ڪرڪيٽ ۾ ميگا ڪرپشن جا الزام، پي سي بي عرب ٽي وي کان رڪارڊ گهري ورتو

0Shares

لاهور(اسپورٽس نيوز) پاڪستان ڪرڪيٽ بورڊ (پي سي بي) عرب ٽي وي جي ڪرڪيٽ ۾ ڪرپشن بابت ڊاڪيومينٽري تي رڪارڊ گهري ورتو. تفصيل موجب انٽرنيشنل ڪرڪيٽ ۾ ڪرپشن جي نئين اسڪينڊل تي هر طرف ٻڙڌڪ مچي ويو آهي، پي سي بي عرب ٽي وي جي ڪرپشن بابت ڊاڪيومينٽري تي رڪارڊ طلب ڪري ورتو آهي جڏهن ته انگلينڊ ۽ آسٽريلوي بورڊ الزامن کي رد ڪري ڇڏيو. پي سي بي جو چوڻ آهي ته عرب ٽي وي اڃا تائين مطالبي تي جواب ناهي ڏنو، رڪارڊ کانپوءِ وڌيڪ تحقيق ٿيندي، رانديگرن جي ملوث هئڻ جا ٺوس شاهد مليا ته ڪارروائي ڪئي ويندي. پي سي بي موجب ڪنهن سان گڏ تصوير ڪڍرائڻ سان ڪو ڏوهه ثابت نٿو ٿئي، ڪرپشن خلاف اسان جي پاليسي زيرو ٽالرينس جي آهي. ٻئي طرف انگلينڊ ۽ ويلز ڪرڪيٽ بورڊ پنهنجي رانديگرن تي لڳندڙ بدعنواني جا الزام رد ڪري ڇڏيا آهن، انگلش بورڊ جو چوڻ آهي ته رانديگرن خلاف ڪو ٺوس ثبوت موجود نه آهي. آسٽريلوي ڪرڪيٽ بورڊ پنهنجي رانديگرن تي الزامن کي رد ڪيو آهي پر ڪرڪيٽ آسٽريليا عرب ٽي وي کان غير ايڊٽ شده وڊيو شاهدي طور گهري ورتي آهي. عرب ٽي وي جي ڪرڪيٽ ڪرپشن تي نئين ڊاڪيومينٽري منظر تي اچڻ کانپوءِ آءِ سي سي حرڪت ۾ اچي وئي آهي، آءِ سي سي اينٽي ڪرپشن يونٽ جي مينيجر ايلڪس مارشل جو چوڻ آهي ته معاملي جي جاچ ڪري رهيا آهيون عرب ٽي وي ثبوت شيئر ڪري. ايلڪس مارشل چيو ته ڪرڪيٽ کي ڪرپشن کان پاڪ رکڻ لاءِ بندوبست ڪري رهيا آهيون، ڊاڪيومينٽري ۾ 15 انٽرنيشنل ميچن ۾ فڪسنگ جو انڪشاف ڪيو ويو آهي. ڪرپشن جي نئين اسڪينڊل اڳيان اچڻ کانپوءِ ٽي ٽين ليگ تي ڪيترائي سوال اٿڻ لڳا، تجزيڪارن سوال ڪيو آهي ته انٽرنيشنل ڪرڪيٽ فڪسنگ کان محفوظ ناهي ته ڇا ٽي ٽين جهڙي تڪراري ليگ ڪرپشن کان پاڪ ٿي سگهي ٿي، ڇا پي سي بي پاڪستاني رانديگرن کي اهڙي ليگ ۾ موڪلڻ چاهيندو. ميچ فڪسنگ ۾ ڀارتي بڪي سڀ کان اڳتي آهن، عرب ٽي وي جي دستاويزي فلم ۾ ڏيکاريو ويو آهي ته ان ڪڌي عمل جا سمورا پيرا ڀارتي شهر احمد آباد ڏانهن وڃن ٿا، بدنامه زمانه بڪي انيل منور ۽ ان جي گينگ ڪم ڪندي آهي. ڀارت جي بدنام زمانه ميچ فڪسر انيل منور سان گڏ دنيا جي ناليوارن رانديگرن جي تصويرن ڪيترائي سوال اٿاري ڇڏيا آهن، هڪ تصوير ۾ پاڪستاني بيٽسمين عمر اڪمل به بڪي انيل منور ۽ ان جي ساٿين سان گڏ نظر اچي رهيو آهي، ويسٽ انڊيز ۽ ڀارتي رانديگر ويرات ڪوهلي، روهت شرما جي به انيل منور سان گڏ تصوير موجود آهي.

0Shares

اپنا تبصرہ بھیجیں