آهي پر اسان عطائي گهڻا پيدا ڪري رهيا آهيون،  خانگي ميڊيڪل اسپتالن جو معاملو ڏٺو ته ٻڌايو ويو ته پڙهائڻ وارو ئي ڪير ناهي پر هو ڊاڪٽر ٿين ٿا. هن چيو ته مان اهو ڏسي ڊڄي ويس ته اسان ڪهڙي پاسي وڃي رهيا آهيون، سينٽر ڊاڪٽرن جي ذميواري آهي ته معاملي تي نظر وجهن، دوائن ۽ علاج جو خرچ مقرر ڪيو وڃي، ڊالر جي قيمت وڌڻ سان اگهه ٻيهر به ڏسن ته جيئن ڊالر سان هم آهنگ ٿي سگهن.

0Shares

اپنا تبصرہ بھیجیں