امام حسين عه ۽ سندس ساٿين جو چاليهو اڄ ملهايو ويندو، موبائيل سروس بند، ٻيلهه سواري تي پابندي

0Shares

ڪراچي )چيف رپورٽر +  نمائندن وٽان)  ڪربلا جي رڻ ۾ باطل خلاف حق جي ويڙھ ۾ پنهنجو اهل عيال قربان ڪندي قربانيءَ جو عظيم مثال رقم ڪندڙحضرت  امام حسين عليه السلام ۽ سندس جانثارن جو چاليهو اڄ روايتي مذهبي عقيدت  ۽ احترام سان ملهايو ويندو.  ان موقعي تي حفاظتي  اپاءَ سخت  ڪندي سنڌ جي ڪيترن ئي شهرن ۾ موٽرسائيڪل  جي ٻيلهه سواري تي پابندي وڌي ويئي آهي. جڏهن ته موبائيل فون سروس به اڄ بند رهندي.  تفصيل موجب ڪربلا  جي شهيدن  جي ياد ۾ اڄ سنڌ  جي راڄڌاني  ڪراچيءَ  سميت  ننڍن وڏن شهرن ۾ ماتمي جلوس ڪڍيا ويندا.  تعزين ، علم پاڪ ۽  ذوالجناح  سان نڪرندڙ  جلوسن ۾ عزادار سينه ڪوبي ۽ زنجيرن تي ماتم  ڪري امام حسين عه  سان پنهنجي  عقيدت جو اظهار ڪندا، ڪراچي  ۾ مرڪزي  مجلس  صبح  جو 10  وڳي 30  منٽن تي  نشتر پارڪ ۾ ٿيندي، جنهن بعد  مرڪزي ماتمي جلوس نڪرندو جيڪو ايم اي جناح روڊ تان گذرندي حسينيه ايرانيان  امام بارگاھ تي پهچي نهر ٿيندو.  حيدرآباد، سکر، لاڙڪاڻي، بينظير آباد ۽  ميرپورخاص  ڊويزن  جو  ضلعي هيڊ ڪوارٽرن  مان  ڪشمور، ڪنڌڪوٽ، جيڪب آباد، گهوٽڪي، خيرپور، نوشهروفيروز، نوابشاھ، سانگهڙ،  عمرڪوٽ، ٿرپارڪر، قمبرشهدادڪوٽ جي، شڪارپور، دادو، ڄامشورو، ٽنڊ  محمد خان، ٽنڊي الهيار، مٽياري، ، ٺٽي ، سجاول،  بدين سميت ننڍن  وڏن شهرن ۾ ماتمي  جلوس  ڪڍيا  ويندا. جنهن دوران  عزاداري   واسطي  نذر نياز ۽ سبيلان جو انتظام به ڪيو ويو آهي.  هوڏانهن امام عالي   مقام جي چاليهي جي موقعي تي  سمورن شهرن ۾ سخت  حفاظتي  اپاءَ  ڪيا ويا آهن.  ڪراچي ۾ 5 هزار کان  وڌيڪ   اهلڪار  جلوس ۽ امام بارگاهن  جي  سيڪيورٽي لاءِ مقرر ڪيا ويا آهن. جڏهن ته ڪراي   سميت سمورن وڏن شهرن ۾ موبائيل  فون سروس  صبح  8  کان رات  10  وڳي  تائين  بند رکڻ جي سفارش ڪئي وئي آهي. هوڏانهن  ڪربلا جي شهيدن جي چاليهي جي سلسلي ۾ سنڌ جي مختلف ضلعن ۾ موٽر سائيڪل جي ٻيلهه سواري تي پابندي جو نوٽيفڪيشن جاري ڪيو ويو. سنڌ حڪومت طرفان جاري ڪيل نوٽيفڪيشن موجب ڪراچي ۾ اڄ رات 12 هين وڳي کان سڀاڻي رات 10 هين وڳي تائين موٽر سائيڪل جي ٻيلهه سواري تي بندش هوندي جڏهن ته مٽياري، ٽنڊو الهيار، سجاول، شهيد بينظير آباد، لاڙڪاڻو ۽ قمبر شهدادڪوٽ  ضلعن ۾ ٻيلهه سواري تي پابندي هوندي.دادو ضلعي ۾ اڄ کان 31 آڪٽوبر تائين ٻيلهه سواري تي پابندي هوندي، سانگهڙ ۾ 30 ۽ 31 آڪٽوبر ۽ خيرپور ۾ اڄ کان 2 نومبر تائين موٽر سائيڪل جي ٻيلهه سواري منع هوندي. اهڙي طرح ڄامشوري، ٺٽي، ميرپورخاص، سکر ۽ ڪشمور ۾ اڄ ۽ سڀاڻي جڏهن ته ٽنڊومحمد خان ۾ اڄ موٽر سائيڪل جي ٻيلهه سواري تي بندش هوندي.

0Shares

اپنا تبصرہ بھیجیں