ن ليگ پاران شهباز شريف جي گرفتاري خلاف احتجاج جو فيصلو، پارليامينٽ جو اجلاس گهرائڻ جو مطالبو

0Shares

لاهور (بيورو) ن ليگ پارٽي صدر جي گرفتاري خلاف سڄي ملڪ ۾ احتجاج جو اعلان ڪري ڇڏيو. ن ليگ جي سينٽرل ايگزيڪيوٽو ڪميٽي جي اجلاس کانپوءِ راڻا ثناءُ الله صحافين سان ڳالهائيندي چيو ته جيڪڏهن سڀاڻي تائين قومي ۽ پنجاب اسيمبلي جو اجلاس نه گهرايو ويو ته اربع ڏينهن ٻنهي عمارتن اڳيان شهباز شريف جي گرفتاري خلاف اپوزيشن احتجاج ڪندي. سندس چوڻ هو ته اهو احتجاج رڳو پارليامينٽ تائين محدود نه رهندو ۽ ان وقت تائين جاري رهندو، جيستائين قومي اسيمبلي اجلاس ۾ مخالف ڌر اڳواڻ کي نٿو گهرايو وڃي ۽ هو اتي پنهنجو ڪيس پيش ڪندو، جنهن کي سڄي قوم ٻڌي ۽ فيصلو ڪندي ته سندس گرفتاري انتقامي ڪارروائي آهي. هن چيو ته عمران خان چئي ٿو وزارت عظميٰ دوران ڪاروبار نه ڪندس، ڇو ته ڪاروبار ۽ ڪرپشن جهانگير ترين ۽ عليم خان ڪندا، انهن جي اي ٽي ايم مان فائدو کيس ٿيندو، حڪومت جي عوام دشمن پاليسين سبب عوام مهانگائي کي منهن ڏئي رهيو آهي، چين ۽ روس جهڙا دوست ملڪ پري ڪري سي پيڪ خلاف ابهام پيدا ڪيو پيو وڃي، اسان اهڙن حڪومتي قدمن خلاف به احتجاج ڪنداسين. راڻا ثناءُ الله چيو ته شهباز شريف کي گرفتار ڪرڻ جو مقصد ننڍي چونڊ تي اثرانداز ٿيڻ آهي، جهڙي قسم جون ڪارروايون 25 جولاءِ کان اڳ ڪيون ويون، هي به ان جي ئي ڪڙي آهي. سندس چوڻ هو ته اپوزيشن جي سموري قيادت سان رابطو ڪري گڏيل لائحا عمل ٺاهينداسين، عمران خان پنهنجي ڀرپاسي ۾ ڏسي، سڀ چور ۽ ڦورو ويٺل آهن، هو انهن جو قائد آهي، غريب ماڻهن جا دڪان ڊاٿا پيا وڃن، جيڪي قبضا گروپ آهن، انهن جي قبضي مان زمين خالي ڇو نه پئي ڪرائي وڃي؟. ان کان اڳ اجلاس ۾ ڳالهائيندي نواز شريف نادان ماڻهو وقت کان اڳ پنهنجي پيرن تي ڪهاڙو هڻي رهيا آهن اجلاس ۾ شهباز شريف جي گرفتاري جي مذمت ڪئي وئي نواز شريف چيو ته جيڪو ڪجهه ڪيو پيو وڃي ڪنٽينر وارن کي ان جو ڪيتو لوڙهڻو پوندو.

0Shares

اپنا تبصرہ بھیجیں