احتجاج ختم ڪرڻ لاءِ ڳالهين جو فيصلو، ڪاميٽي قائم، رياست ڪمزور ناهي، بغاوت ڪندڙن کي حساب ڏيڻو پوندو: وفاقي سرڪار

اسلام آباد(بيورو) وفاقي سرڪار آسيا بيبي ڪيس جي فيصلي کانپوءِ سڄي ملڪ ۾ هلندڙ مذهبي تنظيمن جا مظاهرا ختم ڪرائڻ لاءِ ڳالهيون ڪرڻ جو فيصلو ڪندي ڪميٽي جوڙي ڇڏي.رپورٽن مطابق وفاقي ڪابينا جي هنگامي اجلاس ۾ وزيراعظم عمران خان معاملو سهڻي نموني حل ڪرڻ لاءِ ڳالهين واري ٽيم جي منظوري ڏئي ڇڏي آهي. ذريعن مطابق ڪميٽي سڌ سماءَ واري وفاقي وزير فواد چوڌري، پرڏيهي وزير شاهه محمود قريشي، گهرو مملڪتي وزير شهريار آفريدي، مذهبي معاملن واري وزير نور الحق قادري ۽ فوڊ سيڪيورٽي واري وزير محبوب سلطان تي ٻڌل هوندي. ذريعن مطابق وفاقي وزير نور الحق ۽ محبوب سلطان مظاهرين جي قيادت سان ڳالهيون ڪندا ڳالهين جي نگراني وزيراعظم پاڻ ڪندو. ٻئي طرف وزيراعظم عمران خان چيو آهي ته حڪومت عوام جي جان ۽ مال جي حفاظت ڪندي رستا بند ڪرڻ ۽ عوام کي تڪليف ڏيڻ جي اجازت نٿو ڏيان ڪنهن کي قانون هٿ ۾ کڻڻ جي اجازت نه ڏني ويندي سپريم ڪورٽ جي فيصلي تي احتجاج بنا جواز آهي وزيراعظم عمران خان جي صدارت ۾ وفاقي ڪابينه جو اجلاس ٿيو جنهن ۾ شهريارآفريدي امن امان جي صورتحال تي ڄاڻ ڏني ڪابينه اجلاس ۾ يو اين امن مشن بابت پاڪ چين ٺاهه، ميجر جنرل فياض حسين شاهه جي آءِ جي ايف سي بلوچستان مقرري جي منظوري ڏني ويئي ڪابينه اجلاس ۾ ميجر جنرل راحت حسين جي آءِ جي ايف سي ڪي پي طور مقرري، ريڊيو پاڪستان بورڊ جي نئين سر تنظيم ۽ ايل اين جي ٽرمينلز جي ڊائريڪٽرز جي مقرري به منظوري ڏني ويئي وفاقي ڪابينه چيئرمين ويج بورڊ جي استعيفا منظور ڪئي ويئي. ٻئي طرف سڌ سماءَ واري وفاقي وزير فواد چوڌري چيو آهي ته اسان نقصان نٿا چاهيون پر ڪير ان دوکي ۾ نه رهي ته رياست ڪمزور آهي، چاهيون ٿا تشدد جي ضرورت نه پئي، احتجاج ڪندڙن کي هڪ رستو ڏيڻ چاهيون ٿا. اسلام آباد ۾ پريس ڪانفرنس ڪندي فواد چوڌري چيو ته وزيراعظم گذريل ڏينهن صورتحال کي سامهون رکي تقرير ڪئي، حڪومتي ڪميٽي پ پ چيئرمين بلاول ڀٽو زرداري ۽ ن ليگ صدر شهباز شريف کي صورتحال بابت آگاهه ڪيو آهي. سندس چوڻ هو ته اپوزيشن کي مڪمل سهڪار جي خاطري ڪرائي آهي ۽ جيڪا به اسٽريٽجي ٺهندي، ان تي اپوزيشن سان صلاح ڪئي ويندي، جڏهن ته اپوزيشن به مڪمل سهڪار جي خاطري ڪرائي آهي. هن چيو ته اپوزيشن انهن معاملن تي ٻه فوڪل پرسن مقرر ڪيا آهن، اسان جي ڪوشش هوندي ته سڄي ملڪ جي سياسي قوتن کي گڏ کڻي هلون، اسان هڪ رياست آهيون، ڪيئن ٿو ٿي سگهي ته ڪجهه ماڻهو اٿي فيصلو ڪن هيءَ ڳالهه مڃينداسين يا هيءَ ڳالهه نه مڃينداسين. فواد چوڌري چيو ته وزيراعظم راتوڪي تقرير ۾ حڪومت جو نه رياست جو موقف سامهون رکيو آهي، اپوزيشن ۽ رياستي ادارا حڪومتي موقف جي پويان بيٺا آهن، جيڪي ماڻهو رياست جي رٽ کي اهڙي ريت چئلينج ڪندا، جيڪو بغاوت جي زمري ۾ اچي ٿو ته کين ان جو حساب ڏيڻو پوندو. وفاقي وزير موجب قانوني رستا سڀني لاءِ کليل آهن پر پاڪستان کي بنانا ريپبلڪ نه بڻجڻ ڏينداسين، جيڪڏهن اهي ٿورڙا به عقلمند آهن ته اشارو سمجهي وڃن.