پاڻي ورڇ لاءِ ٽيليمينٽري سسٽم لازمي قرار، سنڌ پاڻي معاهدي جي پيرا 2 تي عمل جو مطالبو ڪري ڇڏيو

0Shares

اسلام آباد(بيورو) گڏيل مفادن واري ڪائونسل آبادي ۾ تيزي سان اضافي جي مسئلي کي موثر انداز ۾ منهن ڏيڻ لاءِ قومي سطح تي وزيراعظم جڏهن ته صوبائي سطحن تي لاڳاپيل وڏن وزيرن جي قيادت ۾ قومي ۽ صوبائي ٽاسڪ فورسز جوڙڻ جو فيصلو ڪيو آهي، جڏهن ته قابل تجديد توانائي جي استعمال ۽ ملڪ ۾ ڪاروبار ۾ آساني پيدا ڪرڻ جي عمل کي وڌيڪ بهتر بڻائڻ تي ڀرپور ڌيان ڏيڻ تي مڪمل اتفاق ڪيو ويو. گڏيل مفادن واري ڪائونسل جو اجلاس وزيراعظم عمران خان جي صدارت ۾ وزيراعظم آفيس ۾ ٿيو. اجلاس ۾ بين الصوبائي هم آهنگي واري وفاقي وزير ڊاڪٽر فهميده مرزا، ناڻي واري وفاقي وزير اسد عمر، قانون ۽ انصاف واري وفاقي وزير محمد فروغ نسيم، نجڪاري واري وفاقي وزير محمد ميان سومرو، پنجاب جي وڏي وزير سردار عثمان بوزدار، سنڌ جي وڏي وزير سيد مراد علي شاهه، خيبرپختونخواهه جي وڏي وزير محمود خان، بلوچستان جي وڏي وزير ڄام ڪمال، وزيراعظم جي واپار ۽ صنعت واري صلاحڪار عبدالرزاق دائود، وفاقي ۽ صوبائي سيڪريٽرين ۽ سينيئر عملدارن شرڪت ڪئي. ان ڏس ۾ قومي سطح تي وزيراعظم جڏهن ته صوبائي سطحن تي لاڳاپيل وڏن وزيرن جي سربراهي ۾ قومي ۽ صوبائي ٽاسڪ فورسز جوڙڻ جو فيصلو ڪيو ويو. ٽاسڪ فورسز قائم ڪرڻ جو عمل 48 ڪلاڪن ۾ مڪمل ڪيو ويندو. قومي ۽ صوبائي سطحن تي جوڙيل ٽاسڪ فورسز ان کان اڳ سپريم ڪورٽ آف پاڪستان جي حڪمن تي قائم ٿيندڙ ٽاسڪ فورس جي سفارشن تي غور ڪنديون ۽ گڏيل مفادن واري ڪائونسل کي ٺوس حڪمت عملي پيش ڪنديون جنهن ۾ حڪمت عملي تي اڳتي جي عملدرآمدي حڪمت عملي، مالياتي رخن ۽ ٺوس پاپوليشن ڪنٽرول پروگرام جي ڪاميابي لاءِ معاشري جي سمورن طبقن جي حمايت حاصل ڪرڻ بابت ٻين معاملن کي نظر ۾ رکيو ويندو. اجلاس ۾ ٻه آر ايل اين جي پلانٽس نيشنل پاور پارڪس مئنيجمينٽ ڪمپني لميٽيڊ جي ملڪيت 1223 ميگاواٽ جي بلوڪي ۽ 1230 ميگاواٽ جي حويلي بهادر شاهه کي جلد عملدرآمد لاءِ نجڪاري پروگرام جي فعال فهرست ۾ شامل ڪرڻ جي تجويز جي اصولي منظوري ڏني وئي. گڏيل مفادن واري ڪائونسل موجوده انرجي مڪس ۾ قابل تجديد توانائي تي وڌيڪ ڌيان ڏيڻ تي متفقه طور تي زور ڏنو. شرڪت ڪندڙن ۾ سيڙپڪاري کي راغب ڪرڻ ۽ ملڪي روانگي واپار جي صلاحيت مان فائدو کڻندي صنعت جي فروغ لاءِ ملڪ ۾ ڪاروبار ۾ آساني پيدا ڪرڻ جي عمل کي وڌيڪ بهتر بڻائڻ تي وسيع تر ڌيان ڏيڻ تي مڪمل اتفاق ڪيو ويو.

0Shares

اپنا تبصرہ بھیجیں