منرل واٽر ڪمپنيون بند ڪرڻ سان ڪير اڃ نه مرندو، قوم سان دوکو بند ڪيو وڃي: چيف جسٽس

اسلام آباد(بيورو) سپريم ڪورٽ جي چيف جسٽس ثاقب نثار چيو آهي ته منرل واٽر ڪمپنيون عوام کي بيوقوف بڻائي رهيون آهن، عوام کي گهرجي ته منٽرل واٽر ڪمپنين جو بائيڪاٽ ڪن، منرل واٽر ڪمپنيون بند ٿيڻ سان ڪو اڃ نه مرندو. رپورٽن مطابق چيف جسٽس ثاقب نثار جي سربراهيءَ ۾ بئنچ منرل واٽر ڪمپنين خلاف پاڻي وڪرو ڪرڻ بابت ڪيس جي ٻڌڻي ڪئي.  چيف جسٽس ثاقب نثار رمارڪس ڏيندي چيو ته ڪميشن جي رپورٽ ڏسي دل چوي ٿي ته سموريون ڪمپنيون بند ڪري ڇڏيون، سنڌو درياهه ۽ واهن جو پاڻي منرل واٽر طور استعمال ٿي رهيو آهي. خانگي ڪمپني جي وڪيل چيو ته منرل واٽر ڪمپنين کي بهتري لاءِ وقت ڏنو وڃي. چيف جسٽس رمارڪس ڏيندي چيو ته جر هيٺ پاڻي جي قيمت هر صورت ۾ ادا ڪرڻي پوندي، هڪ هفتي ۾ نظام ٺيڪ ڪيو وڃي، ٻي صورت ۾ ڪمپنيون بند ڪري ڇڏينداسين، نظام بهتر ڪرڻ تي ئي ڪمپنين کي ڪم ڪرڻ جي اجازت ڏني ويندي. هن چيو ته رڳو ٻن منرل واٽر ڪمپنين جو پاڻي پيئڻ جي قابل آهي، منرل واٽر ڪمپنيون بند ٿيڻ سان ڪو به اڃ نه مرندو. سندس چوڻ هو ته پاڻي ڪمپنيون پاڻي جي قيمت ادا ۽ معيار ٺيڪ ڪن، اهو ڪم سومر تائين ڪيو وڃي، ٻي صورت ۾ ڪمپنيون بند ڪيون وينديون. چيف جسٽس ڪمپني جي مالڪ سان ڳالهائيندي چيو ته قوم کي ناقص پاڻي پياريندا رهيا، توهان کي قوم ۽ ملڪ جو ڪو به خيال ناهي، کوهه جي پاڻي جو معيار بوتل بند پاڻي کان بهتر آهي. ڊي جي ماحوليات چيو ته سيوريج جي پاڻي مان سبزيون ڦٽي رهيون آهن، سنڌ ۾ سنڌو درياهه ۽ واهن جو پاڻي استعمال ٿي رهيو آهي. هن چيو ته ڪراچيءَ ۾ پاڻي صاف ڪري گندو پاڻي وهايو ويندو آهي، منرل واٽر ڪمپنين جا ٽيڪنيڪي معاملا درست نه آهن. چيف جسٽس چيو ته منرل واٽر ڪمپنيون پئسا ادا ڪنديون ته ڊيم لاءِ اسان کي پئسا گهرڻ جي ضرورت ئي نه پوندي، 9 سالن جا 756 ارب رپيا منرل واٽر ڪمپنين کي جمع ڪرائڻا پوندا، هڪ هزار ارب رپيا هڪ ٻئي صاحب کان وٺي ڊيم فنڊ ۾ جمع ڪرائينداسين. چيف جسٽس چيو ته سنڌو درياهه ۽ نديءَ جو پاڻي منرل واٽر طور استعمال ٿي رهيو آهي، ڪميشن جي رپورٽ ڏسي دل چوندي آهي ته ڪمپنيون بند ڪري ڇڏيون، سومر تائين معاملا درست نه ٿيا ته ڪمپنيون بند ڪري ڇڏينداسين، ڪنهن به صورت ۾ پاڻي چوري ڪرڻ نه ڏينداسين، زمين اندر پاڻيءَ جي قيمت ادا ڪرڻي پوندي، نظام بهتر ڪرڻ تي ئي ڪمپنين کي ڪم ڪرڻ جي اجازت ڏينداسين، پيسا ٺاهڻ لاءِ ماڻهن کي بيوقوف بڻايو ويو آهيجسٽس اعجاز الاحسن چيو ته ڪميشن جي رپورٽ موجب ڪمپنين وٽ پاڻي ٽيسٽ ڪرڻ جو نظام موجود ناهي. چيف جسٽس چيو ته ماڻهن کي پاڻيءَ جو هڪ ڦڙو به ميسر ناهي، ڪمپنين سان ڪا به همدردي ناهي، خراب پاڻي سبزين لاءِ استعمال ڪيو پيو وڃي ۽ اهي سبزيون اسين کائيندا آهيون، ٻارن لاءِ خراب پاڻي استعمال نه ٿيڻ ڏينداسين.