گم ٿيل ماڻهن جو معاملو سنجيده آهي، ويگو گاڏيون ڪهڙي مصيبت آهن، پوليس کي ڪا خبر ئي نٿي پوي: سنڌ هاءِ ڪورٽ

حيدرآباد(بيورو) سنڌ هاءِ ڪورٽ سرڪٽ بينچ حيدرآباد کنڀي گم ڪيل ماڻهن جي عدم بازيابي تي سخت ڪاوڙ جو اطهار ڪندي پوليس کان پڇيو آهي ته آخر اهي ويگو گاڏيون ڪهڙي مصيبت آهن جن جي پوليس کي ڪا خبر نه ٿي پوي ڪالهه سنڌ هاءِ سرڪٽ بينچ حيدرآباد ۾ کنڀي گم ڪيل خادم حسين آريجو ۽ عبالغفور ڀنڍ جي کنڀجي وڃڻ جي خلاف داخل ڪيل الگ الگ پٽيشن جي ٻڌڻي جسٽس عبدالمالڪ گدي ۽ جسٽس فهيم احمد صديقي تي ٻڌل ڊبل بينچ پاران ڪئي وئي خادم حسين آريجو واري پٽيشن ۾ ايس ايس پي حيدرآباد سرفراز نواز شيخ پيش ٿي رپورٽ ڏني ته خادم حسين آريجو اڃا تائين بازياب ناهي ٿي سگهيو جڏهن ته هن وقت تائين 9 ڀيرا جي آءِ ٽي جي گڏجاڻي پڻ ٿي چڪي آهي جنهن ۾ ان وقت جي ايس ايڇ او حق نواز ڪمانڊو کي پڻ گهرايو ويو هو ۽ سندس ڏنل بيان جي ڪاپي عدالت ۾ پيش ڪئي پئي وڃي جسٽس عبدالمالڪ گدي پڇيو ته ماڻهن کي کنڀي گم ڪرڻ وارو سلسلو آخر ڪيستائين جاري رهندو پٽيشنر جي وڪيل علي پلهه پاران خادم حسين آريجو سان گڏ کنڀي وڃڻ بعد آزاد ٿيل شايان آريجو کي پيش ڪيو ويو جتي عدالت پاران خادم حسين آريجو جي حوالي سان پڇا ڪرڻ تي هن ٻڌايو ته سندس مامي کي ساڻس گڏ کنڀيو ويو هو جنهن کي اڃا تائين آزاد ناهي ڪيو ويو جڏهن ته کيس 3 کان 4 ڏينهن مختلف جاين تي رکيو ويو ۽ سندس سياسي سرگرمين بابت پڇا ڪئي وئي بعد ۾ آزاد ڪيو ويو اعدالت پاران ايس ايس پي حيدرآباد کان خادم حسين آريجو جي بازيابي جي حوالي سان پڇا ڪئي وئي ته ايس ايس پي ٻڌايو ته اسان قانون لاڳو ڪندڙ ادارن کان پڻ خادم حسين آريجو جي حوالي سان پڇا ڪئي آهي ۽ کين مدد ڪرڻ جي درخواست پڻ ڪئي آهي پر اڃا تائين نتيجو ناهي نڪري سگهيو خادم حسين آريجو جي حوالي سان مليل رڪارڊ موجب هو لاڙڪاڻي ۾ داخل ٿيل مختلف دهشتگردي جي ڪيسن ۾ روپوش آهي ۽ سندس تعلق هڪ بندش پيل تنظيم سان آهي جنهن تي ريمارڪس ڏيندي جسٽس فهيم احمد صديقي چيو ته اهو توهان کي کنڀجي وڃڻ کان پوءِ ياد آيو ته هي شخص روپوش آهي جنهن تي کنڀجي ويل شخص جي ڌي نيلم آريجو عدالت کي ٻڌايو ته سندس پيءُ سرڪاري ملازم آهي ۽ هو پگهار کڻندو رهندو هو ۽ مستقل ڊيوٽي تي پڻ حاضر رهندو هو هاڻي سندس نالو پراڻن ڪيسن ۾ شامل ڪيو ويو .جسٽس فهيم احمد صديقي ايس ايس پي حيدرآباد کان پڇيو ته آخر ويگو گاڏي ڪهڙي مصيبت آهي جيڪو سرعام روڊن تي ماڻهو کڻندي وتي ٿي ۽ پوليس کي ڪٿي نظر نه  ٿي اچي جسٽس عبدالمالڪ گدي ريمارڪس ڏيندي چيو ته مسنگ پرسنز وارو معاملو سنجيدهه آهي ۽ هاڻي روزانو حيدرآباد مان به ماڻهو کنڀيا پيا وڃن پر پوليس الائي ڇا پئي ڪري عدالت ۾ پٽيشنر جي وڪيل علي پلهه چيو ته خادم حسين آريجو جو ڪيس نامعلوم ماڻهن جي خلاف ڪيس داخل ٿيل آهي پر اها به خبر آهي ته اهي نامعملوم ماڻهو ڪير آهن جنهن تي عدالت ڪيس جي فريادي ۽ گواهن جا ٻيهر بيان رڪارڊ ڪرڻ جو پوليس کي حڪم ڏيندي ان وقت جي ايس ايڇ او حق نواز ڪمانڊو کي ذاتي طور طلب ڪندي ٻڌڻي ملتوي ڪري ڇڏي جڏهن ته دادو مان لاپتا ٿيل شخص عبالغفور ڀنڍ کي کنڀڻ جي الزام هيٺ آيل ڊي ايس پي کي ضلعي بدر ڪرڻ ڪرڻ جو حڪم ڏيندي ايس ايس پي دادو کي گم ٿيل شخص جي بازيابي جو حڪم ڏيندي ٻڌڻي ملتوي ڪري ڇڏي .