ملڪ سليڪٽيڊ حڪومت حوالي ڪيو ويو، عوام پڇي ٿو ته نئين پاڪستان ۾ ڪنٽرولڊ جمهوريت ته ناهي: بلاول

اسلام آباد(بيورو) پيپلز پارٽي جي چيئرمين بلاول ڀٽو زرداري چيو آهي ته حڪومت غلط پاليسين جي ڪري ملڪ کي تباهي ڏانهن ڌڪي رهي آهي. اسلام آباد ۾ نوابزاده نصر الله خان جي ورسي تقريب کي خطاب ڪندي بلاول ڀٽو جو چوڻ هو ته نواب صاحب جي سڄي زندگي جمهوريت جي لاءِ هر حڪومت جي خلاف مخالف ڌر رهي، سندس زندگي جمهوريت پسندن لاءِ سبق آهي. هن چيو ته ملڪ هڪ من پسند سليڪٽيڊ حڪومت جي حوالي ڪيو ويو، سليڪٽيڊ وزير اعظم اهڙيون حالتون پيدا ڪري رهيون جو هر گذرندڙ ڏينهن سان گڏ ڏکيائيون پيدا ٿي رهيون آهن. هن چيو ته خان صاحب پاڻ وڃڻ بدران پنهنجي پرڏيهي وزير کي گڏيل قومن ۾ موڪليو، ٻڌائڻو پوندو ته ڪشمير جو مسئلو اٿارڻ لاءِ وزير اعظم پاڻ گڏيل قومن ۾ ڇو نه ويو. بلاول ڀٽو زرداري چيو ته رڳو سوشل ميڊيا تي پرڏيهي پاليسي جا بيان جاري ٿي رهيا آهن، خدا جي واسطي پرڏيهي پاليسي جهڙي اهم شعبي کي مذاق نه بڻايو.  هن چيو ته ڪشڪول ٽوڙڻ جي دعويٰ ڪندڙن ڪشڪول هٿ ۾ کڻي پنهنجي دور جي شروعات ڪئي پر هي ملڪ چندي تي نٿو هلي سگهي. هن چيو ته عوام سوال ڪري رهيو آهي ته نئين پاڪستان ۽ حڪومت ۾ به ڪنٽرولڊ جمهوريت ته ناهي؟ چيئرمين بلاول چيو ته اليڪشن کان پوءِ پهرين تقرير ۾ دهشتگتدي جي واقعن جي جاچ جو مطالبو ڪيو پر اڄ به دهشتگردي جا متاثر انصاف جي انتظار ۾ آهن. شڪايت آهي ته نه شهيد ذوالفقار علي ڀٽي کي انصاف مليو ۽ نه ئي شهيد بينظير ڀٽو کي انصاف مليو. بلاول ڀٽو زرداري چيو ته ڪشتو ٽوڙڻ جي ڳالههڪندڙن چندو گهرڻ شروع ڪري ڇڏيو آهي ملڪ چندي سان هلي نٿو سگهي، غيرجمهوري دور ۾ عدالتن کي سياسي مقصدن لاءِ استعمال ڪيو ويو، آصف زرداري خلاف ڪوڙا ڪيس ٺاهيا پيا وڃن، 30 سالن کان آصف زرداري عدالتن جا چڪر ڪاٽي رهيو آهي پ پ جلاءُ گهراءُ جي سياست نٿي چاهي عوام ڀڇي ٿو ته نئين پاڪستان ۾ ڪنٽرول جمهوريت ته ناهي، هن چيو ته مني بجيٽ جي نالي تي عوام کي مهانگائي جي بار هيٺيان دٻيو ويو.