والد جي ٻي شادي تي امڙ امرتا مون کي تيار ڪيو هو:ساره علي خان

نئين دهلي ( شوبز نيوز ) بالي ووڊ جي ننڍي نواب سيف علي خان جي نياڻي سارا علي خان انڪشاف ڪيو آهي ته سندس والد جي بالي ووڊ اداڪارا ڪرينا ڪپور سان ٻي شادي ۾ شرڪت جي موقعي تي سندس امڙ امريتا سنگهه کيس تيار ٿيڻ ۾ مدد ڪئي هئي. سيف علي خان ۽ سارا ويجهڙ ۾ ڪرن جوهر جي شو” ڪافي ود ڪرن“ ۾ شرڪت ڪئي. شو دوران سيف علي خان جي ڪرينا ڪپور سان ٻي شادي بابت ڳالهائيندي سارا ڄاڻايو ته منهنجي امڙ، منهنجي والد جي شادي ۾ شرڪت لاءِ تياري ۾ مدد ڪئي هئي، ڪيئي ماڻهن جو خيال هوندو ته ڪرينا عجيب آهي يا منهنجي امڙ عجيب آهي، پر اسان لاءِ اها ڪا وڏي ڳالهه نه هئي. سارا موجب هر ڪو مونسان پنهنجي لاڳاپن بابت تمام گهڻو واضح هو. ان ۾ ڪا به ڪشمڪش نه هئي، ڪرينا پاڻ چيو ته تنهنجي هڪ سٺي ماءُ آهي ۽ منهنجي خواهش آهي ته اسان سٺن دوستن وانگر رهون. سندس وڌيڪ چوڻ هو ته منهنجي امڙ ڪڏهن به مونکي ائين نه چيو ته ڪرينا تنهنجي ٻي ماءُ آهي، يا هن ڪڏهن به صورتحال کي مون لاءِ  خراب ڪرڻ جي ڪوشش نه ڪئي. سارا چيو ته هو ان ڳالهه تي خوش آهي ته سندس والدين پنهنجي پنهنجي زندگي، ڪم ڪارن ۾ مصروف آهن ۽ هاڻ سندس ٻه پرسڪون گهر آهن. ان موقعي تي سيف علي خان پڻ انڪشاف ڪيو ته ڪرينا ڪپور سان شادي واري ڏينهن هن پهرين گهرواري امريتا جي نالي هڪ نوٽ پڻ لکيو هو. ننڍي نواب انڪشاف ڪيو ته هن نوٽ ۾ لکيو ته زندگي جو هڪ ناياب باب شروع ٿي رهيو آهي ۽ اهو پڻ لکيم ته اسان هڪ سٺو وقت گڏ گذاريو آهي، پوءِ اهو نوٽ مون ڪرينا کي ڏيکاريو ۽ ان کي اڳتي موڪلي ڇڏيو،جنهن بعد سارا فون ڪري چيو ته هو هويئن به شادي ۾ شرڪت ڪري رهي هئي پر هاڻ هو وڌيڪ خوشي سان اچي رهي آهي. واضح رهي ته سارا، سيف علي خان جي پهرين گهرواري امريتا سنگهه جي نياڻي آهي، سيف علي خان آڪٽوبر 2012 ۾ ڪرينا ڪپور سان ٻي شادي ڪئي هئي.