پ پ کي ڌچڪو، اڳوڻو صوبائي وزير حاجي مظفر شجراع ۽ قادر بخش بلوچ پي ٽي آءِ ۾شامل

ملير/گلشن اقبال (ڊ ر+ ن هه) پيپلز پارٽي جو اڳوڻو صوبائي وزير مظفر شجراع ۽ ملير جي پي ايس 87 جي جنرل سيڪريٽري قادر بخش بلوچ ساٿين سميت تحريڪ انصاف ۾ شموليت جو اعلان ڪري ڇڏيو. مظفر شجراع ۽ قادر بخش بلوچ جي پي ٽي آءِ ۾ شموليت کانپوءِ ملير ۾ ٿيندڙ پي ايس 87 جي  ضمني چونڊ ۾ پيپلز پارٽي مشڪلات جو شڪار، اسان تحريڪ انصاف ۾ شامل ٿي عوام جي خدمت ڪرڻ چاهيون ٿا. خبر موجب پيپلز پارٽي ڪراچي ڊويزن جي اڳوڻي صدر ۽ اڳوڻي صوبائي وزير حاجي مظفر شجراع ۽ ملير جي پي ايس 87 جي جنرل سيڪريٽري قادربخش بلوچ پنهنجي ساٿين سميت تحريڪ انصاف ۾ شموليت جو اعلان ڪري ڇڏيو. پي پي اڳواڻن پاران انصاف هائوس ۾ پي ٽي آءِ ڪراچي ڊويزن جي صدر شميم نقوي، ضلع ملير جي صدر ڊاڪٽر مسرور سيال ۽ ٻين اڳواڻن جي موجودگي ۾ باقاعده پي ٽي آءِ ۾ شموليت جو اعلان ڪيو آهي. اهڙي صورتحال بعد ملير جي پي ايس 87تي 14 آڪٽوبر تي ٿيندڙ ننڍيون چونڊون اهميت اختيار ڪري ويون آهن. ضمني چونڊن ۾ پي پي کي سخت مشڪلات کي منهن ڏيڻو پئجي ويندو. پي پي جي اهم اڳواڻن جي پي ٽي آءِ ۾ شموليت کانپوءِ ملير جو سياسي وايو منڊل تبديل ٿي ويو آهي. ڪيترائي اڳواڻ ۽ ڪارڪن پي ٽي آءِ ۾ شامل ٿيڻ جي تيارين ۾ آهن. ٻئي طرف ان حوالي سان پي ٽي آءِ سنڌ جي سنيئير ايگزيڪيوٽو نائب صدر حليم عادل شيخ ملير جي صحافين سان ڳالهائيندي چيو ته ملير مان پي پي جي تڏا ويڙهه ٿي چڪي آهي ملير ۾ تبديلي جي شروعات ٿي چڪي آهي. حاجي مظفر شجراع ۽ قادر بخش بلوچ کي پي ٽي آءِ ۾ ڀليڪار چئون ٿا. اهڙن سٺن ماڻهن جي پي ٽي آءِ ۾ شموليت سان پي ٽي آءِ ملير سميت سڄي سنڌ ۾ مضبوط ٿيندي. هن چيو ته تمام جلد سڄي سنڌ مان پي پي ۾ ويٺل حق ۽ سچ جي ڳالهه ڪندڙ اهم شخصيتون پي ٽي آءِ ۾ شموليت ڪنديون. هوڏانهن قادر بخش بلوچ چيو ته پيپلز پارٽي ملير جي قيادت ملير کي تباهي ڪناري پهچايو آهي. ملير جي ٻهراڙين جي ڪيترائي ڳوٺ اڄ به  بنيادي سهوليتن کان محروم بڻيل آهن. اسان هاڻي عمران خان جي قيادت ۾ ملير ۾ به تبديل آڻڻ چاهيون ٿا.  ملير ۾ گڏيل پريس ڪانفرنس ڪندي قادر بخش بلوچ ۽ حاجي مظفر شجراع چيو ته ڪرپشن ختم ڪرڻ واري ڳالهه تي اسان عمران خان سان گڏ آهيون، اسان ملير سميت سنڌ جي تبديلي چاهيون ٿا، ماڻهن وٽ پيئڻ جو پاڻي ناهي، علاج لاءِ اسپتال ۽ بهتر تعليمي نظام ناهي، ملير جو عوام پيئڻ جي پاڻي ڦڙي لاءِ تڙپي رهيو آهي، عوام جا مسئلا حل ڪرائڻ لاءِ اسان جي جدوجهد هميشه جاري رهندي، ان موقعي تي پي ٽي آءِ اڳواڻ فردوس شميم نقوي چيو ته اسان قادر بخش بلوچ ۽ حاجي مظفر شجراع کي پي ٽي آءِ ۾ شامل ٿيڻ جي آجيان ڪيون ٿا، اسان کي سنڌ جي ماڻهن جيڪو مينڊيٽ ڏنو آهي، ان تي پورو لهڻ جي ڀرپور ڪوشش ڪنداسين، سنڌ ۾ تبديلي آڻي عوام جا مسئلا اوليت جي بنياد تي حل ڪنداسين.

اپنا تبصرہ بھیجیں