وفاقي سرڪار پاران مني لانڊرنگ ۽ اسمگلنگ جي خاتمي لاءِ قانون ۾ ترميم جو فيصلو، اٽارني جنرل جي سربراهي ۾ ڪميٽي قائم

اسلام آباد(بيورو) وزير اعظم عمران خان جي صدارت هيٺ ٿيل اجلاس ۾ اسمگلنگ ۽ مني لانڊرن جي خاتمي لاءِ قانون ۾ ضروري ترميم جو فيصلو ڪيو ويو آهي.  وزير اعظم جي صدارت هيٺ اسمگلنگ ۽ مني لانڊرنگ جي خاتمي بابت اعليٰ سطحي اجلاس ٿيو جنهن ۾ ناڻي واري وزير اسد عمر، مملڪتي گهرو وزير شهريار آفريدي، وزير اعظم جي صلاحڪار ڊاڪٽر عشرت حسين ۽ نعيم الحق سميت اسٽيٽ بينڪ جي گورنر ۽ ناڻي واري ۽ گهرو سيڪريٽرين به شرڪت ڪئي. اجلاس ۾ سيڪريٽري ڪامرس ۽ ايف بي آر اختيارين طرفان اسمگلنگ ۽ مني لانڊرنگ بابت بريفنگ ڏني وئي. وزير اعظم عمران خان کي رقم جي غير قانوني اچ وڃ سبب قومي معيشت کي ٿيل نقصانن تي تفصيلي بريفنگ ڏني وئي. پڌرائي موجب اجلاس ۾ اسمگلنگ ۽ مني لانڊرنگ جي خاتمي لاءِ قانون ۾ ضروري ترميمن جو فيصلو ڪيو ويو. موجوده قانون ۾ ضروري ترميم لاءِ اٽارني جنرل جي سربراهي ۾ ڪميٽي قائم ڪئي وئي آهي. پڌرائي موجب ڪميٽي ڪسٽم، اسٽيٽ بينڪ، ايف بي آر ۽ ايف آءِ اي جي نمائندن تي ٻڌل هوندي.  ڪميٽي ايندڙ هڪ هفتي ۾ پنهنجون سفارشون پيش ڪندي. وزير اعظم گهرو وزارت کي انتظامي بندوبست بابت گهربل حڪمت عملي جون سفارشون هڪ هفتي ۾ پيش ڪرڻ جي هدايت به ڪئي. ٻئي طرف وزيراعظم عمران خان جي صدارت هيٺ سستن گهرن جي اڏاوت بابت اجلاس ۾ ملڪ ۾ 50 لک سستن گهرن جي اڏاوت بابت غور ويچار ڪيو ويو. وزيراعظم عمران خان جي صدارت هيٺ سستن گهرن جي اڏاوت بابت اجلاس ڪوٺايو ويو. اجلاس ۾ يعقوب اظهار، نجيب هارون، ارشاد داد، سيڪريٽري هائوسنگ اينڊ ورڪس ڊاڪٽر زيب خان، سيڪريٽري قانون جسٽس رٽائرڊ عبدالشڪور پراچا ۽ ٻين عهديدارن شرڪت ڪئي. وزيراعظم سستن گهرن جي اڏاوت بابت سڪريٽري هائوسنگ جي سربراهيءَ ۾ ڪميٽي جوڙي ڇڏي جيڪا هفتي ۾ سفارشون وزيراعظم کي پيش ڪندي. اجلاس کي خطاب ڪندي وزيراعظم عمران خان چيو ته 50 لک سستن گهرن جي اڏاوت سندس پهرين ترجيح ۾ شامل آهي، سستن گهرن جي اڏاوت سان عوام جا رهائشي مسئلا حل ٿيندا، سستن گهرن سان اقتصادي ترقي سان گڏ روزگار جا موقعا پيدا ٿيندا. هن چيو ته غريبن کي بي گهر ڪرڻ کانسواءِ ڪچين آبادين کي ريگوليٽ ڪيو ويندو. وزيراعظم چيو ته گهرن جي اڏاوت ۾ خانگي شعبي جي حوصلا افزائي ڪئي ويندي.