افغانستان ۾ طالبان جا فوجي چوڪين تي حملا، 30 اهلڪار مارجي ويا

ڪابل (م ڊ) افغانستان جي صوبي بغلان ۾ طالبان ويڙهاڪن سيڪيورٽي فورسز جي چوڪين تي حملو ڪري 30 اهلڪارن کي قتل ڪري ڇڏيو.عالمي خابرو اداري موجب درجنين طالبان ويڙهاڪن افغانستان جي صوبي بغلان ۾ فوجي ۽ پوليس چوڪين تي حملو ڪري ڏنو جنهن جي نتيجي ۾ 30 افغان سيڪيورٽي اهلڪار مارجي ويا. افغان سيڪيورٽي اختيارين جو چوڻ آهي ته گذريل رات طالبان ويڙهاڪن بغلان صوبي جي 5 آرمي ۽ 8 پوليس چوڪين تي قبضو ڪري ورتو آهي ۽ عام شهرين کي به نشانو بڻايو جڏهن ته سيڪيورٽي اهلڪان جي مارجڻ جي حوالي سان سرڪاري سطح تي تصديق نه ڪئي وئي آهي. هوڏانهن افغان صوبي بادغيس پوليس جي ترجمان نقيب الله اميني دعويٰ ڪئي آهي ته ابڪماري ضلعي ۾ سيڪيورٽي فورسز سان جهڙپ ۾ طالبان ڪمانڊر مولوي نذير پنهنجي 11 ويڙهاڪن سان گڏ مارجي ويو آهي. ٻئي طرف ڪابل ۾ خودڪش ڌماڪي ۾ 3 ڄڻا مارجي ويا ۽ 14 کان وڌيڪ زخمي ٿي پيا آهن، خودڪش ڌماڪو موٽرسائيڪل سوار شخص افغان ليڊر احمد شاهه مسعود جي 17 هين ورسي ۾ شرڪت لاءِ ويندڙ قافلي تي ڪيو. ٻئي طرف پاڪستان افغان گادي واري هنڌ ڪابل ۾ ٿيندڙ دهشتگرداڻي حملي جي مذمت ڪندي جاني نقصان تي ڏک جو اظهار ڪيو آهي.پرڏيهي وزارت جي ترجمان ڊاڪٽر فيصل هڪ بيان ۾ آچر تي ٿيندڙ ڪابل حملي ۾ مارجي ويل ماڻهن جي وارثن سان تعزيت جو اظهار ۽ زخمين سان همدردي جو اظهار ڪيو آهي. ترجمان چيو آهي ته ڏک جي هن گهڙي ۾ اسان جون همدرديون متاثر خاندانن سان گڏ آهن، اسان حملي ۾زخمي ٿيندڙ ماڻهن جي جلد صحتيابي لاءِ دعاگو آهيون. ترجمان وڌيڪ چيو ته اسان دهشتگردي جي هر قسم جي مذمت ڪريون ٿا، دهشتگردي خلاف جنگ ۾ افغان حڪومت ۽ عوام سان گڏ بيٺل آهيون. ياد رهي ته ڪابل ۾ ٿيندڙ خودڪش حملي ۾ گهٽ ۾ گهٽ 7 ڄڻا مارجي ويا ۽ 25 کان وڌيڪ زخمي ٿي پيا هئا.