هاڻي آمريڪا لاءِ جنگ نه وڙهنداسين، اهوئي ڪنداسين جيڪو پاڪستان جي مفاد ۾ هوندو: وزيراعظم

0Shares

 اسلام آباد (بيورو): وزيراعظم عمران خان جو چوڻ آهي ته پاڪستان ڪيترن ئي سالن تائين پنهنجي ملڪ ۾ آمريڪا جي ويڙهه وڙهندو رهيو، پر هاڻي پاڪستان جي حڪومت اهو ئي ڪندي جيڪو پاڪستان جي مفاد ۾ هوندو. آمريڪي اخبار واشنگٽن پوسٽ کي انٽرويو ڏيندي عمران خان چيو ته پاڪستان ۾ دهشتگرديءَ جو ڪو به ٿاڪ ناهي، نه ٿا چاهيون ته آمريڪا تڪڙ ۾ افغانستان مان نڪري وڃي، افغانستان ۾ امن قائم ڪرڻ پاڪستان جي مفاد ۾ آهي ۽ پاڪستان ڳالهين جي عمل لاءِ هر ممڪن ڪوشش ڪندو، سپر پاور سان ڪير بهتر لاڳاپا نه رکڻ چاهيندو آهي پر پاڪستان آمريڪا سان اهڙا ئي لاڳاپا چاهي ٿو جيئن ٻطرفا لاڳاپا چين سان آهن. هن چيو ته اسان واشنگٽن سان بهتر لاڳاپا چاهيون ٿا پر  اسان آمريڪا لاءِ ويڙهه نه وڙهنداسين، منهنجي ٽرمپ سان ٽوئيٽر تي ڪابه ويڙهه ناهي پر رڪارڊ جي درستگي ڪئي اهو ان ڪري آهي جو اسان کي افغانستان ۾ آمريڪا جي ناڪام پاليسين جو ذميوار  قرار ڏنو پيو وڃي.وزيراعظم عمران خان چيو ته جڏهن مان حڪومت ۾ آيس ته مون کي سيڪيورٽي بابت تفصيلي بريفنگ ڏني وئي، اسان جي سيڪيورٽي فورسز مطابق هنن آمريڪا کان بار بار پڇيو ته جيڪڏهن کين پاڪستان ۾ دهشتگردن جي ٿاڪن جي خبر آهي ته اسان کي ٻڌايو وڃي پر آمريڪا هميشه پاڪستان تي دهشتگردن کي محفوظ ٺڪاڻا ڏيڻ جو الزام لڳايو ۽ ڪڏهن ثبوت به نه ڏنا. وزيراعظم عمران خان چيو ته جيڪڏهن پاڪستان نائن اليون کانپوءِ آمريڪا جي ويڙهه ۾ شامل ٿئي ها ته هي ملڪ تباهي کان بچي سگهي پيو، آمريڪا جي دهشتگردي خلاف ويڙهه ۾ شامل ٿيڻ سبب اسان جي معيشت کي 150 ملين ڊالر جو نقصان پهتو ۽ پاڪستان 80 هزار کان وڌيڪ جانيون وڃايون، اسان آمريڪا سان گڏ هڪ طرفا لاڳاپا نه پر چين جيان ئي واپاري لاڳاپا چاهيون ٿا.وزيراعظم عمران خان چيو ته دوستاڻن ڪوششن سان اسان ڪرتارپور لنگهه تي ويزا فري ڪوريڊر کوليو، اميد ڪريون ٿا ته ڀارت ۾ چونڊ عمل کانپوءِ ان سان ٻيهر ڳالهيون شروع ڪري سگهجن. ٻئي طرف : وزيراعظم عمران خان چيو آهي ته اڄ واضح ڪري ڇڏيان ته ڪڏهن ڪنهن جي جنگ نه وڙهنداسين ۽ نه ئي ڪنهن جي آڏو جهڪنداسين اسان سڀني سان امن چاهينداسين. اسلام آباد ۾ بلوچستان سان تعلق رکندڙ شاگردن کي خطاب ڪندي وزيراعظم عمران خان چيو ته قوم نظرئي سان آهي ۽ نظريو نه رهيو ته قوم ناهي رهندي، قائداعظ۾ پوري ڪوشش ڪئي ته مسلمان ۽ هندو متحد ٿي رهن، قائداعظم محسوس ڪيو ته مسلمانن لاءِ الڳ ملڪ ضروري آهي، اسان کي سمجهڻ گهرجي ته ملڪ ڇو ٺهيو، اڄ ڀارت ۾ جيڪو مسلمانن جو حال آهي اتي ڏسڻ ۾ ئي نه ٿو اچي ته مسلمانن کي برابري جا حق ملندي، ڀارت ۾ مسلمانن جو اڄ ڪوبه قائد ناهي.هن چيو ته جمهوريت جو مطلب حڪمران جو قانون جي هيٺ هجڻ آهي، پر اسان جمهوريت کان بادشاهت تي اچي وياسين، چين مديني جي رياست جي اصولن تي هلي 70 ڪروڙ ماڻهن کي غربت مان ڪڍيو پر پاڪستان ۾ امير امير ٿيندو ويو ۽ غريب غريب ئي رهجي ويو، جيڪي علائقا اڳتي هئا انهن تي وڌيڪ پئسو لڳايو ويو جنهن سان گهٽ ترقي يافته علائقا وڌيڪ پوئتي رهجي ويا. عمران خان جو چوڻ هو ته اندازو لڳايو ته خبر پئي ته لاهور ۾ هڪ انسان تي 70 هزار روپيا ايوريج خرچ ڪيا ويا جڏهن ته ننڍي علائقي راجن پور ۾ جتي پئسي جي ضرورت هئي اتي ايوريج هڪ انسان تي اڍائي هزار روپيا خرچ ڪيا ويا، اهڙي طرح امير ۽ غريب علائقن ۾ فرق وڌندو ويو. وزيراعظم وڌيڪ چيو ته هن ملڪ کي اٿارڻو آهي ته نبي ڪريم صه جي اصولن تي اٿارينداسين، اسان جي ڪوشش آهي ته پنهنجي ڪمزور علائقن کي اڳتي آڻيون، بلوچستان پوئتي رهجي ويو آهي پر هاڻ ان کي سٺو وڏو وزير مليو آهي، اسان عورتن لاءِ اسپيشل پروگرام آڻي رهيا آهيون، انهن جي مليڪتن ۾ حصي لاءِ هڪ قانون جوڙي رهيا آهيون جنهن تي عملدرآمد ٿئي. وزيراعظم عمران خان جو چوڻ هو ته اسان پاڪستان ۾ پنهنجو پاڻ تي ظلم ڪيو، اسان جي ليڊرن قوم ۽ ٻين ملڪن جي سامهون تاثر ڏنو ته جيڪڏهن  ڪنهن سپر پاور جي مدد نه ڪنداسين يا انهن جي جنگ نه وڙهنداسين ته تباهه ٿي وينداسين. هن چيو ته اڄ اسان جي عظيم ملڪ نه بڻجڻ جو سبب جهڪڻ ۽ هٿ ڦهلائڻ آهي جنهن اسان جي قومي غيرت ختم ڪري ڇڏي، اسان پنهنجن ماڻهن کي ٻڌايو ته سپر پاور جي جنگ نه وڙهي ته نه بچنداسين، پر اڄ واضح ڪري ڇڏيان ٿو ته ڪڏهن ڪنهن جي جنگ نه وڙهنداسين ۽ نه ئي ڪنهن جي آڏو جهڪنداسين، سڀني سان امن چاهينداسين.

0Shares

اپنا تبصرہ بھیجیں