ڪراچي ۾ گهر خالي ڪرائڻ تان ڇڪتان، علائقو جنگ جو ميدان بڻجي ويو، شيلنگ لٺبازي، پٿراءُ 16 زخمي

ڪراچي(چيف رپورٽر) پاڪستان ڪوارٽرز مان امڪاني بي دخلي خلاف احتجاجي مظاهرو ڪندڙن تي پوليس ڪڙڪي پئي ۽ ڪيترائي مظاهري گرفتار ڪري ورتو جڏهن ته پوليس احتجاج ڪندڙ جي وچ ۾ چڪرين ۾ 6 اهلڪارن سميت 16 ڄڻا زخمي ٿي پيا. سپريم ڪورٽ جي حڪمن کي نظر ۾ رکندي پاڪستان ڪوارٽرز ۾ گهرن کي خالي ڪرائڻ واري آپريشن جي اطلاع تي پاڪستان ڪوارٽرز جي رهواسين احتجاج ڪيو ۽ حڪومت خلاف ڇتي نعريباز پڻ ڪئي، احتجاج ۾ عورتون مرد ۽ ٻار پڻ شامل هئا. علائقي واسين پاڪستان ڪوارٽرز جا داخلي رستا رڪاوٽون هڻي بند ڪري ڇڏيا آهن. جنهن کانپوءِ احتجاج ڪندڙن کي ڇڙوڇڙ ڪرڻ لاءِ پوليس جي وڏي نفري موقعي تي پهتي. پوليس جي وڳوڙ ٽوڙ فورس ۽ ليڊيز پوليس اهلڪار پڻ موقعي تي موجود هئا. وڳوڙ ٽوڙ پاڪستان ڪوارٽرز ڏانهن ويندڙ رستا کولڻ جي ڪوشش ڪئي، جنهن تي احتجاج ڪندڙ جون پوليس سان چڪريون ۽ منهن ماري ٿي. احتجاج ڪندڙن طرفان پوليس تي پٿراءُ ڪيو ويو، جنهن تي پوليس شيلنگ، لٺبازي ۽ واٽر ڪينن جو استعمال ڪيو جڏهن ته ڪيترن ئي احتجاج ڪندڙن کي گرفتار ڪيو ويو آهي. ان دوران پوليس جي هڪ اهلڪار هوائي فائرنگ ڪئي جنهن کي ضابطه اخلاق جي ڀڃڪڙي ڪرڻ تي گرفتار ڪري هٿيار پڻ ضبط ڪيا ويا. پوليس ۽ احتجاج ڪندڙن وچ ۾ ٿيندڙ چڪرين ۾ 6 کان وڌيڪ پوليس اهلڪار زخمي ٿيا جڏهن ته پوليس لٺبازي، ڳوڙها آڻيندڙ گئس جي شيلنگ، پٿراءٌ ۽ واٽر ڪينن جي استعمال سبب 10 احتجاج ڪندڙ پڻ زخمي ٿي پيا. پوليس ۽ احتجاج ڪندڙن ۾ چڪرين کانپوءِ وڏي وزير سيد مراد علي شاهه ايڊيشنل آءِ جي ڪراچي کي فون ڪيو ۽ پوليس جي رويي تي ڪاوڙ جو اظهار ڪيو. وڏي وزير پاڪستان ڪوارٽرز مان فوري طور تي پوليس واپس گهرائڻ جو حڪم ڏنو ۽ چيو ته عوام سان اهڙو رويو تڪليف ڏيندڙ آهي، هي ڇا ٿي رهيو آهي؟ ختم ڪريو، اهو سڀ عوام جي پريشاني جو سبب آهي.  وڏي وزير جي حڪمن تي پوليس احتجاج ڪندڙن خلاف آپريشن روڪي ڇڏيو. ايس پي جمشيد شمائل رياض ٻڌايو ته آپريشن دوران هڪ درجن کان وڌيڪ ماڻهن کي گرفتار ڪيو ويو ، في الحال آپريشن بند ڪري رهيا آهيون، ٻيهر حڪم ملڻ تي ڪاروائي ڪنداسين. ايس پي چيو ته گرفتار مظاهرين خلاف سرڪاري ڪم رنڊڪ وجهڻ جو ڪيس داخل ڪنداسين. ٻئي پاسي پاڪستان ڪوارٽرز جي رهواسين جي احتجاج سبب لسٻيلي کان گارڊن ايندڙ ويندڙ روڊ تي سيڪيورٽي کي نظر ۾ رکندي ٽريفڪ لاءِ بند ڪيو ويو . ٽريفڪ پوليس موجب ٽريفڪ کي گارڊن  ٽينڪر چورنگي کان ايم اي جناح روڊ طرف موڙ ڏنو ويو ۽ لسٻيلي ويندڙ ٽريفڪ کي تين هٽي کان گرومندر ڏانهن موڙ ڏنو ويو آهي. ان کانسواءِ ان موقعي تي ايم ڪيو ايم پاڪستان جو مرڪزي اڳواڻ عامر خان ۽ ڪنور نويد جميل کانسواءِ فاروق ستار ۽ پي ٽي آءِ جي ايم پي اي جمال صديقي پڻ احتجاج ڪندڙن سان همدردي لاءِ پهتا.