پاڪ- افعان وچ ۾ جوائنٽ اڪنامڪ ڪميٽي ۽ گڏيل ايڪشن پلان تي ڪم جاري رکڻ تي اتفاق

0Shares

اسلام آباد (بيورو) پرڏيهي وزير شاهه محمود قريشي افغان صدر اشرف غنيءَ سان ملاقات ڪئي جڏهن ته وفدن جي سطح تي پڻ ڳالهيون ٿيون. تحريڪ انصاف جي حڪومت قائم ٿيڻ کانپوءِ شاهه محمود قريشي پرڏيهي وزير طور پهريون پرڏيهي دورو ڪيو. پرڏيهي وزير شاهه محمود قريشي پنهنجي دوري دوران افغانستان جي اعليٰ ترين قيادت سان ملاقاتون ڪيون. پرڏيهي وزير شاهه محمود قريشي ڪابل هوائي اڏي تي پهتو ته افغان پرڏيهي وزارت جي اعليٰ اختيارين سندس آجيان ڪئي. افعان صدارتي محل آمد تي شاهه محمود قريشي جي سندس افغان هم منصب صلاح الدين رباني آجيان ڪئي. افغان صدر اشرف غني ۽ پرڏيهي وزير شاهه محمود قريشي ۾ ون ٽو ون ملاقات ٿي جيڪا 50 منٽن تائين جاري رهي. ملاقات دوران ٻطرفن لاڳاپن ۽ افغانستان ۾ امن بابت ڳالهيون ڪيون ويون. افغان صدر شاهه محمود قريشي کي پرڏيهي وزارت جو عهدو سنڀالڻ تي مبارڪباد پيش ڪئي. پاڪستان ۽ افغانستان ۾ وفدن جي سطح تي به ڳالهيون ٿيون. وفد جي سطح تي ڳالهين ۾ ٻطرفي واپار، افغانستان ۾ امن قائم ڪرڻ ۾ پاڪستان جي ڪردار، بارڊر مئنيجمينٽ، جلال آباد ۾ پاڪستاني قونصل خاني جي بندش سميت ٻين معاملن تي ڳالهيون ڪيون ويون. آمريڪي پرڏيهي وزير مائيڪ پومپيو جي پاڪستان جي دوري بابت به ڳالهيون ڪيون ويون. ملاقات دوران ٻنهي ڌرين پاران رابطا جاري رکڻ تي اتفاق ڪيو ويو. پرڏيهي آفيس جي ترجمان ڊاڪٽر فيصل موجب پرڏيهي وزير پاران پنهنجي پهرين دوري لاءِ ڪابل جي چونڊ پاڪستان جي افغانستان ۽ علائقائي امن جي اهميت کي اجاگر ڪري ٿي، ڪامياب دوري سان مستقبل ۾ امن ڳالهيون ۽ گڏيل لاڳاپن ۾ وڌيڪ بهتري ايندي. ٻئي طرف پرڏيهي کاتي طرفان شاهه محمود قريشي جي افغانستان جي دوري بابت پڌرائي جاري ڪئي وئي آهي، جنهن موجب شاهه محمود قريشي افغان صدر اشرف غني، چيف ايگزيڪيوٽو عبدالله عبدالله ۽ هم منصب سان ملاقات ڪئي. پرڏيهي وزير افغان قيادت کي خير سگالي جو پيغام پهچايو، ٻنهي ملڪن جوائنٽ اڪنامڪ ڪميٽي ۽ افغانستان پاڪستان ايڪشن پلان تي ڪم جاري رکڻ تي اتفاق ڪيو. پڌرائيءَ موجب ٻنهي ملڪن جلال آباد قونصل خاني جا سيڪيورٽي معاملا جلد حل ڪرڻ تي اتفاق ڪيو ۽ قونصل خانو ٻيهر آپريشنل ڪرڻ تي به اتفاق ڪيو ويو. پرڏيهي کاتي جي ترجمان موجب شاهه محمود قريشي افغان قيادت کي چيو ته افغانستان ۾ امن لاءِ ڪوششن جي حمايت ڪيون ٿا، افغان قيادت هيٺ سياسي عمل جي ڀرپور حمايت ڪيون ٿا ۽ ڪردار نڀائڻ لاءِ تيار آهيون. پڌرائي موجب شاهه محمود قريشي افغان پوليس کي پاڪستان ۾ تربيت ڏيڻ جي آڇ ڪئي ۽ ٻنهي ملڪن وچ ۾ معاملن جي بهتر حل لاءِ رابطا جاري رکڻ تي به زور ڏنو ويو. پرڏيهي کاتي موجب پاڪستان افغانستان امپورٽ تي ريگيوليٽري ڊيوٽي ختم ڪري ڇڏي ۽ پرڏيهي وزير، وزيراعظم عمران خان طرفان 40 هزار ٽن ڪڻڪ جي تحفي جو خط افغان صدر حوالي ڪيو، ان سان گڏوگڏ پرڏيهي وزير شاهه محمود قريشي پنهنجي دوري دوران افغان پناهگيرن جي واپسي جو معاملو به افغان قيادت سامهون اٿاريو.

0Shares

اپنا تبصرہ بھیجیں