پاڪستان آءِ ايم ايف جا سخت شرط مڃڻ کان انڪار ڪري ڇڏيو، ڳالهيون بنا نتيجي ختم

اسلام آباد (بيورو) پاڪستان آءِ ايم ايف ڪجهه مطالبا تسليم ڪرڻ کان انڪار ڪري ڇڏيو آهي جنهن کانپوءِ ڳالهيون جو پهريون دور بنا نتيجي ختم ٿي ويو . پاڪستان ۽ آءِ ايم ايف وچ ۾ ڳالهيون گذريل ٻن هفتن کان جاري هيون جنهن ۾ آءِ ايم ايف طرفان پاڪستان جي مالي مدد لاءِ سخت شرطون سامهون آيون. رپورٽن موجب پاڪستان ۽ آءِ ايم ايف وچ ۾ ڳالهين جو پهريون دور بنا نتيجي ختم ٿي ويو جنهن کانپوءِ ٻئي دور لاءِ آءِ ايم ايف جو وفد ٻيهر پاڪستان ايندو. ذريعن جو چوڻ آهي ته آءِ ايم ايف ۽ پاڪستان پراميد آهن ۽ ايندڙ سال 15 جنوري کان اڳ ڪنهن نتيجي تي پهچندا. ذريعن موجب پاڪستان آءِ ايم ايف جا ڪجهه مطالبا مڃڻ کان معذرت ڪئي آهي جنهن ۾ رپئي جي قيمت ۾ ڪمي، ٽيڪسن جي شرح وڌائڻ ۽ بجلي جي اگهن ۾ واڌ تي ڊيڊ لاڪ برقرار آهي. ذريعن ڄاڻايو ته آءِ ايم ايف طرفان پاڪستان سان 20 کان 22 سيڪڙو تائين بجلي جي اگهن ۾ واڌ جو مطالبو ڪيو ويو جنهن تي پاڪستان معذرت ڪئي. ذريعن جو چوڻ آهي ته پاڪستان چين کان مالي مدد جا تفصيل فراهم ڪرڻ کان پڻ معذرت ڪئي ۽ موقف اختيار ڪيو ته اسان جون ڪجهه حدون آهن جن کي اورانگهي نٿا سگهون. ٻئي طرف پاڪستان ۽ عالمي مالياتي فنڊز جي ڳالهين تي ناڻي واري وزارت پڌرنامو جاري ڪري ڇڏيو. ناڻي واري وزارت چيو آهي ته ڳالهين ۾ ذڪر ڪرڻ جوڳي اڳڀرائي ٿي آهي، ان دوران پاليسي، ڍانچي ۽ سڌارن جي بنياد تي پروگرام بابت ڳالهه ٻولهه ٿي، ڳالهين دوران مالي ادائگين جي توازن کي بهتر بڻائڻ لاءِ حڪومتي مداخلت جهڙا مسئلا بحث هيٺ آيا. پڌرنامي ۾ چيو ويو ته پاڪستان جي آءِ ايم ايف سان ڳالهين ۾ غربت گهٽائڻ لاءِ خرچن ۽ گورننس جا معاملا بحث هيٺ آيا، ترقي ۽ ڪاروبار جي ماحول کي دوستاڻو بڻائڻ جي معاملن تي به ڳالهه ٻولهه ٿي. ناڻي واري وزارت چيو ته حڪومت اقتصادي ۽ سماجي بهتري لاءِ آءِ ايم ايف جي مدد کي ساراهي ٿي. هوڏانهن آءِ ايم ايف پڌرائي ۾ چيو آهي ته پاڪستان سان ڪرنٽ اڪائونٽ خسارو گهٽائڻ بابت ڳالهيون ٿيون، ناڻي جي مٽاسٽا جي ذخيرن بابت به ڳالهيون ڪيون ويون، پاڪستان سان معاهدي لاءِ ايندڙ هفتي وري ڳالهيون ٿينديون..