پنجاب ۾ بلدياتي نظام تبديل ڪرڻ جو فيصلو، بدعنواني جو خاتمو سڀ کان وڏو چئلينج آهي: وزيراعظم

لاهور (بيورو) وزيراعظم عمران خان چيو آهي ته پنجاب ۾ بدعنواني جو خاتمو سڀ کان وڏو چئلينج آهي. پنجاب ڪابينا جي ميمبرن سان ملاقات دوران ڳالهائيندي عمران خان چيو ته پنجاب حڪومت جي ڪارڪردگي ٻين صوبن جي ڀيٽ ۾ ساراهه جوڳي هجڻ گهرجي، ڪابينا ميمبر بدعنوانين تي نشاندهي کي پنهنجي پهرين ترجيح بڻائين. ملاقات دوران وزيراعظم پنجاب ۾ زمينن تي قبضي ۽ حد دخلين تي ڳڻتيءَ جو اظهار ڪندي چيو ته ان ۾ مافياز ۽ وڏا گروپ ملوث آهن، انهن خلاف ڪارروائي ڪئي وڃي. هن وڏي وزير عثمان بوزدار کي هدايت ڪئي ته پنجاب ۾ حد دخلين خلاف فوري طور مهم شروع ڪئي وڃي، زمينن تي قبضو ڪندڙن خلاف به ڪارروائي ڪئي وڃي، ان ڏس ۾ صوبائي حڪومت جي ڀرپور مدد ڪئي ويندي. عمران خان چيو ته سادگي اختيار ڪرڻ جي ضرورت آهي، پنجاب ڪابينا جا ميمبر ٽيڪس ڏيندڙن جو پئسو بچائيندي مثال قائم ڪن، اسان کي پنهنجا خرچ محدود ڪري انساني ترقي تي سيڙپڪاري ڪرڻي آهي، خطي ۾ پاڪستان جو هيومن دولپمينٽ انڊيڪس سڀ کان گهٽ آهي. هن پنجاب ڪابينا ميمبرن کي هدايت ڪئي ته 100 ڏينهن جي ايجنڊي تي عمل لاءِ اڻٿڪ ڪم ڪيو وڃي، پنجاب جو دورو ڪندو رهندس ۽ 100 ڏينهن جي ايجنڊي جو جائزو وٺندس. ٻئي طرف وزيراعظم عمران خان گرين پاڪستان مهم جي شروعات ڪري ڇڏي آهي. وزيراعظم عمران خان ۽ پنجاب جي وڏي وزير عثمان بوزدار ايوان وزيراعليٰ ۾ ٻوٽا پوکيا. ان موقعي تي ڳالهائيندي وزيراعظم عمران خان چيو ته پنجاب پوليس کي سياسي اثر رسوخ کان آزاد ڪرايو ويندو. هن چيو ته سرڪاري آفيسرن کي ڳرين پگهارن تي ڀرتي نه ڪيو ويندو. سندس چوڻ هو ته پنجاب ۾ ڪي پي طرز تي مڪاني ادارن جو نظام آندو ويندو. وزيراعظم عمران خان چيو ته 100 ڏينهن اندر صحت ۽ تعليم ۾ تبديلي جو پلان واضح ڪيو ويندو، سبسڊي تي هلندڙ منصوبن جي فوري طور آڊٽ ڪرائي ويندي. ٻئي طرف وزيراعظم عمران خان جي صدارت هيٺ پنجاب ڪابينا  جو اجلاس ٿيو. اجلاس ۾ ضمنتي چونڊن ۽ ٽڪيٽن جي ورهاست ۽ ٻيا معاملا غور هيٺ آيا. وزيراعظم عمران خان پنجاب ۾ بلدياتي نظام تبديل ڪرڻ جي هدايت ڪئي.  هن چيو ته 100  ڏينهن واري پلان تي عملدرآمد  تيزي سان جاري رکيو وڃي. صحت، تعليم ۽ صاف  پاڻي جي فراهمي واري شعبي  ۾  تبديلي  نظر اچڻ گهرجي  وزيراعظم وزيرن پنهنجي  کاتن ۾ ڪفايت شعاري اختيار ڪرڻ جي هدايت ڪندي چيو ته پوليس کي سياسي مداخلت کان آزاد ڪيو وڃي.  ٻئي طرف وزيراعظم سول سيڪريٽريٽ ۾ صوبائي سيڪريٽرين  کي خطاب ڪندي چيو ته ملڪ هلائڻ بيورو ڪريسي  جو اهم ڪردار آهي. مشڪل حالتن ۾ بيورو ڪريسي کي اهم فيصلا ڪرڻا پوندا. اسان کي اوهان کي  ڪارڪردگي ڏيکارڻ جو پورو موقعو ڏينداسين.  بيورو ڪرسي جي ڪم ۾ مداخلت نه ڪئي ويندي. وزيراعظم سبسڊي  تي هلندڙ منصوبن جي فوري آڊٽ ڪرائڻ جي هدايت ڪئي.  ڪنهن به سرڪاري آفيسر کي ڳرين پگهارن تي ڀرتي نه ڪرڻ جي هدايت ڪئي. هنچيو ته پنجاب  حڪومت جي ڪارڪردگي  ٻين صوبنلاءِ ٽرينڊ سينٽر هجڻ گهرجي. ڪابينا ميمبرن  جي پهرين ترجيح بدعنواني جو خاتمو هجڻ گهرجي.