سپريم ڪورٽ ايف بي آر کي عليما خان خلاف ڪارروائي جو رڪارڊ پيش ڪرڻ جو حڪم ڏئي ڇڏيو

لاهور (بيورو) سپريم ڪورٽ ايف بي آر کي وزيراعظم جي ڀيڻ عليما خان خلاف سموري ڪارروائي جو رڪارڊ پيش ڪرڻ جو حڪم ڏئي ڇڏيو. چيف جسٽس ثاقب نثار جي سربراهيءَ ۾ سپريم ڪورٽ جي 2 رڪني بئنچ لاهور رجسٽريءَ ۾ عمران خان جي ڀيڻ عليما خان جي دبئي ۾ ملڪيت بابت ڪيس جي ٻڌڻي ڪئي.  سپريم ڪورٽ ايف بي آر کي هن وقت تائين ڪيل سموري ڪارروائي جو رڪارڊ پيش ڪرڻ جو حڪم ڏيندي چيو ته عدالت کي آگاهه ڪيو وڃي عليما خان کي طلبي لاءِ ڪڏهن نوٽيس موڪليو ويو ۽ ايف بي آر ڪهڙي ڪارروائي ڪئي آهي. ايف بي آر جي ڪمشنر ان لينڊ روينيو ڊاڪٽر اشتياق دبئي جي ملڪيت ۽ ڪرائي نامي بابت تفصيلي رپورٽ مهر بند لفافي ۾ پيش ڪندي ٻڌايو ته وزيراعظم جي ڀيڻ عليما خان دبئي جي فليٽ تي ايمنسٽي نه ورتي آهي، ميڊيا ۾ ايمنسٽي وٺڻ بابت غلط خبر ڏني پئي وڃي. ايف بي آر کيس فليٽ ڊڪليئر نه ڪرڻ تي 8 فيبروري 2018ع تي نوٽيس موڪليو هو پرڏيهه هئڻ سبب کيس نوٽيس نه مليو آهي، عليما خان بئنڪ مان قرض حاصل ڪري فليٽ خريد ڪيو جيڪو ڀاڙي ذريعي ادا ڪيو، قرض جي ادائيگي کانپوءِ فليٽ وڪرو ڪيو ويو. چيف جسٽس چيو ته عليما خان بئنڪ مان قرض وٺي فليٽ خريد ڪيو، ڀاڙو قسط طور بئنڪ کي ادا ڪيو، پوءِ فليٽ وڪرو ڪيو، هاڻي مسئلو ڇا آهي. ڪمشنر ان لينڊ روينيو ڊاڪٽر اشتياق چيو ته عليما خان دبئي جي ملڪيت ظاهر نه ڪئي، باقي سموريون ملڪيتون ايمنسٽي اسڪيم ۾ ظاهر ڪيون،  پرڏيهه ملڪ خريد ڪيل ملڪيت ظاهر ڪرڻ لازم آهي، جڏهن ته ايف بي آر کي سندس نفي ۽ نقصان سان ڪو واسطو ناهي. چيف جسٽس چيو ته عليما خان خلاف ڪارروائي کي رڪارڊ جو حصو بڻايو وڃي، 6 ڊسمبر تي اسلام آباد ۾ ڪيس کي ٻڌنداسين.