روس يوڪرين جي ٽن جهازن تي قبضو ڪري ورتو، سلامتي ڪائونسل جو هنگامي اجلاس طلب

0Shares

ماسڪو/نيويارڪ(م ڊ) روس ۽ يوڪرين وچ ۾ هڪ ڀيرو ٻيهر ڇڪتاڻ تيز ٿي وئي آهي. روس ڪرائمين ٻيٽ تي يوڪرين جي ٻن سامونڊي ٻيڙن سوڌو ٽن جهازن تي حملو ڪري پنهنجي قبضي ۾ وٺي ڇڏيا آهن. يوڪرين پارليامينٽ ملڪ ۾ مارشل لا لڳائڻ تي ووٽنگ ڪندي. ٻنهي ملڪن وچ ۾ ڇڪتاڻ ڪيتري ئي عرصي کان هلندڙ آهي، روس يوڪرين تي ملڪ جي حدن ۾ غيرقانوني طور داخل ٿيڻ جو الزام هنيو آهي. ٻئي پاسي روس پاران يوڪرين جي ٻن ويڙهاڪ سامونڊي ٻيڙن سوڌو ٽن جهازن تي قبضي کانپوءِ ڇڪتاڻ وارو ماحول پيدا ٿي ويو آهي. ان واقعي دوران يوڪرين ٻيڙن ۾ موجود عملو به زخمي ٿيو آهي. ٻنهي ملڪن هڪٻئي تي هن واقعي جي ذميواري لاڳو ڪئي آهي. ٻئي طرف روس ڪاري سمنڊ ۾ يوڪرائني بحريا جي ٽن جهازن تي قبضو ڪري ورتو آهي ۽ ان قدم سان پيدا ٿيل ڳڻتي جوڳي صورتحال تي غور لاءِ گڏيل قومن جي سلامتي ڪائونسل جو هنگامي اجلاس طلب ڪيو ويو آهي. ان کان اڳ روس پنهنجي سرحد ويجهو فوجي چر پر تي سخت رد عمل جو اظهار ڪيو هو جڏهن ته روس يوڪرائين تي سرحدي خلاف ورزي جو الزام به هنيو. روس ڪاري سمنڊ ۽ آزوف سمنڊ جي سنگم تي ڪرچ سمنڊ تي قائم پل هيٺيان پنهنجو بحري ٽينڪر بيهاري رستو بلاڪ ڪري ڇڏيو آهي. يوڪرائين جي صدر پيٽرو پورو شينڪو ملڪ جي قومي سلامتي ۽ دفاعي ڪائونسل کي خطاب ڪندي روس جي قدمن کي بنا جواز قرار ڏنو. برطانوي نشرياتي اداري جي رپورٽ مطابق آچر تي صبح جو يوڪرائن جا 2 جنگي جهاز ۽ هڪ ٻيڙي ڪاري سمنڊ تي واقع بندرگاهه تان آزوو بندرگاهه ماريو پول جي سفر تي نڪتا. يوڪرائيني اختيارين مطابق روسين انهن ٻيڙين جو رستو روڪيو. انهن جي تلاشي ورتي ۽ انهن کي اڳتي وڌڻ کان روڪي ڇڏيو. ان دوران روس پنهنجن ٻن جنگي جهازن ۽ ٻن هيلي ڪاپٽرن کي ان علائقي ۾ موڪلي ڇڏيو. روسين يوڪرائن تي الزام هنيو آهي ته انهن جي ٻيڙين غير قانوني طور تي روسي حدن ۾ داخل ٿيڻ جي ڪوشش ڪئي جنهن سبب انهن سيڪيورٽي سببن جي ڪري رستو بند ڪري ڇڏيو آهي. يوڪرائن جي بحريه بعد ۾ جاري ڪيل بيان ۾ چيو ته انهن جي ٻيڙين کي نقصان پهچايو ويو آهي ۽ عملي جا 6 ماڻهو زخمي ٿيا آهن، جڏهن ته روسي اختيارين يوڪرائيني جهازن جي عملي جا فقط 3 ماڻهو زخمي ٿيڻ جي تصديق ڪئي آهي. يوڪرائيني فوجي اختيارين جو چوڻ آهي ته انهن روسين کي ٻيڙين جي اچ وڃ بابت آگاهه ڪيو هو. يورپي يونين روس تي زور ڀريو آهي ته اهو ڪرچ سمنڊ جي رستي کي بحال ڪري ۽ تحمل جو مظاهرو ڪري. نيٽو طرفان چيو ويو آهي ته اهو يوڪرائين جي آوزف سمنڊ تي قائم بندرگاهه تائين سفر ۾ رڪاوٽون پيدا نه ڪري. يوڪرائين جي اختيارين گڏيل قومن جي قومي سلامتي ڪائونسل جو هنگامي اجلاس گهرائڻ جي درخواست ڪئي ۽ مطالبو ڪيو ته عالمي برادري روس خلاف فوري قدم کڻي.

0Shares

اپنا تبصرہ بھیجیں