ايشين گيمز مينز هاڪي ۾ جاپان ملائيشيا کي شڪست ڏئي پهريون ڀيرو گولڊ ميڊل کٽي ورتو

0Shares

جڪارتا(اسپورٽس نيوز) ايشين گيمز جي هاڪي فائينل ۾ انتهائي سنسني خيز مقابلي کانپوءِ جاپان پهريون ڀيرو چئمپين بڻجڻ جو اعزاز حاصل ڪري ورتو. ڇنڇر ڏينهن ٿيندڙ مئچ ۾ جاپان ملائيشيا کي پنلٽي شوٽ آئوٽ تي 1-3 تان شڪست ڏئي پهريون ڀيرو چئمپين بڻجي ويو. هڪ موقعي تي جاپان جي ٽيم 5-2 جي خساري ۾ هئي پر آخري لمحن ۾ حيران ڪن راند پيش ڪندي ڪاميابي پنهنجي نالي ڪئي. ايشين گيمز 2018ع ۾ هاڪي ايونٽ جي فائينل ۾ پهرين ئي پيريڊ ۾ ڪافي تيز رفتار سان راند ڏسڻ ۾ آئي. ملائيشيا چوٿين ئي منٽ ۾ ان وقت برتري حاصل ڪئي جڏهن محمد رضي عبدالرحيم پنالٽي ڪانر تي گول ڪري ورتو. پر نائين منٽ ۾ جاپان جي سيرن تناڪا گول ڪري ميچ هڪ هڪ گول تان برابر ڪري ڇڏي. پر ٻن منٽن کانپوءِ ئي ٽينگڪو احمد تاج الدين هڪ ٻئي پٺيان ٻه گول ڪري هڪ ڀيرو ٻيهر ملائيشيا مٿان 1-3 جي سرسي حاصل ڪري ورتي. ٻئي پيريڊ ۾ به ملائيشيا ميچ تي پنهنجي ڪنٽرول برقرار رکيو ۽ راند جي 17 هين منٽ ۾ فيصل ساري گول ڪري پنهنجي ٽيم جي برتري کي 1-4 سان گڏ وڌيڪ مستحڪم ڪري ڇڏيو. ٽن گولن جي خساري ۾ وڃڻ باوجود جاپاني رانديگرن حريف ٽيم تي حملا جاري رکيا ۽ 23 هين منٽ ۾ ڪينتا تناڪا گول ڪري اسڪور 2-4 تي پهچايو. راند جو ٻيو پيريڊ ان اسڪور تي ختم ٿيو جڏهن ته ٽئين پيريڊ ۾ ڪابه ٽيم گول اسڪور نه ڪري سگهي. چوٿين پيريز ۾ جاپان بهترين راند جو مظاهرو ڪيو ۽ 50 هين منٽ ۾ 2-5 جي خساري باوجود هڪ ٻئي پٺيان 3 گول اسڪور ڪري 58 هين منٽ ۾ ميچ 5-5 تان برابر ڪري ڇڏيو. ميچ جي سنسني خيزي اتي ختم نه ٿي، ايندڙ منٽ ۾ ملائيشيا جي ٽينگڪو احمد تاج الدين گول ڪري نه صرف پنهنجي ٽيم کي برتري ڏياري بلڪ هيٽ ٽرڪ به مڪمل ڪري ورتي. جاپان جي هيروماسا اوچيائي ميچ جي آخري لمحن ۾ پنالٽي شوٽ آئوٽ تي گول ڪري ميچ هڪ ڀيرو ٻيهر 6-6 تان برابر ڪري ڇڏي. ان کانپوءِ مئچ جي فيصلي لاءِ پنالٽي شوٽ آئوٽ تي فيصلو ڪيو ويو ۽ ٻنهي ٽيمن کي پنج پنج پنالٽي شوٽ آئوٽ ڏنا ويا. پنالٽي شوٽ آئوٽ ۾ ملائيشيا جي رانديگر نروس نظر آيو ۽ لڳاتار ٽي پنالٽي شوٽ آئوٽ ضايع ڪيا. ايشين گيمز هاڪي جي فائينل ۾ جاپان ملائيشيا کي سخت مقابلي بعد شڪست ڏئي سون جو ميڊل پنهنجي نالي ڪري ورتو. سيمي فائينل ۾ ملائيشيا ڀارت جڏهن ته جاپان پاڪستان کي شڪست ڏني هئي. ٽئين پوزيشن جي ميچ ۾ ڀارت پاڪستان کي 1-2 تان هارائي ڪانسي جو ميڊل پنهنجي نالي ڪيو هو.

0Shares

اپنا تبصرہ بھیجیں