آمريڪا پاڪستان جي 36 ارب 90 ڪروڙ رپين جي امداد روڪي ڇڏي

0Shares

واشنگٽن(م ڊ) آمريڪا پاڪستان جي 30 ڪروڙ ڊالر يعني 36 ارب 90 ڪروڙ رپين جي امداد روڪڻ جو حتمي فيصلو ڪري ورتو. پينٽاگون جي ترجمان ليفٽيننٽ ڪرنل ڪون فالڪنر چيو آهي ته پاڪستان دهشتگردن خلاف فيصلائتي ڪارروائي ناهي ڪئي، تنهنڪري 30 ڪروڙ ڊالر جي امداد روڪي وئي آهي، جيڪڏهن ڪانگريس منظوري ڏني ته اها رقم ٻين هنگامي ترجيحن تي خرچ ڪئي ويندي. پينٽاگون جي ترجمان چيو ته امداد روڪڻ جو فيصلو آمريڪي دفاع واري وزير ڪيو. آمريڪا امداد روڪڻ جو قدم اهڙي وقت ۾ کنيو آهي، جڏهن آمريڪي پرڏيهي وزير مائيڪ پومپيو ۽ جنرل جوزف ڊنفورڊ کي ايندڙ هفتي پاڪستان جو دورو ڪرڻو آهي. ٻئي طرف آمريڪي عهديدار جو چوڻ آهي ته امداد جي معطلي جو نوٽيفڪيشن سيپٽمبر جي آخر تائين پاڪستان ڏانهن اماڻڻ جو امڪان آهي. 2002 کان هن وقت تائين پاڪستان کي 33 ارب ڊالر جي امداد ملي چڪي آهي، جنهن ۾ 14 ارب ڊالر ڪوليشن سپورٽ فنڊز جا به شامل آهن. آمريڪا جي الزامن تي پاڪستان جو موقف رهيو آهي ته سڀني دهشتگردن خلاف بنا فرق جي ڪارروائي ڪئي آهي ۽ وزيرستان ۾ آپريشن ان جو واضح ثبوت آهي. واضح رهي ته هلندڙ سال جي شروع ۾ به ڪانگريس پاڪستان جي 50 ڪروڙ ڊالر جي امداد روڪي هئي، اهڙي طرح روڪي امداد جي مجموعي ماليت 80 ڪروڙ ڊالر ٿي وئي آهي.  پرڏيهي وزير شاهه محمود قريشي چيو آهي ته آمريڪا امداد نه پر ڪوليشن سپورٽ فنڊ جي اها رقم روڪي آهي، جيڪا پاڪستان دهشتگردي خلاف خرچ ڪري چڪو آهي. اسلام آباد ۾ پريس ڪانفرنس ڪندي شاهه محمود قريشي آمريڪي بچاءَ واري کاتي طرفان 30 ڪروڙ ڊالر امداد رد ڪرڻ جي فيصلي تي ردعمل ڏيندي چيو ته 5 سيپٽمبر تي آمريڪي پرڏيهي وزير پاڪستان جي دوري تي اچي رهيو آهي، ڪوشش هوندي ته پاڪ – آمريڪا لاڳاپا بهتر بڻايون، آمريڪي پرڏيهي وزير سان نئين رشتي تي ڳالهه ٻولهه ٿيندي ۽ سندس خدمت ۾ پنهنجو نڪتو پيش ڪنداسين. هن چيو ته خطي ۾ امن ۽ استحڪام لاءِ پاڪستان قربانيون ڏنيون، اسان جو عزم آهي ته خطي ۽ دنيا کي دهشتگردي کان پاڪ ڪيون. سندس چوڻ هو ته آمريڪا امداد نه پر اتحادي سپورٽ فنڊ جي مد ۾ ڊالر ڏئي رهيو هو، آمريڪا کي رقم مدد لاءِ نه پر ڪوليشن سپورٽ فنڊ جي مد ۾ ڏيڻي هئي، اهو اسان جو پئسو آهي ۽ اسان خرچ ڪيو، اهو پئسو امن، استحڪام لاءِ ۽ دهشتگردي جي خاتمي تي خرچ ٿيو، هي اهو پئسو آهي جيڪو پاڪستان پنهنجي وسيلن سان خرچ ڪيو ۽ آمريڪا کي موٽائي ڏيڻو هو. شاهه محمود قريشي چيو ته آمريڪا اڳوڻي حڪومت جي دور ۾ ئي فنڊ معطل ڪري ڇڏيو هو، اهو تاثر نه ڏنو ته هي ڇا ٿي ويو، اها ڪا نئين ڳالهه ناهي. هن چيو ته جي ايڇ ڪيو ۾ وزيراعظم کي ڏنل بريفنگ ملڪي مفاد ۾ آهي، پاڪستان اندرين سيڪيورٽي چئلينجن کي منهن ڏئي رهيو آهي، اسان جي ڪوشش آهي ته گڏيل مفادن کي نظر ۾ رکي اڳتي وڌون.

0Shares

اپنا تبصرہ بھیجیں