تحريڪ انصاف جي حڪومت هلندي نظر نٿي اچي، بي اعتمادي رٿ بابت وقت ٻڌائيندو: آصف زرداري

0Shares

اسلام آباد (بيورو) پ پ جي شريڪ چيئرمين آصف علي زرداري چيو آهي ته حڪومت سان نه ڳالهائيندس، جيڪڏهن ٺاهه ڪرڻو هجي ها ته پرويز مشرف جي دور ۾ بهتر هو. رپورٽن موجب اڳوڻي صدر آصف علي زرداري جي يو آءِ ف جي سربراهه مولانا فضل الرحمان سان سندس گهر ۾ ملاقات ڪئي، جنهن ۾ حڪومتي پاليسين خلاف اپوزيشن جي گڏيل حڪمت عملي واضح ڪرڻ تي اتفاق سان گڏوگڏ حڪومت خلاف ٺهراءَ تي به خيالن جي ڏي وٺ ڪئي وئي. ان موقعي تي فضل الرحمان پ پ جي شريڪ چيئرمين کي نواز شريف سان ملاقات جي صلاح ڏيندي چيو ته موجوده صورتحال ۾ توهان جي اڳوڻي وزيراعظم سان ملاقات ضروري آهي. ملاقات کانپوءِ صحافين سان ڳالهائيندي آصف زرداري چيو ته تحريڪ انصاف حڪومت هلندي نظر نٿي اچي، حڪومت سان نه ڳالهائيندس، ڇو ته جيڪڏهن ٺاهه ڪرڻو هجي ها ته پرويز مشرف جو دور بهتر هو. هن چيو ته 10 سال جمهوريت لاءِ گڏجي ڪم ڪيو، اسان جي سدائين ڪوشش رهي آهي ته غير جمهوري طاقتن کي موقعو نه ملي، هن وقت به جمهوريت جي بقا لاءِ پنهنجو ڪردار ادا ڪري رهيا آهيون پر هاڻ اسان کي جمهوري طاقتون ڪمزور نظر اچي رهيون آهن، تنهن ڪري لائحا عمل طئي ڪرڻو پوندو. اڳوڻي صدر چيو ته ملڪ جي بهتري لاءِ سڀني سياسي پارٽين سان رابطا ڪري رهيا آهيون، عدم اعتماد جي ڳالهه به سڀني سامهون رکنداسين، حڪومت خلاف عدم اعتماد جي حوالي سان وقت ٻڌائيندو پر اسان جو مقصد حڪومت کي ڪيرائڻ نه، جمهوريت جي رستي تي هلائڻ آهي ۽ اهو ضروري به ناهي ته حڪومت ڪيرايو وڃي، سڀني جو موقف آهي ته گڏجي هلجي. جي يو آءِ ف جي سربراهه فضل الرحمان چيو ته متفق آهيون اپوزيشن گڏجي هڪ موقف اختيار ڪري ۽ اسان سڀني جو بنيادي موقف آهي ته جمهوريت کي ڪوڙو مينڊيٽ حاصل آهي، اپوزيشن گڏجي مستقبل جي حوالي سان لائحا عمل تيار ڪندي ۽ ايندڙ ڪجهه ڏينهن ۾ آل پارٽيز ڪانفرنس ڪرائي ويندي. پ پ جي شريڪ چيئرمين ۽ اڳوڻي صدر آصف علي زرداري جي حڪومت مخالف ٺهراءُ منظور ڪرڻ جي تجويز تي پ پ ۽ مسلم ليگ ن ۾ جلد رابطي جو امڪان آهي.  مخالف ڌر حڪومت خلاف اي پي سي گهرائڻ جي تجويز ڏئي ڇڏي آهي. آصف زرداري کي اي پي سي گهرائڻ جي تجويز مولانا فضل الرحمان ڏني آهي.  ذريعن موجب اڳوڻي صدر آصف علي زرداري جي حڪومت مخالف ٺهراءَ منظور ڪرڻ جي تجويز تي پ پ ۽ مسلم ليگ ن ۾ جلد باضابطا رابطي جو امڪان آهي. مخالف ڌر حڪومت خالف اي پي سي گهرائڻ جي تجويز ڏني آهي. آصف زرداري کي اي پي سي جي تجويز مولانا فضل الرحمان ڏني مخالف ڌر جون پارٽيون آصف زرداري جي تجويز جو جائزو وٺنديون. مسلم ليگ ن به آصف زرداري جي تجويز کي قبولڻ جوڳو قرار ڏيندي واکاڻيون آهي. نيئر بخاري جو چوڻ آهي ته آصف زرداري جي تجويز تي مستقبل ۾ اڳڀرائي ٿي سگهي ٿي.

0Shares

اپنا تبصرہ بھیجیں