نواز، مريم ۽ صفدر عيد جيل ۾ گذاريندا، هاءِ ڪورٽ سزا خلاف محفوظ ڪيل فيصلو ملتوي ڪري ڇڏيو

0Shares

اسلام آباد (بيورو) اسلام آباد هاءِ ڪورٽ ۾ اڳوڻي وزيراعظم نواز شريف، مريم نواز ۽ ڪيپٽن (ر) صفدر جي سزائن خلاف اپيلن تي فيصلو محفوظ ڪري ورتو. اسلام آباد هاءِ ڪورٽ جي جسٽس اطهر من الله ۽ جسٽس ميان گل حسن اورنگزيب تي ٻڌل ٻه رڪني بئنچ شريف خاندان جي سزا خلاف داخل اپيلن تي ٻڌڻي ڪئي. ٻڌڻي دوران نيب جي ڊپٽي پراسيڪيوٽر سردار مظفر عباسي پنهنجا دليل مڪمل ڪيا، جنهن کانپوءِ عدالت درخواستن تي فيصلو محفوظ ڪيو. ٻڌڻي دوران نيب موقف اختيار ڪيو ته سپريم ڪورٽ جي حڪم تي شريف خاندان خلاف ريفرنس داخل ڪيا ۽ عدالت عظميٰ جي حڪم تي گڏيل جاچ ٽيم ٺاهي وئي. سردار مظفر عباسي چيو ته لنڊن فليٽس نيلسن ۽ نيسڪول جي نالي تي هئا، اسان دستاويزن سان ثابت ڪري ڇڏيو ته انهن ڪمپنين جو مالڪ نواز شريف آهي ۽ اهي فليٽ سندس ئي ملڪيت آهن، جڏهن ته انهن فليٽن جي ملڪيت ثابت ڪرڻ نواز شريف جو ئي ڪم آهي. نيب عدالت کي درخواست ڪئي ته نواز شريف ۽ ٻين جوابدارن کي جيل ۾ ئي رکيو وڃي ۽ سزا معطل ڪرڻ جي درخواست خارج ڪئي وڃي، جنهن تي جسٽس اطهر من الله چيو ته هن وقت ڪو فيصلو ڌرين کي متاثر ڪري سگهي ٿو، عام موڪلن کانپوءِ اهي درخواستون اپيل سان گڏ ٻڌنداسين. جسٽس اطهر من الله، نواز شريف جي وڪيل خواجا حارث کي مخاطب ٿيندي چيو ته توهان کي اها صلاح ڏينداسين، جيڪا توهان جي حق ۾ هجي، فيصلو لکندي اسان کي سبب لکڻا آهن، توهان جي فائدي ۾ آهي ته انهن درخواستن کي ٻڌڻي هيٺ رهڻ ڏيو. ان موقعي تي نواز شريف جي وڪيل خواجا حارث چيو ته منهنجو خيال ناهي ته منهنجا دليل حد کان وڌيل آهن، منهنجو ڏاڍو سادو سوال آهي، اڄ مان اهو چوان ٿو ته هي منهنجو اثاثو آهي، هاڻ قانون جي پوزيشن سمپل آهي. جسٽس اطهر من الله ريمارڪس ڏنا ته نيب جي قانون موجب ڪيس فڪس ڪرڻ کانپوءِ فيصلو ڏيڻو آهي، اسان سزا معطلي جي درخواستن تي مناسب فيصلو ٻڌائينداسين. بئنچ ۾ شامل ٻنهي ججن صلاح مشورو ڪيو، جنهن کانپوءِ عدالت اڳوڻي وزيراعظم نواز شريف، مريم نواز ۽ ڪيپٽن (ر) صفدر جي سزا خلاف اپيلن تي فيصلو محفوظ ڪري ورتو. واضح رهي ته احتساب عدالت ايون فيلڊ ريفرنس ۾ نواز شريف، مريم نواز ۽ ڪيپٽڻ (ر) صفدر کي سزائون ٻڌايو هيون، جنهن کانپوءِ اهي ٽئي اڊيالا جيل ۾ قيد آهن.

0Shares

اپنا تبصرہ بھیجیں