سنڌ ڪابينا ۾ واڌ، ناصر شاهه ورڪس اينڊ سروسز ۽ مڪيش چاولا ايڪسائيز ۽ ٽيڪسيشن جا وزير بڻجي ويا

0Shares

ڪراچي (اسٽاف رپورٽر) سنڌ جي وڏي وزير سيد مراد علي شاهه وڌيڪ چئن وزيرن کي سندس ڪابينا ۾ شامل ڪيا. انهن وزيرن جي شامل ٿيڻ سان صوبائي ڪابينا جي ميمبرن جو انگ 12 ٿي ويو آهي ۽ ٻه صوبائي صلاحڪار پڻ آهن. وڏي وزير سيد مراد علي شاهه اربع ڏينهن وڌيڪ چار وزير ڪابينا ۾ شامل ڪيا، نون وزيرن ۾ مڪيش ڪمار چاولا، امتياز احمد شيخ، سيد ناصر شاهه ۽ فراز احمد ڏيرو شامل آهن. مڪيش ڪمار چاولا جو لاڳاپو ضلعي ڪشمور ڪنڌڪوٽ مان آهي ۽ هُو خاص سيٽ تي ايم پي اي آهي، هو پيپلز پارٽي جي گذريل حڪومت ۾ ايڪسائيز اينڊ ٽيڪسيشن هو. امتياز احمد شيخ هڪ اڳوڻو بيوروڪريٽ ۽ سياستدان آهي، جيڪو شڪارپور مان صوبائي اسيمبلي ميمبر چونڊيو آهي، هُو گذريل حڪومتن دوران ڪيترائي ڀيرا صوبائي وزير رهيو آهي. سيد ناصر حسين شاهه روهڙي ضلعي سکر مان صوبائي اسيمبلي ميمبر چونڊيو آهي ۽ هي سنڌ ۾ پيپلز پارٽي جي گذريل حڪومت ۾ سڌسماءَ وارو صوبائي وزير هو. فراز ڏيرو ٽنڊو آدم ضلعي سانگهڙ مان ايم پي اي مقرر ٿيو آهي، هُو پيپلز پارٽي پاران ٻيو ڀيرو ايم پي اي بڻيو آهي ۽ پهريون ڀيرو صوبائي وزير ٿيو آهي. گورنر سنڌ عمران اسماعيل نون چونڊيل وزيرن کان گورنر هائوس ۾ منعقد هڪ سادي تقريب ۾ حلف ورتو. حلف برداري تقريب ۾ پيپلز پارٽي سنڌ جو صدر نثار کهڙو، صوبائي وزيرن ۽ صوبائي صلاحڪارن ۽ چيف سيڪريٽري ۽ انسپيڪٽر جنرل پوليس، وزيرن جي خاندان جا ميمبر ۽ سول سوسائٽي جي ميمبرن شرڪت ڪئي. وڏي وزير ۽ گورنر سنڌ حلف برداري کانپوءِ صوبائي وزيرن کي واڌايون ڏنيون. ٻئي طرف سنڌ ڪابينا ۾ شامل نون وزيرن کي کاتا به الاٽ ڪيا ويا جنهن جو نوٽيفڪيش پڻ جاري ڪيو ووي، نوٽيفڪيشن موجب ناصر شاهه کي ورڪس اينڊ سروسز، ڪميش ڪمار چاولا کي ايڪسائيز اينڊ ٽيڪسيشن، امتياز شيخ کي توانائي ۽ فراز ڏيرو کي اوقاف، مذهبي معاملا ۽ عشر زڪوات جا معاملا ڏنا ويا.

0Shares

اپنا تبصرہ بھیجیں