ثقافت کاتي جي ڊپٽي ڊائريڪٽر شير محمد مهر جو پتو نه پيو، پوليس واقعي کي “چوٽيهون در” بڻائي ڇڏيو

0Shares

نوشهروفيروز(رپورٽ: علي محمد چنه) ثقافت کاتي جو ڊپٽي ڊائريڪٽر شير محمد مهر هن وقت تائين ڪو ڏس پتو پئجي ناهي سگهيو ته کيس آسمانجهٽي ويو جا زمين ڳهي وئي جڏهن ته نوشهروفيروز ضلعي ۽ شهيد بينظير آباد پوليس هن وقت تائين حد بندين جو تڪرار ڄاڻائي ڪيس وغيره به داخل ناهي ڪيو ۽ نه ئي وري پوليس اهو پتو لڳائي سگهي آهي ته آخر ثقافت کاتي جو ڊپٽي ڊائريڪٽر شير محمد مهر جنهن کي ثقافت کاتي سنڌ پاران ٽن ضلعن حيدرآباد، مٽياري ۽ شهيد بينظيرآباد جي چارج مليل آهي اهو آخر ويو ڪاڏي؟ شير محمد مهر نوشهروفيروز ضلعي جي ڳوٺ سومر چنڙ جي رهواسي پنهنجي دوست سرور چنڙ کي پنهنجي ڳوٺ 10 نومبر تي 12 وڳي ڌاري لاهي واپس قاضي احمد ڀرسان پنهنجي ڳوٺ وڃڻ جي لاءِ نڪتو هو ته ان کان پوءِ غائب آهي سندس پٽ ثناءَ الله مهر جو چوڻ آهي ته ڪالهه کان وٺي سندس پيءُ شير محمد مهر جا موبائل فون پڻ بند آهن جنهن جي ڪري سمورا گهرجا ڀاتي ۽ مٽ مائٽ سخت پريشان آهيون ۽ اسان ايس ايس پي نوشهروفيروز سان ملاقات ڪري کيس سموري صورت حال کان آگاهه ڪيو آهي پر اڃا تائين پوليس سندس والد جو ڪوبه سراغ لڳائي ناهي سگهي. ٻئي پاسي ايس ايس پي نوشهروفيروز طارق ولايت ڊپٽي ڊائريڪٽر جي وارثن ۽ ثقافت کاتي جي عملدارن جي وفد سان ملاقات ڪئي ۽ کين ٻڌايو ته مورو ٽول پلازا تي لڳل سي سي ٽي وي فٽيج مان پتو پيو آهي ته ڊپٽي ڊائريڪٽر شير محمد مهر جي گاڏي ڪراس ڪيو آهي ۽ فيٽيج ۾ شير محمد پاڻ اڪيلو ويٺل نظر اچي ٿو جنهن مان اها خبر پئي ٿي ته واقعو نوشهروفيروز ضلع ۾ ناهي ٿيو ان باوجود به نوشهروفيروز پوليس ڪوششون وٺي رهي آهي جڏهن ته هن پاڻ آمري پل ۽ نيون سعيد آباد ٽول پلازا تائين فٽيج چيڪ ڪرايا آهن جنهن ۾ پتو پيو آهي ته شير محمد مهر نيو سعيد آباد ٽول ڪراس ناهي ڪيو. ان هوندي به نوابشاهه پوليس جي گڏيل سهڪار سان جاچ ڪنداسين. هوڏانهن شهيد بينظير آباد پوليس جو چوڻ آهي ته واقعو سندن حد ۾ ناهي ٿيو ان باوجود به سي آءِ اي انچارج نوابشاهه جي اڳواڻيءَ ۾ پوليس ٽيم جوڙي وئي آهي جيڪا واقعي جي گهڻ رخي جاچ ڪري رهي آهي ۽ واقعي بابت نوشهروفيروز پوليس سان سهڪار ڪيو ويندو جڏهن ته ٻئي طرف سنڌ جي وڏي وزير سيد مراد علي شاهه پاران واقعي جو نوٽيس وٺندي آءِ جي سنڌ کي جاچ ڪري رپورٽ ڏئڻ جي هدايت ڪري ڇڏي آهي.

0Shares
کیٹاگری میں : سنڌ

اپنا تبصرہ بھیجیں