سوئٽزرلينڊ سان معاهدو ٿي ويو، زرداري جو ڪيس کلي سگهي ٿو، نواز خلاف ريفرنس داخل ڪيو ويندو: وفاقي سرڪار

اسلام آباد (بيورو) وزيراعظم جي احتساب بابت صلاحڪار شهزاد اڪبر ٻڌايو آهي ته سوئيٽزر لينڊ پاڪستان سان معاهدي جي منظوري ڏئي ڇڏي آهي جنهن سان سمورن سوئس بئنڪن جا تفصيل ملي سگهندا. اسلام آباد ۾ پريس ڪانفرنس ڪندي وزيراعظم جي احتساب بابت صلاحڪار شهزاد اڪبر چيو ته ٻي طرفي معاهدي سان سمورن سوئس بئنڪن جا تفصيل ملي سگهندا، اهم معلومات 4 کان 6 هفتن ۾ ملي ويندي، 6، 5 سال ان معاهدي تي صحيحون نه ڪري وڃايا ويا. شهزاد اڪبر جو چوڻ هو ته معاهدي تحت پراڻي معلومات حاصل ڪرڻ جي ڪوشش ڪنداسين،  جرمن اختيارين کان پڻ معلومات حاصل ڪرڻ لاءِ رابطو ڪري ورتو آهي جڏهن ته برٽش ورجن آءِ لينڊ سان به معاهدي تي صحيح ڪرڻ جو فيصلو ڪيو آهي. هن ٻڌايو ته نواز شريف خلاف اختيارين جي غلط استعمال جو نئون ڪيس نيب ڏانهن موڪلي ڇڏيو آهي، سندس گهرواري جي نالي تي لنڊن ۾ فليٽ ظاهر نه هو، ان تي به نيب نواز شريف خلاف آمدني کان وڌيڪ اثاثن جو ڪيس بڻائي رهيو آهي ۽ ان حوالي سان سمورا ثبوت نيب کي موڪلي ڇڏيا آهن. وزيراعظم جي خاص مددگار ناڻي واري وزير جي استفعيٰ وارين خبرون رد ڪندي چيو ته اسد عمر کي عهد کان الڳ نه پيو ڪيو وڃي، مٿس وزيراعظم جو اعتماد آهي جڏهن ڪابينا ۾ تبدلي جي حوالي سان وزيراعظم سمورن وزيرن جي ڪارڪردگي جو جائزووٺڻ کانپوءِ فيصلو ڪندو.  هن چيو ته آصف زرداري جو ڪيس ٻيهر کولي سگهجي ٿو، نواز شريف خلاف وي وي آءِ پي جهاز جي غلط استعمال جو ريفرنس داخل ڪيو ويندو،  سوئٽزرلينڊ سان معاهدي تي صحيح ڪرڻ ۾ 5 کان 6 سال ضايع ڪيا ويا، پراڻي معلومات حاصل ڪرڻ جي به ڪوشش ڪئي پئي وڃي، پاڪستانين جي اڪائونٽس جا تفصيل 6 هفتن ۾ ملي ويندا، جرمني سان به معاهدي جي ڪوشش جاري آهي. ٻئي طرف افتخار دراني ٻڌايو ته وزيراعظم جي 100 واري پلان تحت غربت جي خاتمي جو ادارو بڻائڻ جو فيصلو ڪيو آهي جنهن جو سربراهه ڊاڪٽر اشفاق حسن کي مقرر ڪرڻ جو فيصلو ڪيو ويو آهي. هن چيو ته اهو ادارو وفاق ۽ صوبن جي سطح تي رابطا ڪندو ۽ پاليسي جوڙيندا،  مختلف وزارتن جا عملدار ان اداري جا ميمبر هوندا. واضح رهي ته وزيراعظم عمران خان ڪجهه ڏينهن اڳ هڪ تقريب کي خطاب ڪندي غربت جي خاتمي لاءِ منصوبو آڻڻ جو اعلان ڪيو هو.