دبئي ٽيسٽ: ياسر شاهه جي تباهه ڪن بالنگ، نيوزيلينڊ فالو آن جو شڪار

دبئي(اسپورٽس نويز) ياسر شاهه جي تباهه ڪن بالنگ، نيوزيلينڊ فالو آن جو شڪار، ٻي اننگ ۾ 131 رنسن تي 2 وڪيٽون وڃائي ڇڏيون، نيوزيلينڊ کي اڃا 197 رنسن جو خسارو برقرار..  تفصيل موجب دبئي ٽيسٽ ۾ نيوزيلينڊ جي ٽيم  پنهنجي پهرين اننگز ۾ 90 رنسن ٺاهي فالو آن جو شڪار ٿي وئي جنهن بعد ڪيوي ٽيم جي ٻي اننگز ۾ بيٽنگ جاري آهي. دبئي ٽيسٽ جي ٽئين ڏينهن ياسر شاهه شاندار بالنگ جو مظاهرو ڪندي ڪنهن به ڪيوي بيٽسمين کي ڪريز تي بيهڻ نه ڏنو ۽ 41 رنسن عيوض 8 رانديگرن کي پويلين ڀيڙو ڪيو. ٽئين ڏينهن نيوزيلينڊ بنا ڪنهن نقصان تي 24 رنسون تي پنهنجي نامڪمل اننگز جي شروعات ڪئي، ٻنهي اوپنر ٽيم کي 50 رنسن جي شروعات فراهم ڪئي پر ان کانپوءِ ياسر شاهه پهريان جيت راول کي 31 رنسن تي بولڊ ڪيو ۽ پوءِ ٻئي اوور ۾ نيوزيلينڊ جي 3 رانديگرن کي پويلين جي راهه ڏيکاري مهمان ٽيم جي چيلهه چٻي ڪري ڇڏي. ماني جي وقفي تائين وڌيڪ 2 رانديگرن کي آئوٽ ڪري باقي رهيل ڪسر پڻ پوري ڪري ڇڏي. ڪين وليمسن جي قيادت ۾ ڪيوي ٽيم پنهنجي پهرين اننگز ۾ رڳو 90 رنسون ٺاهي سگهي جنهن ۾ 6 بيٽسمين  کاتو کولڻ بنا آئوٽ ٿيا. قومي ٽيم کي نيوزيلينڊ تي 328 رنسن جي سرسري حاصل ڪري ورتي، فالو آن جو شڪار ٿيندڙ نيوزيلينڊ پنهنجي ٻي اننگ شروع ڪئي ۽ ڏينهن جي پڄاڻي تي ٻن وڪيٽن جي نقصان تي 131 رنسون ٺاهيون. ڏينهن جي پڄاڻي تي ٽيلر 49 ۽ لاٿم 44 رنسن سان ڪريز تي موجود آهن. ٻي اننگ ۾ به ٻئي وڪيٽون ياسر شاهه ورتيون ۽ هڪ ڏينهن ۾ گڏيل طور پاڪستاني ليگ اسپنر ياسر شاهه 10 رانديگرن کي آئوٽ ڪيو. ياسر شاهه پنهنجي ڪيريئر جي بهترين بالنگ ڪرائيندي 41 رنسن عيوض 8 رانديگرن کي پويلين موڪليو.  واضح رهي ته پاڪستان پنهنجي پهرين اننگ 5 وڪيٽن جي نقصان تي 418 رنسن تي ڊڪليئر ڪئي هئي. ٽن ميچن تي ٻڌل ٽيسٽ سيريز ۾ نيوزيلينڊ کي 0-1 جي برتري حاصل آهي.