ابوظهبي ٽيسٽ: نيوزيلينڊ پهرين اننگز ۾ 274 رنز تي ڍير، پاڪستان جون 3 وڪيٽن جي نقصان تي 139 رنز

0Shares

ابوظهبي(اسپورٽس نيوز) ابوظهبي ٽيسٽ ميچ ۾ پاڪستان جينيوزيلينڊ خلاف بيٽنگ جاري آهي ۽ راند جي ٻئي ڏينهن قومي ٽيم ٽن وڪيٽن جي نقصان تي 139 رنز ٺاهي ورتيون. شيخ زيد اسٽيڊيم ۾ کيڏيل ميچ ۾ نيوزيلينڊ جي پوري ٽيم پنهنجي پهرين اننگز ۾ 274 رنز ٺاهي سگهي، جنهن جي جواب ۾ سرفراز اليون جي بيٽنگ جاري آهي ۽ قومي ٽيم ٻئي ڏينهن راند جي پڄاڻي تي ٽن وڪيٽن جي نقصان تي 139 رنز ٺاهي ورتيون. پاڪستان پاران ننگز جي شروعات اوپننگ بيٽسمين محمد حفيظ ۽ امام الحق ڪئي ته ٻئي اوور جي چوٿين بال تي حفيظ اسڪور ٺاهڻ کانسواءِ ٽرينٽ بولٽ جي بال تي ڪيچ آئوٽ ٿيو. امام الحق به گهڻي دير ڪريز تي بيهي نه سگهيو ۽ 9 رنز جو مهمان ثابت ٿيو. ٽين وڪيٽ تي حارث سهيل ۽ اظهر علي ٽيم کي سهارو ڏنو ۽ مجموعي اسڪور 85 تائين پهچايو ته حارث ٽم سائوٿي جو شڪار ٿي ويو، اهو 34 رنز ٺاهي آئوٽ ٿيو. حارث سهيل جي آئوٽ ٿيڻ کانپوءِ اظهر علي ۽ اسد شفيق ذميواراڻي بيٽنگ ڪندي ٽيم جو اسڪور 139 رنز تائين پهچايو. ٻئي ڏينهن جي راند ختم ٿي ته اظهر علي 62 ۽ اسد شفيق 26 رنز سان وڪيٽ تي موجود هئا ۽ ٻنهي رانديگرن وچ ۾ 54 رنز جي پارٽنر شپ ٿي چڪي آهي. ٻئي ڏينهن جي راند ختم ٿيڻ تي ڪيويز کي قومي ٽيم تي 135 رنز جي برتري حاصل آهي، جڏهن ته اڃا ٽن ڏينهن جي راند رهيل آهي. ان کان اڳ ٽيسٽ ميچ جي ٻئي ڏينهن جي راند شروع ٿي ته وڪيٽ ڪيپر بيٽسمين واٽلنگ 42 ۽ وليم سومرويلي 12 رنز سان ڪريز تي موجود هئا، ٻنهي بيٽسمينن محتاط انداز اختيار ڪيو پر 77 رنز تي ناٽ آئوٽ رهندڙ واٽلنگ سان گڏ ڪريز تي ڪير به گهڻي دير تائين بيهي نه سگهيو. سومرويلي 12، اعجاز پٽيل 6 ۽ ٽرينٽ بولٽ هڪ رنز ٺاهي آئوٽ ٿيا. پاڪستان پاران بلال آصف شاندار بالنگ جو مظاهرو ڪندي 5 وڪيٽن حاصل ڪيون، جڏهن ته ياسر شاهه 3، حسن علي ۽ شاهين شاهه آفريدي هڪ-هڪ رانديگر کي آئوٽ ڪيو.

0Shares

اپنا تبصرہ بھیجیں