غداري ڪيس: نواز شريف، شاهد خاقان عباسي ۽ صحافي سرل الميڊا کي لکت ۾ جواب داخل ڪرائڻ جو حڪم

0Shares

لاهور (بيورو) لاهور هاءِ ڪورٽ بغاوت ڪيس ۾ صحافي سرل الميڊا جا ناقابل ضمانت وارا گرفتاري جا وارنٽ رد ڪندي سندس نالو ايگزٽ ڪنٽرول لسٽ مان ڪڍڻ جو حڪم ڏئي ڇڏيو، عدالت اڳوڻي وزيراعظم ۽ صحافي کي جواب داخل ڪرائڻ جو حڪم ڏيندي ايندڙ ٻڌڻي 22 آڪٽوبر تائين ملتوي ڪئي وئي. غداري ڪيس ۾ اڳوڻو وزيراعظم نواز شريف، شاهد خاقان عباسي ۽ صحافي سرل الميڊا لاهور هاءِ ڪورٽ ۾ پيش ٿيا، جسٽس مظاهر نقوي جي سربراهي هيٺ ٽه رڪني بينچ ڪيس جي ٻڌڻي ڪئي.  عدالتي ڪمري ۾ گهڻِي رش هجڻ سبب ٻنهي وزيراعظمن کي روسٽرم ۾ نه گهرايو ويو ۽ رڳو سندن منهن ڏيکارڻ بعد ڪارروائي جو آغاز ڪيو ويو. ٻڌڻي دوران شاهد خاقان عباسي جي وڪيل عدالت کي گذارش ڪئي ته  14 آڪٽوبر تي ضمني چونڊون آهن، جنهن لاءِ ڪارروائي چونڊن بعد ڪئي وڃي ۽ تيستائين ڪارروائي ملتوي ڪئي وڃي، عدالت سندن درخواست منظور ڪندي ٻڌڻي 22 آڪٽوبر تائين ملتوي ڪري ڇڏي. ان کان عدالت صحافي سرل الميڊا جا ضمانت نه ٿيڻ جوڳا گرفتاري وارا وارنٽ واپس وٺندي سندس نالو اي سي ايل مان ڪڍڻ جو به حڪم ڏنو، صحافي جا وارنٽ سندس حاضري يقيني بڻائڻ لاءِ جاري ڪيا هئا. عدالت حڪم ڏنو ته نواز شريف، شاهد خاقان عباسي ۽ صحافي سرل الميڊا غداري ڪيس ۾ پنهنجا تحريري جواب داخل ڪرائن. ٻڌڻي دوران عدالت پچاڻو ڪيو ته اٽارني جنرل پاڪستان ڪاٿي آهي؟ ان حوالي سان سرڪاري سطح تي ڪا ڪارروائي ڪئي وئي؟ هي حساس معاملو آهي، عدالت اٽارني جنرل پاڪستان کي به ايندڙ ٻڌڻي تي طلب ڪري ورتو.

0Shares

اپنا تبصرہ بھیجیں