اڳوڻي وزيراعظم نواز شريف جي گهرواري بيگم ڪلثوم نواز لنڊن ۾ لاڏاڻو ڪري وئي

لنڊن/لاهور (بيورو+ مانيٽرنگ ڊيسڪ) اڳوڻي وزيراعظم نواز شريف جي گهر واري بيگم ڪلثوم نواز شريف لنڊن ۾ لاڏاڻو ڪري وئي. بيگم ڪلثوم نواز ڪيتري ئي عرصي کان لنڊن جي هارلي اسٽريٽ ڪلينڪ ۾ علاج هيٺ رهي پر سندس صحت ۾ سڌارو نه اچي سگهيو.  بيگم ڪلثوم نواز شريف جي ڦڦڙن جو مسئلو سنگين ٿيڻ کانپوءِ کيس هڪ دفعو ٻيهر وينٽي ليٽر تي منتقل ڪيو ويو پر سندس ساهه جو سڳو ٽٽي پيو. نواز شريف جي پٽ حسن نواز پنهنجي امڙ جي لاڏاڻي جي تصديق ڪري ڇڏي آهي. حسن نواز ميڊيا سان ڳالهائيندي چيو ته سندن امڙ بيگم ڪلثوم نواز لاڏاڻو ڪري وئي آهي. بيگم ڪلثوم نواز جو مڙس نواز شريف، نياڻي مريم نواز ۽ نياڻو ڪئپٽن رٽائرڊ صفدر اڊيالا جيل ۾ قيد آهن. ڪيترائي ڀيرا درخواستن باوجود نواز شريف، مريم نواز ۽ ڪئپٽن صفدر کي پرڏيهه وڃڻ جي اجازت نه ملي سگهي.  بيگم ڪلثوم نواز ڪينسر جي بيماري سبب هڪ سال 25 ڏينهن تائين لنڊن ۾ علاج هيٺ رهي، سندس مڙس نواز شريف عدالتن ۾ ڪيسن جي  شنوائين دوران  ٻه ڀيرا عيادت لاءِ لنڊن ويو هو، نواز شريف ڪلثوم نواز جي عيادت جي سلسلي م لنڊن ۾ موجود هجڻ سبب احتساب عدالت ايون فيلڊ ريفرنس ۾ قيد جي سزا ٻڌائي هئي ۽ هو پنهنجي ڌيءُ مريم نواز سان گڏ گرفتاري ڏيڻ لاءِ پاڪستان آيو ٻئي طرف شريف خاندان طرفان بيگم ڪلثوم نواز جو مڙهه جمع تي ڏيهه آندو ويندو ۽ تياريون مڪمل ڪيون آهن. شريف خاندان پاران چيو ويو آهي ته بيگم ڪلثُم نوازا جي مڙهه کي جمعي تي جاتي امراءُ ۾ مٽي ماءُ حوالي ڪيو ويندو. بيگم ڪلثوم نواز جي لاڏاڻي جي خبر شهباز شريف ۽ ٻين ليگي اڳواڻن اڊيالا جيل پهچي نواز شريف ۽ مريم نواز کي ٻڌائي، بيگم ڪلثوم نواز جو مڙهه لنڊن کان ڏيهه آڻڻ لاءِ تياريون  ڪيون ويون آهن مرحرم بيگم ڪلثوم نواز جي عمر 68 سال هئي هن سياست ۾ پڻ اهم ڪردار ادا ڪيو.