پنهنجا اثاثا ظاهر نه ڪندڙن تي مني لانڊرنگ جو ڪيس ٺهي ٿو: سپريم ڪورٽ

 اسلام آباد ( بيورو ) چيف جسٽس ميان ثاقب نثار پرڏيهه ۾ ملڪيتن بابت ڪيس جي ۾ رمارڪس ڏيندي چيو آهي ته پرڏيهه مان رقم جي واپسي بابت اڳڀرائي تي مطمئن نه آهيون، پنهنجا اثاثا ظاهر نه ڪندڙن تي مني لانڊرنگ جو ڪيس ٺهي ٿو. سپريم ڪورٽ ۾ چيف جسٽس ثاقب نثار جي سربراهيءَ ۾ پرڏيهه ملڪيتن بابت پاڻمرادو نوٽيس ڪيس جي ٻڌڻي ٿي، اسٽيٽ بئنڪ جو گونر طارق باجوه پيش ٿيو. اسٽيٽ بئنڪ جي گورنر عدالت کي آگاهه ڪيو ته لنڊن اٿارٽيز 225 ماڻهن جي ملڪيتن جي ڄاڻ ايف بي آر کي موڪلي جڏهن ته عدالتي معاون شبر زيدي ٻڌايو ته ايف بي آر 300 ماڻهن جي پرڏيهه ۾ ملڪيتن تي نوٽيس جاري ڪيا ويا آهن ۽ وڌيڪ رقم هنڊي ذريعي پرڏيهه منتقل ٿي. هن چيو ته پرڏيهه رقم جي منتقلي جي حوالي سان اڳڀرائي تي مطمئن نه آهن، ايمنسٽي اسڪيم باوجود رقم ۽ ملڪيتون ٻاهر پيل آهن. اسٽيٽ بئنڪ جي گورنر چيو ته دبئي اٿارٽي کي چونداسين ته ملڪيتون نه مڃيندڙن خلاف بي نامي قانون تحت ڪارروائي ڪن، جن ملڪيتون حاصل ڪيون تن کان ذريعا طلب ڪنداسين. جسٽش اعجاز الحسن چيو ته ڇا هي اهي ماڻهو آهن جيڪي پاڪستان ۾رهندا آهن ۽ ٻار ملڪيتون ٺاهيندا آهن، جسٽس عمر عطا بنديال چيو ته توهان جي ڪميٽي جا ٽي او آر ساده آهن، هي اهي ماڻهو آهن جيڪي پئسا چوري ڪري ٻاهر موڪليندا آهن. چيف جسٽس ثاقب نثار رمارڪس ڏيندي چيو ته اسان معاملي تي پنج مهينا اڳ پاڻمرادو نوٽيس ورتو پر اڳڀرائي سست آهي. جسٽس عمر عطا بنديال چيو ته ايمنسٽي اسڪيم ۾ 2 سيڪڙو ٽيڪس رکيو ويو جيڪا گهٽ هو، انڊونيشيا 17 سيڪڙو ٽيڪس رهي اتي اها اسڪيم ڪامياب رهي، رپورٽ موجب ايمنسٽي اسڪيم سان لڳ ڀڳ 8 ارب ڊالر جي ملڪيت ظاهر ڪئي وئي آهي.جسٽس ثاقب نثار طارق باجوه کان پڇاڻو ڪيو ته ڇا گورنر اسٽيٽ بئنڪ، سمورا ماڻهو موجود آهن، 100 ماڻهن جا نالا ڏيو باقي ڪم اسان پاڻ ڪنداسين، ايف بي آر کان وڌيڪ عدليه پاڪستان جي اسٽيٽ آهي، پنهنجا اثاثا ظاهر نه ڪندڙن تي مني لانڊرنگ جو ڪيس ٺهي ٿو.

اپنا تبصرہ بھیجیں