سپريم ڪورٽ ماڊل ٽائون سانحي تي نئين جي آءِ ٽي جوڙڻ جو حڪم ڏئي ڇڏيو

0Shares

اسلام آباد(بيورو) سپريم ڪورٽ ماڊل ٽائون ڪيس ۾ پنجاب حڪومت کي نئين جي آءِ ٽي جوڙڻ جو حڪم ڏيندي پاڻمرادو نوٽيس اڪلائي ڇڏيو آهي. سپريم ڪورٽ ۾ چيف جسٽس پاڪستان جي سربراهي ۾ 5 رڪني لارجر بئنچ ماڊل ٽائون ۾ شهيد ٿيندڙ عورت جي ڌيءَ جي درخواست تي ٻڌڻي ڪئي. پاڪستان عوامي تحريڪ جي سربراهه ڊاڪٽر طاهر القادري سپريم ڪورٽ ۾ پيش ٿي پاڻ دليل ڏنا. طاهر القادري عدالت ۾ دليل ڏيندي چيو ته واقعي جي ڏينهن 10 ڄڻا فوت ۽ 71 زخمي ٿيا، اسان جي انگن اکرن مطابق 510 ماڻهو زخمي ٿيا هئا، پهرين ايف آءِ آر پوليس جي فرياد تي داخل ٿي ۽ پهرين جي آءِ ٽي به پوليس جي ايف آءِ آر تي ٺهي. طاهر القادري جو چوڻ هو ته جسٽس نجفي ڪميشن به ٺهي، جنهن جي رپورٽ وڏي مشڪل سان ملي، ساڍا 4 سال انصاف نه مليو، هاڻي محسوس ٿئي ٿو ته انصاف جو دروازو کلي ويو آهي. ان موقعي تي چيف جسٽس چيو ته مان چئي چڪو آهيان ته هن ٽرائل جي روزانو جي بنياد تي ٻڌڻي ٿئي، توهان درخواست ڏني ته هفتي ۾ ٻه ڏينهن ٻڌڻي ڪيو. چيف جسٽس پڇاڻو ڪيو ته ٽرائل ۾ ڪيترن شاهدن بيان رڪارڊ ڪرايو آهي؟ طاهر القادري ٻڌايو ته 157 شاهد هئا ۽ 23 شاهدن جا بيان رڪارڊ ٿي چڪا آهن. جسٽس آصف سعيد چيو ته مشتاق سکيرا جي جوابدار ٺاهڻ کانپوءِ سمورا بيان ٻيهر ٿيندا. پاڪستان عوامي تحريڪ جي سربراهه دليل ڏيندي چيو ته ٽرائل ٻيهر ٻڙي جي سطح تي اچي ويو آهي، لارجر  بئنچ جڙڻ سان مظلومن کي انصاف جي اميد ٿي آهي. ان موقعي تي سانحي ۾ فوت ٿيندڙ عورت تنزيلا جي ڌيءُ بسما عدالت ۾ پيش ٿي. طاهر القادري کانپوءِ ان جي قانوني ٽيم پاران به دليل ڏنا ويا ۽ چيو ته گڏيل جاچ ٽيم تي اعتماد نه هجڻ ڪري شاهد پيش نه ٿيا. ان موقعي تي چيف جسٽس پاڪستان پنجاب حڪومت جو موقف ڄاڻيو ته ايڊووڪيٽ جنرل پنجاب چيو ته پنجاب حڪومت واقعي جي غيرجانبدار جاچ چاهي ٿي، ان کي نئين جي آءِ ٽي تي ڪو اعتراض ناهي. ايڊووڪيٽ جنرل جي موقف تي جسٽس ثاقب نثار رمارڪس ڏنا ته جيڪڏهن اعتراض ناهي ته وڃو پنهنجو ڪم ڪريو. عدالت حڪم ڏنو ته پنجاب حڪومت ماڊل ٽائون سانحي تي نئين جي آءِ ٽي جوڙي، ان جي فائنڊنگز کي سامهون آندو وڃي ۽ ٽرائل جو حصو بڻايو وڃي.

0Shares

اپنا تبصرہ بھیجیں