سنڌو درياءَ جي انچ انچ تي ڊيم ٺهڻ گهرجن، صوبا ڪالاباغ ڊيم تي به متفق ٿيندا: چيف جسٽس

لنڊن (م ڊ) چيف جسٽس ثاقب نثار تجويز پيش ڪئي آهي ته جيڪڏهن ضرورت پئي ته موبائيل فون پري پيڊ ڪارڊز تي ٻيهر ٽيڪس هڻي ڊيم لاءِ پئسا جمع ڪيا وڃن، ان حوالي سان هن قوم کان راءِ به طلب ڪئي آهي. لنڊن ۾ يو ڪي پاڪستان چيمبر آف ڪامرس اينڊ انڊسٽريز جي انتظام هيٺ فنڊ گڏ ڪرڻ جي تقريب کي خطاب ڪندي چيف جسٽس ثاقب نثار چيو ته عوام تي ڊيم ٺاهڻ لاءِ ٽيڪس لاڳو ڪرڻ مناسب نه هوندو پر اسان پري پيڊ موبائيل ڪارڊ تي وڌ هولڊنگ ٽيڪس ختم ڪرايو هو، جڏهن ته حساب ڪيو ته خبر پئي ته ان تي هر مهيني 3 ارب رپين جي بچت ٿيندي، جيڪڏهن قوم اجازت ڏي ته پري پيڊ ڪارڊ تي ٻيهر ٽيڪس لڳائي ڊيم لاءِ پئسا گڏ ڪنداسين، قوم منهنجي اهڙي تجويز تي راءِ کان ضرور آگاهه ڪري. ماضي ۾ ڊيم جي اڏاوت نه ٿيڻ کي مجرماڻي غفلت قرار ڏيندي چيف جسٽس چيو ته سنڌو درياءَ جي انچ انچ تي ڊيم ٺهڻ گهرجي. هن اميد ڏيکاري ته هڪ ڏينهن چارئي صوبا ڪالاباغ ڊيم تي به متفق ٿي ويندا. چيف جسٽس ثاقب نثار چيو ته ڪراچيءَ ۾ پاڻي جو بحران ڏسي مسئلي جي سنگيني جو احساس ٿيو آهي، ٽئنڪر مافيا ۽ پاني تي بند ٺاهيندڙ بااثر ماڻهن جو ڪراچي جي پاڻي تي قبضو آهي ۽ بااثر ماڻهن ڪراچي کي پاڻي فراهم ڪندڙ ڍنڍ جي رستي ۾ بند ٻڌي ڇڏيو آهي جڏهن ته لاهور ۽ ڪوئيٽا ۾ به جر جو پاڻي هيٺ کان هيٺ وڃي رهيو آهي. هن چيو ته مان نئين نسل جو مستقبل محفوظ ڏسڻ چاهيان ٿو، ڊيم جي اڏاوت نه رڳو پاڪستان پر انسانيت جي تحريڪ بڻجي وئي آهي. سندس چوڻ هو ته  ڊيم فنڊ ۾ ايندڙ  هڪ هڪ پائي جي حفاظت ڪئي ويندي ۽ قوم جي امانت محفوظ هٿن ۾ ڏئي وينداسين ۽ ان حوالي سان هڪ ڪمپني ضرور ٺاهينداسين. چيف جسٽس چيو ته هي فنڊ قوم جي امانت آهي جنهن کي مان ڪنهن ايماندار شخص حوالي ڪري ويندس جيڪو ان جي حفاظت ڪري.